Thursday , May 23 2019
Home / Sosial & Politika / MP Akuza Eiz Vice MF, Krimi Abuzu de Poder Ba Kazu Pagamentu Defeza Partikular Emilia Pires
Tribunal Distriu Dili. [Foto: Copyright STL Online]

MP Akuza Eiz Vice MF, Krimi Abuzu de Poder Ba Kazu Pagamentu Defeza Partikular Emilia Pires

“Emilia Pires bainhira provadu katak Pratika duni krime sira ne’e no hamosu duni prejuizo ba Estadu, maibe arguida Santina autoriza no aprova tan pagamento ne’ebe foti tan estadu Timor-Leste nia orsamentu hodi halo pagamentu ba defeza particular ne’ebe halo hosi EP”. MP

Ministeriu Publiku [MP], Akuza Eiz Vice MF Santina Cardoso ho krimi abuza de poder tuir 297 Kodiku penal, ho pena prizaun tinan ida to haat.

Iha loron 30/05, Tribunal Distrital Dili halo prosesa julgamentu ba akuzasaun ne’ebe hatoo hosi Ministeriu Publiku, iha karta deklarasaun esplika ba eis Vice Ministra Finansas V Governu Konstituisional, Santina Jose Rodrigues Ferreira Viegas Cardoso.

Liu hosi akuzasaun refere Ministeriu Publiku hateten katak MP deduz akuzasaun no husu julgamentu iha prosesu komum ho intervensaun Tribunal kolektiva, tuir artigu 236 hosi K.P.P hasoru Santina Jose Rodrigues Ferreira Viegas Cardoso, iha fulan Agustu 2012 to fulan Fevereira 2015.

Tuir akuzasaun katak iha fulan Julhu 2014, Ministeriu Publiku akuza eiz Ministra Finansas, Emilia Pires [EP] pratika krime partisipasaun ekonomika iha negosiu ho krimi administrasaun danosa ho numeru prosesu NUC 1212/12.PDDIL.

“Bainhira EP simu akuzasaun, nia la konkorda ho akuzasaun katak faktu sira deskreve iha akuzasaun la los. Tanba la konkorda ho akuzasaun mak iha loron 4Agustu 2014, EP halo konferensia imprensa, liu hosi deklarasaun ba media sira hasoru MP nia akuzasaun. Deklarasaun ne’ebe EP halo iha momentu ne’e, haruka mos ba media sira hodi publika iha jornal sira no tau iha publisidade, hanesan iha loron 7 Agusto 2014, fo sai iha jornal STL, Independente no Timor Post. Iha loron 8 Agustu 2014, fo sai tan deklarasaun ne’e iha parte publisidade nian, iha jornal Independente. Iha loron 11-17 Agusto 2014, deklarasaun refere fo sai jornal Bussines Timor”, tuir kronologia hosi MP.

Tuir Akuzasaun hosi MP katak tanba fo sai iha jornal, iha parte publisidade tenke selu kustu publisidade nian ba jornal sira, tuir medida ne’ebe estabelese ona iha jornal sira. Ho publisidade refere, jornal STL hatama invoice ba MF ho montante $700.00, Independente ho montante $300.00, Timor Post $300.00 no Business Timor ho toal $600.00.

Ministeriu Publiku deklara katak bainhira tama iha Ministeriu Finansas, maka arguida Vise Ministra, Santina Cardoso autoriza hodi prepara VPC tuir invoice sira ne’ebe mak hatama hosi jornal sira. Iha loron 12 Agustu 2014, Ministeriu Finansas prepara CPV ba jornal independente, ne’ebe asina hosi Diretur Administrasaun no Finansas, Martinho Lopes, no sertifika hosi Direitur Jeral, Norberta S. da Costa iha loron 13 Agusto 2014, no autoriza no aprova hosi arguida Vice Ministra Finansas.

Iha karta akuzasaun hosi MP esplika katak bainhira produz CPV, ne’ebe hetan ona autorizasaun no aprovasaun hosi arguida SC, iha loron 14 Agusto 2014, Ministeriu Finansas prepara pedidu pagamentu ba jornal independente ho total $300.00, loron 22 Agusto 2014, MF prosesu pedidu pagamentu ba jornal Business Timor ho total $600.00, loron 9 Septembru 2014, MF prosesa pedidu pagamentu ba Timor Post ho total $300.00 no iha loron 25 Septembru 2014 halo pagamentu ba STL ho total $700.00. Total orsamentu hamutuk $1,900.00 hodi selu publisidade iha media.

