Saturday , November 17 2018
Home / Sosial & Politika / MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante
Partisipantes PARPOL hasae foto hamutuk ho CAUCUS, MOFFE no reprezenta UNDP iha salaun Tower Fatuhada. [Foto: Zevonia Vieira | 16.10.2018]

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak hakbiit hau nia an atu bele servisu hamutuk ho mane sira iha partidu laran ba partidu nian diak no mos ba nasaun”. Marcelina

 Movimentu Feto Foin Sae [MOFFE] servisu hamutuk ho CAUCUS hodi realiza formasaun konab ba partisipasaun feto iha partidu, tuir CAUCUS no MOFFE katak ida ne’e objetivu ida atu kria sistema adekuada ne’ebe forte, hodi eleva partisipasaun feto no juventude feto sir aba iha prosesu konstrusaun estadu no iha setor dezenvolvimentu hotu hanesan ekonomia, politika, sosial no kultura.

Iha loron abertura ba formasaun ne’e, Diretora MOFFE, Yasinta Lujina hatoo katak feto nia partisipasaun iha partidu politiku ne’e importante, tanba sira bele kontirbui sira nia matenek no kapasidade ne’ebe iha apoia partidu hodi atinji partidu nia objetivu ba nasaun ida ne’e.

“Konsiderasaun feto sira iha partidu dala bara la dun hetan oportunidade iha partidu laran, maske sira iha kapasidade ne’ebe diak. Dala barak mane sira mak iha desizaun forte liu no iha poder hodi foti desizaun liga ho serviu partidu nian”, hateten Yasinta, iha salaun Tower Fatuhada 16/10.

Ativista ne’ebe durante ne’e luta ba direitu feto, hatutan tan katak MOFFE ho CAUCUS iha komitmentu boot hodi kria formasaun sira ne’ebe liga ho igualdade jeneru, hodi haforsa liutan mekanismu ne’ebe diak ba partisipasaun feto iha partidu laran. CAUCUS no MOFFE servisu hamutuk hodi hakbiit feto sira, hodi haforsa liutan partisipasaun iha partidu laran, hodi halo mudansa ne’ebe diak liu iha partidu laran, tanba partisipasaun feto no mane importante tebes, iha prosesu dezenvolvimentu.

Iha fatin hanesan Chief Technical Advisor Electoral Project-Learn UNDP Timor-Leste, Andrés de Castilo Sánches hateten UNDPhanoin katak programa igualdade jeneru ne’e importante tebes, hodi apoia programa igualdade jeneru ne’ebe organiza hosi MOFFE no CAUCUS.

Tuir Andrés katak numeru eleitores feto barak liu mane, maibe partisipasaun feto iha partidu laran sei hetan numeru kiik, no mane nia persentazen iha partidu laran ha nivel as sei boot liu.

“Importante tebes hamutuk fo apoio ba lian feto nian iha partidu laran. Ita tenke servisu barak hodi atinji feto nia partisipasaun ne’ebe bele as ka aumenta. Iha municipio partisipasaun feto sei menus los, entaun partisipasaun feto iha area rural ka nivel distritu sei fraku, presiza duni servisu makaas hodi hasae numeru feto iha distrtu mos”, deklara Andrés

Reprezentante hosi partidu Frente Mundansa, Marcelina Ximenes ne’ebe mak partisipa iha formasaun refere ba TAFARA.TL hateten katak feto nia partisipasaun importante tebes iha partidu laran, ideas ne’ebe mai hosi feto mos sei hatudu mudansa positivu iha partidu laran.

“Feto sira iha partidu laran halo mos servisu barak ba partidu nia susesu. Hau hakarak hakbiit hau nia an atu bele servisu hamutuk ho mane sira iha partidu laran ba partidu nian diak no mos ba nasaun”, hateten Marcelina

Tuir observasaun Marcelina katak durante ne’e partidu barak liu-liu lideransa mane sira iha kampanna eleitoral halo promesa mak barak maibe nainhira sia atinji ona sira nia mehi, sira haluha tiha, “hau la aseita katak ita halo promesa deit maibe implementasaun laiha”.

Marcelina iha komitmentu boot hodi bele kontribui nia hanoin iha partidu laran, tanba durante nia sei hare povu nia halerik ba bee mos.

“Hau hakarak aprezenta ba iha partidu laran katak, problema bee moos ne’e tenke resolve, komunidade sira presiza bee moos. Ita mos tenke fo atensaun ba produto lokal ne’ebe dala barak la folin, ita tenke promove produto lokal para bele ajuda hasae ekonomia agrikultor sira iha rai laran”, hateten Marcelina ba TAFARA.TL katak feto nia hanoin ne’e importante hodi halo mudansa ne’ebe diak ba povu nia moris.

Iha treinamentu ne’e formador sira foka konaba sistema demokrasia no promosaun igualdade jeneru, oinsa politika fusaun publiku hodi asegura no promove feto nia pozisaun estratejia iha kada ministeriu, boa governasaun konaba prinsipiu promove igualdade jeneru no papel mo funsaun partidu politiku hodi kondus partisipasun feto ni mane iha vida politika.

Treinamentu ne’ebe realiza hosi MOFFE no CAUCUS tanba hetan apoio finanseiru hosi governu Korea no Japuan, liu hosi UNDP iha Timor-Leste. Formasaun ba lideransa partidu politiku sira ho tema sensiviliza igualdade jeneru ba partidu politku, sei halao durante loron haat, hosi 16 – 19 Outubro. * [ Zevonia Vieira | TAFARA.TL | 16.10.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *