Friday , August 17 2018
Home / Sosial & Politika / MNEC Kansela Viajen Ba Renova Pasaporte, Sonio ho Familia Iha NZ Ameasadu Hasoru Deportasaun
Sidadaun Timor no nudar estudante iha Nova Zelandia hasai foto hamutuk ho familia. [Foto: dokumentu privadu | 23.07.2018]

MNEC Kansela Viajen Ba Renova Pasaporte, Sonio ho Familia Iha NZ Ameasadu Hasoru Deportasaun

“Prosesu administrative laos politika, desizaun nebe foti afeita tebes ba hau no familia tamba agora hau hetan ameasa hasoru deportasaun iha loron 8 nian laran, se ekipa husi Ministerio Justisa la dezloka mai iha Nova Zealandia iha tempu badak nian laran”. Sonio Fonseca

Sidadaun Timor ne’ebe halo nia estudu iha Nova Zelandia hasoru obstaklu ba renovasaun pasaporte eletronika, ne’ebe atu expire ka kaduka ona iha fim de Jullu. Entrevista ne’ebe halao liu hosi email ho TAFARA.TL, estudante ne’ebe hetan bolsu estudu, Sonio Guterres Fonseca, halao estudu iha Massey University hamutuk ho nia familia, hatoo sentimentu triste tanba lamenta ho desizun ne’ebe Ministro dos Negócios Estrangeiros e Cooperação [MNEC], Dionisio Babo ne’ebe kansela ekipa tekniku hosi Ministeriu Justisa no Ministerio dos Negócios Estrangeiros e Cooperação, ne’ebe tuir lolos sei desloka ba Nova Zelandia iha fulan Julhu 2018.

Sonio Esklarese katak , “kanselamentu desizaun administrative governo anterior nian kona ba dezlokasaun ekipa ne’e halo iha minutu ikus (last minute decision.red) nebe prejudika tebes hau no hau nian familia. Hau no familia laiha kapasidade finansial sufisiente atu fila ba Timor, atu renova ami nian pasaporte elektroniku, ami aproxima Embaixada Timor-Leste iha Nova Zelandia iha kedas fim do ano 2017, maibe embaixada Timor-Leste la fo sujestaun no apoiu mai ami, entaun ami foti inisiativa rasik, haruka ami nian pedidu ba apoiu consular MNEC direita. MNEC, Ministerio Justisa no Ministerio Edukasaun halo desizaun no haruka ekipa mai iha Nova Zelandia. Bazeia ba komunikasaun ho Governo anterior [VII Governu] katak orsamentu aprova tiha ona, no pessoal nebe involve iha ekipa tekniku Ministerio Justisa no MNEC nian visto entrada mai Nova Zelandia mos hetan tiha ona”.

Estundate ne’e hateten katak prosesu administrative laos politika, desizaun nebe foti afeita tebes ba hau [Sonio. Red] no familia tamba agora ameasa hasoru deportasaun iha loron walu nian laran, se ekipa husi Ministerio Justisa la dezloka mai iha Nova Zealandia iha tempu badak nian laran, tuir komunikasaun nebe sira halo .

“Ami la espera katak ami sai vitima ba politika implementasaun pasaporte elektroniku, no ami hein katak hau no familia sei la halo istoria foun sai primeiro Timor oan nebe hetan deportasaun husi Nova Zelandia. Komunikasaun iha semana kotuk mos dehan ekipa sei mai, agora kanselamentu iha minutu ikus ne ami atu foti osan husi nebe, atu ba Timor, hau husu ba Governo atu bele tetu fali desizaun ida ne’e. Hau hakarak dehan katak Hau no familia hein deit bainhira mak Governo Nova Zelandia Deportas ami sai husi Nova Zelandia, tamba konserteja hau no familia laiha kapasidade finansial sufisiente atu viajen ba Timor iha tempu badak nian laran, hodi renova ami nian pasaporte . Laiha pasapote foun maka ami sei labele hetan vistu foun, maka ami sei hasoru deportasaun husi Nova Zelandia iha loron 8 nian laran.Ministerio dos Negócios Ministeriu Estrangeiros e Cooperação. Politiza ami nian prosesu”, deklara Sonio, 17/07 via emaill.

Sidadaun Timor ne’ebe hetan bolsu estudu hosi governu Nova Zealandia ne’ebe hetan problema ho pasaporte, afeta mos ba nia oan nain tolu feto..no mane..ne’ebe sira nia pasaporte sei mate iha fim de Julhu.

Relasiona ho desizaun hosi governu sentral iha Timor-Leste ne’ebe mak la iha solusaun Sonio esklarese liutan via email katak triste tebes tanba desde inisiu embaixada la komunika pedidu ho governu sentral, tanba ne’e mak Sonio halo pedidu direita ba governu sentral liu hosi MNEG hodi fo solusaun.