Liu hosi prosesu julgamentu ne’e, reprezentante hosi Ministeriu Publiku mak Gabinte Kombate Korupsaun no Krimi Organizadu [GCCCCO] Ministeriu Publiku, Prokurador da Republika, Rogerio Viegas Vicente, iha karta deklarasaun esplika katak MP akuza EP tanba iha indisiu sufsiente pratika krime partisipasaun ekonomika iha negosiu no administrasaun danosa hodi hamosu prejuizo ho montante ne’ebe signikativu ba Estadu RDTL no husu responsabilidade criminal no sivil, EP bainhira provadu katak Pratika duni krime sira ne’e no hamosu duni prejuizo ba Estadu, maibe arguida Santina autoriza no aprovatan pagamento ne’ebe foti tan estadu Timor-Leste nia orsamentu hodi halo pagamentu ba defeza particular ne’ebe halo hosi Emilia Pires.

Tuir esplikasaun iha karta deklarasaun katak, arguida SC hatene katak akuzasaun hasori EP no laos Ministeriu Finansas, ida ne’e tama responsabilidade criminal pesoal no laos responsabilidade instituisaun ka estadu, nune’e hodi selu fali osan estadu nian ba aktu sira ne’ebe mak pratika hosi Emilia Pires ba defeza particular.

Iha deklarasaun mos hateten katak, “arguida mos hatene katak bainhira encarrega administra bens patrimonio estadu nian, tenke halo tuir regras no kontrolu ba jestaun, tanba dever ne’ebe iha, mai nia funsaun nudar vise ministra, maibe arguida ignora tiha dever, atu administra bens estadu nian la tuir regras jestaun no kontrolu iha MF. Arguida aproveita nia kargu nudar Vise MF hodi abuzu nia poder no viola nia obrigasaun, fo autorizasaun ba parte finansas iha MF, hodi prosesu pagamentu ba jornal sira ne’ebe mak publika ona Emilia Pires [EP] nia deklarasaun, hodi fo benefisiu ilejitimu ba EP no hamosu prejuizu ba estadu RDTL ho montante $1,900.00”.

Tuir MP katak arguida SC hatene katak hahalok ne’e ho livre, deliberada ho konsientemente, hatene katak arguida iha obrigasaun atu kumpri dever no regras ezekusaun orsamentu no viola nia obrigasaun , no autoriza nia sub-ordinariu sira, prosesu pagamentu ba jornal sira ne’ebe tuir lolos la akontese no arguida hatene nia hahalok kontra Lei.

Ministeriu Publiku esplika katak arguida hanesan autora material ho forma konsumada, komete krime administrasaun danosa, P.np.artigu 274 n.2 kodigu penal, no konkursu ba krime abuzu podes, p.np artigu 297 hosi kodigu penal Timor-Leste nian.

Iha parte hanesan jornalista Eujevio Pereira hosi jornal Independente, hetan mos karta notifikasaun hosi Tribunal Dili, hodi sai sasin ba publisidade deklarasaun pesoal Emilia Pires ne’ebe publika iha jornal.

Ba TAFARA.TL Eujebio esplika katak iha loron 4 Agustu 2014 simu karta deklarasaun ne’ebe atu publika iha jornal, no simu hosi Media Officer MF, Fernando Ribeiro. Deklarasaun refere publika iha loron 7 Agustu 2014 ho pagina sorin no MF selu publisidade iha loron 23 Outubro 2014.

Eujevio mos afirma katak karta publisidade ne’e simu iha palacio governu iha loron 4 Agustu 2014 hosi Media Officer MF, Fernando Ribeiro, “hau preparadu ona sai sasin ba kazu eis ministra finansas iha Tribunal Dili”.

Parte sorin Media Officer, Fernando Ribeiro mos hetan notifikasaun hosi Tribunal Dili, atu sai sasin ba distribuisaun deklarasaun hosi Emilia Pires ba media sira atu publika.

Tuir agenda iha loron 30/05, Eujebio no Fernando sei deklra nian parte nudar sasin, maibe juiz muda tiha loron ba 27 Junhu 2018. Sasin ne’ebe ohin konsege halo deklarasaun iha julgamentu mak Diretor Nasional Administrasaun e Finansas, Martinho Lopes.

TAFARA.TL mos koko halo entrevista ho arguida SC no sasin Martinho Lopes iha Tribunal Distritu Dili, maibe sira sedauk prontu halo entrevista ho media sira.

Lidera prosesu julgamentu ba kazu akuzasaun Eiz Vice-MF ho krimi abuzu de poder iha Tribunal Distritu Dili, Prezidente Juiz mak Jumiati Maria Freitas, Adjuntu Juiz Dra. Albertina no Dr. Antonio Helder. Hosi Ministeriu Publiku mak Gabinte Kombate Korupsaun no Krimi Organizadu [GCCCCO] Ministeriu Publiku, Prokurador da Republika, Rogerio Viegas Vicente, advogados defeza ba arguida SC mak Dr. Sahe da Silva no Dr. Nuno Marrazes. *[ Zevonia Vieira | TAFARA.TL | 30.05.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *