Thursday , November 23 2017
Home / Opini / Oinsa Dependensia ba Petróleu Satan Diversifikasaun Ekonomia?
Guteriano Neves [Foto: Koleksi Pribadi]

Oinsa Dependensia ba Petróleu Satan Diversifikasaun Ekonomia?

Dezde inísiu, Timor-Leste konsente ho problema sira ne’ebé asosia ho petróleu. Tanba ne’e, mata dalan ba polítika públiku Timor mak oinsa “uza osan petróleu lori dezenvolve seitor sera seluk.” Atitude ida ne’e mak dopetróleu diskusaun iha nivel polítika publiku entre sosiédade sivil, politiku no mos ajensia internasional sira dezde 2002 mai oin.

Infelizmente too agora, kuaze 90% rendimentu estadu nian sei mai hosi petróleu, gastus estadu nian sei ekivalente ho 90% hosi ekonomia domestika, no mais de 50% hosi ekonomia domestika sei mai hosi sirkulasuan osan petróleu liu hosi OJE.

Tanba ida ne’e diskusaun agora, ita presiza hakiduk oitoan no husu tanba sa mak tinan sanulu ona ita falla atu atinzi ida ne’e. Tenki iha kestaun estrutural ruma ne’ebé impede prosesu ida ne’e. Artigu ida ne’e ofrese hanoin balu no mos reflesaun balu bazeia ba observasaun no mos involvimentu direitamente iha Timor durante tinan hirak nia laran ne’e.

Primeiru, Petróleu nuudar Indústria Rentier; katak lukru ne’ebé hetan hosi petróleu boot liu dook investimentu ne’ebé halo. Tanba ne’e, wainhira país ida diskobre petróleu, ne’e hanesan sorte boot ida. Petróleu mos hanesan indústria ho karakteristiku hirak hanesan intensivu iha kapital sofistikadu iha teknolojia no mos enklave. Nuudar enklave, no indústria petróleu dala barak laiha ligasaun ho seitor ekonomia sira seluk direietamente. Ho karakteristiku hirak iha leten, indústria petróleu laiha efeitu direitamente ba seitor ekonomia tomak; liliu pais hirak ne’ebé ninia ekonomia seidauk diversifikadu.

Ba estadu ne’ebé sai nain, rendimentu petróleu forma estadu sai estadu rentier; katak maioria hosi rendimentu estadu nian mai hosi fontes externa, no laos hosi ekonomia rai laran. Ida ne’e afekta ba prosesu halo desizaun, pensamentu ekonomia, no aproximasaun polítiku sira ba dezenvolvimentu no interasaun estadu, sosiédade ho ekonomia rai laran nian. Estadu hanesan ita haree iha Timor, hola tia papel hanesan intermediariu ida; iha ne’ebé gastus publiku sai hanesan meius atu kanaliza rendimentu petróleu ba iha ekonomia no sosiédade tomak. Ida ne’e mos forma kompetisaun entre elite sira atu kontrola estadu sai maka’as; tanba estadu mak sentru ba rekursu tomak iha sosiédade laran.

Osan petróleu mos transforma sosiédade tomak nia atitude ba dezenvolvimentu no sira nia esperansa. Ho montante ne’ebé boot, hamosu mehi boot hosi populasaun kona ba sira nia futuru, no ikus mai hamosu presaun politiku ba estadu atu gasta osan ho lalais. Politiku sira mos hola dalan badak lori gasta ba tempu badak nian atu hetan popularidade polítika. Ho osan ne’ebé tama lalais ho boot, politiku sira hakarak transforma lalais sosiédade liu hosi gastus publiku, halo expansaun ba birokrasia estadu, estadu sai hanesan empregador prinsipal iha ekonomia.

Fenomena hirak ne’e ita bele nota iha Timor dezde 2008 too agora. Ita nia birokrasia aumenta maka’as dezde 2008 to’o 2013. Ida ne’e implika ba ita nia gastus publiku ne’ebé boot, relativamente kompara ho ita nia ekonomia domestika tomak. Wainhira osan gasta liu hosi instituisaun publiku sira, ida ne’e hamosu naha todan ba iha instituisaun publiku. Maski agora ita komesa hanoin oinsa atu hamenus gastus, ida ne’e sai todan tanba ita kostume tia ona ho gastus boot.