“Sekarik desde inisiu kedas sira kansela ou la aprova entaun hau sei bele buka dalan tuir hau nian kapasidade finansiamentu hanesan estudante, agora governu anterior aprova no komunikasaun ikus iha semana rua liu bakatak ekipa teknika sei dezloka mai Nova Zelandia fo harapan tiha mai hau ho familia, maibe to minute ikus kansela fali no husu hau atu sai lalais hosi Nova Zelandia. Hau laos diplomata ne’ebe hetan apoiu tomak hosi governu, hau laos diplomata iha rai liur ne’ebe nian familia tomak responsabiliza hosi governu, hau nia familia iha Timor mos laos emprezariu no hau mos laos emprazariu ne’ebe iha kapasidade finansiamentu forte atu bele hola tiket. Hau nia kapasidade hanesan estudante, kanselamentu minute ikus ne’e estraga buat hotu. Politizasaun ba prosesu administrative hodi kansela ekipa tekniku mai Nova Zelandia nne’e estraga buat hotu. Laos hau mesak mak estudante maibe hau nia oan sira mos estudante”, hateten Sonio ho sentimentu triste via email ba TAFARA.TL.

Tuir dokumentu TAFARA.TL hetan hosi sidadaun Timor iha Nova Zelandia, Sonio Fonseca katak iha loron 26 Fevereiru 2018, Sonio hatoo karta pedidu ba aktualizasaun karta pedidu ba apoiu consular, ne’ebe hatoo ba Diretor para Assuntos Consulares e das Comunidades Timorense, Ministériu dos Negócios Estrangerios e Cooperação, Celio Moniz. Liu hosi pedidu ne’e, Sonio husu katak atu hetan apoiu consular ne’ebe haruka ba iha loron 2/02/2018. “Hau ho familia iha situasaun ida emerjensia maibe ate agora, hau sedauk simu ou hetan resposta ou kontaktu ruma hosi Diração Para Assuntos Consulares e das Comunidades Timorense, Ministerio dos Negócios Estrangeiros e Cooperação.

Iha loron 26 Marsu 2018 hetan konfirmasaun hosi Diretor Previlegios e Immunidades e Director Interino DACCT-MNEC, Vanio de Jesus, liu email esplika katak relasiona ho planu hosi Ministeriu Justica, Ministeriu Edukasaun no MNEC, ne’ebe koalia ona, katak sei lori ekipa ida ba halo renovasaun pasaporte komum ba sidadaun Timorense ne’ebe nia pasaporte kaduka ona.

“Relasiona ho preokupasaun ida ne’e, hau ata koalia ona ho kolega sira hosi ministeriu relevantes. Resposta hosi sira katak, idea atu ba ne’e laos deit atu responde ba pedidu hosi estudante Sonio ho nia oan, maibe idea ne’e iha ona antes problema ida ne’e mosu. Ekipa ida ne’e forma atu responde duni ba problema hanesan maibe sei halo iha fatin seluk hanesan Portugal, Englatera inklui Nova Zelandia”, esplika Vanio liu hosi email ne’ebe manda ba Embaxada RDTL iha Nova Zelandia, Armindo Simoes.

Iha email ne’e, Vanio hatutan katak relasiona ho planu ekipa atu ba Nova Zelandia konfirmadu ona, DACCT husu mos apoio hosi embaxada RDTL iha Nova Zelandia, hodi bele informa mos ba estudante Timor sira ne’ebe mak nia pasaporte validade kaduka no besik kaduka ona, hodi bele rejistu hamutuk, atu nune’e ekipa bele fasilita hamutuk.

Karta pedidu ne’ebe hatoo hosi sidadaun Timor n’ebe estuda iha Nova Zelandia, Sonio Fonseca, ne’ebe hetan ona aprovasaun hosi MNEC, Aurelio Guterres iha VII Governu Konstituisional, hetan kanselamentu hosi MNEC, Ministro Dionisio Babo VIII Governu Konstituisional, liu hosi enkontru ne’ebe halao iha loron 10 Julhu 2018, razaun tanba orsamentu no sujere atu servisu ne’e entrega ba Ministeriu Justica.

“Diresaun Consular MNEC nia ema la precisa atu ba, maibe MNEC iha embaxada ho ninia diplomata sira atu fo assistensia ba equipa husi Ministerio Justica, hodi halo sira nia knaar. Ita nia diplomata sira iha Bali, Darwin , Sidney no Nova Zelandia prontu atu fo apoiu iha aeroportu, se karik equipa refere precisa”, tuir esplika hosi email ne’ebe manda hosi Direção Previlégios e Imunidades ba Sonio Fonseca no Embaxada RDTL iha Nova Zelandia iha loron 16/07.

To’o notisia ne’e publika, jornalista TAFARA.TL seidauk hetan klarifikasau hosi MNEC kona ba kanselamentu viajen, hodi halo prosesu administrasaun ba pasaporte estudante nian.* [ Zevonia Vieira | TAFARA.TL | 23.07.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

SEKOMS Halao Enkontru Ho HAK, Hodi Rona Avaliasaun Area Komunikasaun Sosial

“Komunikasaun entre instituisaun governante sira ba nia povu la dun lao diak, entaun povu rasik …

Leave a Reply

Your email address will not be published. Required fields are marked *