Saturday , November 17 2018
Home / Opini / Minutu Ida Silensiu Ba Demokrasia Iha Republika Ida Ne’e.
Delfina Pereira sidadaun Timor hela iha Australia. [Foto: dokumento privadu | 28.08.2018 ]

Minutu Ida Silensiu Ba Demokrasia Iha Republika Ida Ne’e.

Perspetiva konaba demokrasia ativa duni iha republika ida ne’e maibe, kontinua ho lidun ida naran Limited affect. Iha linguajen jornalismu audio-visual nian. Efeitu limitasaun ba demokrasia ne’e mai husi sira ne’ebé matenek. Buat hotu tuir LEI, sira hatene LEI, komprende no bele interpreta tuir LEI ne’ebé vigora iha rai ida ne’e.

Wainhira parte ida-idak mosu ho interpretasaun ne’ebé la hanesan ba assuntu ida, entaun mosu ona gap ida. Hotu-hotu hakarak defende ninia tasu, hotu-hotu loos. LEI oh LEI no dalaruma interpreta sala mos nee LEI.

Prespetiva seluk sistema demokrasia, iha powerful effect. Iha ninia forsa ne’ebé boot tamba ne’e okupa fatin barak iha rai ida ne’e nia laran. Demokrasia bele okupa lideransa sira nia laran nomós sira ne’ebé kbiit laek sira nia laran.

Tamba ne’e mosu liafuan balun dehan “o haan ai ha’u mos bele tolan fatuk. Ita hotu iha LEI no demorasia nia okos. O ne’e se?”

Perspetiva ikus liu konaba demokrasia mak unlimited effect assesu la iha rohan. Tamba gosta utiliza buat ne’ebé la iha rohan, “unlimited” entaun ita haluha aan, semo ba kalohan aas, sukat ba mai ita mak makas no iha power ka forsa liu ema hotu-hotu.

Kada ukun ida, liu-liu iha fileira demokrasia presija duni kritikas konstrutivu nomós hakat husi kontrolu social. Atu ukun ne’e labele sai hanesan tirania ba ditadura, absoluta ka ema utiliza sala ninia poder hodi halo ema seluk ne’ebé kbiit laek, pensamentu naton, sai fali vitima ba jogu politika ne’ebé la maduru.

Deal politic, entre ukun nain ida ho empresariu ida. Iha nasaun ida nia laran, ou ka komunidade plutocrat ho burgess. Akresenta hela iha agenda kultura politika no buat normal ida.

No buat ne’ebé la normal no sai pergunta boot mak ne’e “No money no democracy.” Ukun nain bele kontinua ninia poder, bele iha buat hotu. Maibe wainhira la hetan injeta osan makas husi plutocrat. Ukun komesa namlaik ona.

Hetan duni forsa politika husi orgaun barak maibe “No money no Democracy” sukat ba mai atu tibak demokrasia ka? Osan mak segundu Maromak no prejensa osan iha ema nia bolsu ho mahar. Lalehan, purgatoriu, inferno nia dada besik.

Tuir lolos entre ukun nain ida ho ninia povu ne’e mak, imajina hanesan osan koima. “Lidun ida ho lidun seluk bele la hanesan maibe, ninia valor ida de’it.” Maibe kuitadu…agora sai fila fali hanesan inverted pyramid (Piramida terbalik) no la kleur tan komesa nakfilak ba Pyramid Upside Down alias (Piramida jungkir balik) let’s c what will happen then.

Impresta liafuan eukaristia nian ida dehan “ha’u beik sala, ha’u beik sala, ladiak liu.” Prinsipu demokrasia husi povu, ba povu no fila fali ba povu. Imajina hanesan fali husi emprejariu, ba emprejariu no fila fali ba emprejariu. Hakleuk ka hakneak ikus mai demokrasia sai fali palku ba buka lukru-profit. (Coba kita bertanya pada rumput yang bergoyang) ita husu took ba duut ne’ebé anin huu ba mai.

Demokrasi agora ema tetak too uut didiak fo avo lafaek haan iha Lautem ne’eba. Loos duni se kompara ho situasaun agora “No money no democracy.” Iha liña Demokrasia populasaun bain-bain mos iha direitu ba halerik maibe ba se loos? Iha ne’ebé loos?

Komunidade plutocrat la prekupa ho ema barak nia vida, nia prekupa ho buat ne’ebé nia iha. No buat hotu nia bele hetan tamba nia iha osan ne’ebé boot.

Imajina salariu deputadu ida se U$ 3.500 kada fulan nomós pensaun sira seluk. Oinsa ho foos nia folin U$. 100.00. Ba nia nein influensia oituan basta ha’u bele moris. Maibe oinsa ho sira ne’ebé tane liman ba natureja, hetan osan husi ne’ebé?

Konaba salariu no direitu hirak ne’ebé laos ita nia kompetensia nudar povu mukit. Ne’e husik ba sira sobak too nanal telok no nisik didiak ba. Naran katak kria hela, kondisaun diak ba republika ida ne’e. Ahi matan dadersan, meudia ho loro-kraik kontinua lakan. Atu oan ba beioan sira bele dada iss no konta tuir iha loron ruma.

Moris iha Nasaun ida de’it, hotu-hotu haan hahan ida de’it. Maibe hahan ne’ebé lideransa sira haan lor-loron diferenti ho hahan ne’ebé belun mukit sira konsumu lor-loron. Belun mukit sira haan hahan ne’ebé dook husi padraun hahan saudavel.

Sira ne’ebé moris iha dolok kuak, foho leten no iha extrema remotas. Hein rai bokur, hein natureja nia liman rohan atu fo netik ba sira, maibe agora atu tane liman karik husu ba se? no se mak atu rona hananu eulogia ida ne’e. Natureja mos nonok de’it iha nakukun laran.

Atu halerik mos la iha tilun ida hakarak rona. Tanis to’o matan been maran, lian hotu tolan to’o de’it iha kakorok talin la tama ba kabun laran.

Situasaun politika no demokrasia iha rai ida ne’e, hanesan fali avo sira uluk hakfolik ho hena rohan de’it. Uluk iha fasista nia tempu avo sira siblizadu. Ida ne’ebé maun nafatin maun, alin nafatin alin. Uma fukun, uma knua ida de’it. Saida mak ladiak tuur hamutuk, nahe biti boot tatoli lia ba malu, sasin lia ba malu, kasu lia ba malu.

Rai atu naben, tasi atu sae mos ita nafatin ida de’it. Raan turuk ida hanesan hotu, kor mean hotu.

Ita nia hamutuk mak bele diak ba ita nia Timor-Leste ida ne’ebé furak, makas no kmanek iha mundu rai klaran. Hanoin kiik balun husi ha’u, espera bele anima belun sira iha nebe de’it

Ha’u hakerek ne’e la reprejenta ema ida ka instituisaun ida. Maibe hanesan parte ida husi harame DEMOKRASIA iha rai doben TIMOR-LESTE. ( Delfina Pereira, Sidadaun Timor hela iha Australia. Emaill: fevpdc@gmail.com )

 

 

 

About Other Source

Check Also

A EDUCAÇÃO É O PRINCIPAL EIXO ESTRATÉGICO DE UM PAÍS

Timor-Leste como um pequeno país que se conquistou a sua independência no ano de 2002 …

Leave a Reply

Your email address will not be published. Required fields are marked *