Wednesday , June 19 2019
Home / Sosial & Politika / OJE 2019, Lú Olo: Atu Hetan Kreximentu Ekonomiku & Dezenvolvimentu Sosial, Tenke Aloka Osan Ba Prioridade no Jere Ho Diak
Prezidente da Republika, Dr. Francisco Guterres Lú Olo hato deskursu iha abertura loron nasional veteranu iha CCD. [Foto: Media PR | 02.03.2018]

OJE 2019, Lú Olo: Atu Hetan Kreximentu Ekonomiku & Dezenvolvimentu Sosial, Tenke Aloka Osan Ba Prioridade no Jere Ho Diak

Prezidente da Republika, Dr. Francisco Guterres Lú Olo hatoo deklarasaun ofisial ba publiku konaba rasaun promulga dekretu foun hodi parlamentu nasional konaba Orsamentu Jeral Estadu [OJE] 2019. Prezidente deklara katak promulga dekretu foun ne’e ho kbiit ne’ebe Konstituisaun Republika fo ba Prezidente Republika, ho promulgasaun ne’e no publika iha Jornal Republika mak dekretu foun ne’e nakfila ba Lei OJE ba tinan 2019.

“Hau veta dekretu dahuluk no husu ba deputadu sira tetu fila fali ho razaun katak OJE ne’ebe hau veta ne’e boot tebes. Orsamentu boot la signifika katak ita bele ona haburas ita nia ekonomia no ita nia ema. OJE nia efetiu ba kurtu prazu deit [tinan ida], maibe atu hetan kreximentu ekonomiku no dezenvolvimentu sosial, importante tebes hili politika ho kualidade no aloka osan ba prioridade lolos no jere osan didiak”, hateten Lú Olo, 11/02

Prezidente Lú Olo deklara mos katak presiza tau osan iha capital dezenvolvimentu tanba ida ne’e mak dudu kreximentu ekonomiku, maibe tenke tau osan mos iha rekursu umanu no iha atividade sira ne’ebe hamosu empregu, “ita tenke investe iha área oi-oin, atu labele depende deit ba reseita hosi minarai ne’ebe sei hotu iha tinan ruma mai ne’e”.

Liu hosi deklarasaun mos Lú Olo hateten katak tanba sa labele depende deit hosi reseita minarai nian? Tanba tuir Prezidente Lú Olo katak minarai iha kampu Bayu Undan ne’ebe hahu explora hosi tinan 2005, sei remata iha tinan 2022. Sedauk iha fonte seluk atu hetan rendimentu boot hanesan ka liu kampu Bayu Undan. Tanba nee tenke uza ho koidadu osan ne’ebe tama ona iha Fundu Minarai no sei tama tan maske ho kuantidade kiik to tinan 2022.

“Hau preokupa tebes ho ita nia ema, oinsa dezenvolve rai doben ida nee ba bebeik, ho atensaun especial ba ita nia ema, nudar ita nia rekursu boot liu. Ita tenke investe agora iha kapasidade, atu nune’e ita nia rekursu preparadu atu simu, implementa no jere projetu boot sira ne’ebe sei mai”, hateten Lú Olo

Xefe Estadu mos fo hanoin katak realidade ohin loron ho maioria agricultor no sira nia kondisaun moris ohin loron, ho maioria kiak no mukit tebes, presiza investe makaas liu iha sector sira ne’ebe bele hasa’e no habelar rikeza, fo empregu ba ema barak no garante futuru diak no saudável ba jerasaun foun sira. Tuir Prezidente da Republika katak sector importante neebe estadu tenke fo atensaun mak hanesan edukasaun, saúde, agricultura, turismo, bee moos no saneamentu baziku. * [Zevonia Vieira | TAFARA.TL | 11.02.2019]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *