Modalidade 13 Sei Partisipa iha ASIAN GAMES, Maibe Depende Ba Orsamentu

Confederasaun Desportu Timor Leste [CDTL] sei halao servisu hamutuk ho federasaun ba modalidade desportu 13, hodi prepara atleta sira ne’ebe iha prestasaun diak, hodi partisipa iha ASIAN GAMES tinan ne’e iha Indonesia.

Modalidade hirak ne’e mak hanesan Atletizmu, Boxing, taekwondo, Karate, Volley ball Praia, Silat, Tenis Meza ,Futebol, Siklizmu, Basket ball, tiru no Suni, Hautelkilizmu, Tenis no cempo.

Prezidente CDTL Afranio Amaral informa katak antes ba partisipa ASIAN GAMES, sei iha preparasaun durante fulan neen, ba atleta sira maibe depende ba orsamentu.

“Fulan neen atu halo preparasaun ba sira, iha preparasaun ne’e bele mos iha try out ou bele mos laiha, depende ba orsamentu tanba ita sei utiliza orsamentu duadesimu ne’e. Orsamentu ida ne’e limitadu tebes, sedangkan propoin orsamentu husi CDTL ho montante $500.700 oital, ne’e seidauk inklui komite olimpik nian”, hateten Afranio

Entretantu Sekretariu Estadu Desportu Promosaun no Alta Kompetisaun [SEDPAC], Osorio Florindo da Conceição Costa hateten laiha orsamentu Estadu ne’ebe alokadu espesial ba ida ne’e

“Hanesan ita hotu hatene situasaun politika, laiha orsamentu estadu ida mak bele aloka espesial ba ida ne’e. Hau hanoin sistema ne’ebe ema hotu hatene maka aplika sistema duadesimu, signifika katak kada Asosiasaun, Federasaun konfederasaun hatama sira nia planu mensal mai SEDPAC, maibe mos tenki tuir plafon orsamentu ne’ebe maka Ministeiru Planu Finansas fo Mai SEDPAC”, Hatan Osorio iha edifisiu SEDPAC.

Osorio Florindo mos afirma katak membru governu tomak infrenta ho situasaun ba problema orsamentu maibe la signifika labele halo buat ruma

“Ita aplika orsamentu ou ezukata orsamentu 2017, ita labele halo atividades 2018 nian, uza osan 2017 nian. Ida ne’e mak situasaun governu tomak infrenta, maibe la signifika katak ita labele halo buat ruma. Liu husi test event ne’e pelu menus, ita tau osan oituan para sira halo kompetisaun, depois ema halo selesaun ba test event ne’e para halo kontinua treinamentu ba ASIAN GAMES. Hau hanoin to fulan Agustu politika bele normal, ita bele lao ona”, hateten Osorio. [Henrique soares de Jesus | Editor: Zevonia Vieira | TAFARA.TL 01.02.2018]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.