Iha nivel teoritiku, iha argumentu katak xavi atu dezenvolve ekonomia mak dezenvolvimentu instituisaun publiku. Maibe problema ba Timor mak ita nia instituisaun publiku la dezenvolvidu, no ita mos hetan eransa hosi modelu administrasaun publiku rua ne’ebé la efisiente: Indonezia ho Portugal. Ho eransa iha leten, no faktus katak ita nia birokrasia foun, wainhira osan petróleu kanaliza liu hosi gastus públiku ho numeru ne’ebé boot, ida ne’e hamosu naha todan iha instituisaun públiku atu gasta osan. Ikus mai, mosu abuzu de poder no korupsaun iha instituisaun públiku sira, hanesan agora ita haree. Sekretariu Jeral Partidu FRETILIN, Sr. Mari Alkatiri rasik rekoñese kestaun ne’e iha diskusaun orsamentu jeral du estadu 2013 nian.

Osan hosi petróleu ne’ebé tama ho montante boot liu hosi instituisaun públiku mos hamosu interpretasaun ida katak osan mak solusiona ba problema hotu. Ida ne’e hamenus pensamentu ekonomiku iha seitor publiku; atu explora rekursu seluk ne’ebé iha. Ida ne’e mos afekta effisiensia no produtividade iha seitor publiku. Ho osan ne’ebé iha, halo fasil ba politiku sira atu kria tan instituisaun foun barak ne’ebé ho objetivu atu aumenta produtividade no efisiensia. Maibe buat ne’ebé akontese mak instituisaun hirak ne’e aumenta tan naha todan ba estadu atu jere, no instituisaun publiku sai hanesan fatin atu hetan asesu ba ekonomia rentier.

Petróleu dala barak hamosu ekonomia rentier, iha ne’ebé ema oitoan deit mak involve iha atividade produtivu, no maioria populasaun depende deit ba sirkulasaun osan petróleu liu hosi orsamentu estadu nian. Atividade seitor privadu mos konsentra iha seitor sira ne’ebé estadu fakar osan barak. Ho osan ne’ebé tama fasil, hamate inovasaun no kreatividade iha sosiédade laran. Ema hotu kompete deit atu hetan osan hosi estadu no la involve iha seitor produtivu. Ida ne’e fenomena mentalidade rentier ne’ebé agora Timor-Leste enfrenta hela. Ema hotu kompete atu hetan sorte deit, no la’os involve iha atividade produtivu ida ne’ebé sistematiku.

Ida ne’e forma dinamika ekonomia ida ne’ebé interesante. Rendimentu ne’ebé boot ikus mai destroi nosaun ekonomia modernu iha ita nia instituisaun publiku no sosiedade nia leet. Definisaun bazika hosi ekonomia modernu mak ita jere rekursu ne’ebé limitadu. Maibe tanba petróleu fornese osan barak, ita lakon nosaun ida limitadu ne’e. Ita hanoin mak ita nuudar pais riku tanba ita iha osan barak. Wainhira ita halo planu, ita la hili opsaun ida hosi opsaun oioin; no ita la hanoin kona ba opportunity cost. Ita hanoin deit mak atu gasta hira no no ita sei konsege gasta duni ka lae.

Wainhira osan petróleu tama iha merkadu, kria disequilibriu iha merkadu, hamenus kompetividade seitor produtivu hanesan agrikultura. Ho gastus estadu nian ne’ebé as iha seitor konstriusaun no servisu, dada rekursu ekonomia nian hotu ba iha seitor rua ne’e; husik seitor sira hanesan agrikultura sai mamuk. Rekursu iha ne’e laos deit osan, maibe mos inklui petróleu. Fenomena ida ne’e mak ita haree wainhira jovem halo migrasaun hotu hosi area rural mai Dili; ou preferensia ba estudu ne’ebé la fo importansai ba agrikultura duke jeolojia, petróleu, ou enjineria. Ita mos bele haree iha estrutura kresimentu ekonomia ita nian iha ne’ebe seitor sira hanesan administrasaun publiku, servisu no konstrusaun mak sa’e, maibe seitor agrikultura no fabrikasaun kontinua hakdasak.

Ikus mai, ita nia ekonomia la’os ekonomia ne’ebé bazeia ba produsaun; ita nia ekonomia bazeia deit ba sirkulasaun osan petróleu no konsumu. Polítika makro ekonomia durante ne’e dala barak orienta ba iha konsumu públiku, Iha esperansa katak wainhira estadu gasta osan, sei kria ezizensia ba iha produsaun, no seitor privadu sei produz. Maibe ida ne’e la akontese. Saida mak akontese mak ita nia dependensia ba importasaun aumenta. No wainhira ekonomia laiha baze ba produsaun, agrikultor sira mak sei sofre, no ema kiak sira mak sei sofre at liu.

Kondisaun hirak iha leten ikus mai hamosu dinamika polítika ekonomia ida ne’ebé sei favorese elite oitoan iha urbana no marjinaliza maioria populasaun iha area rural. Ema oitoan ne’ebé iha asesu ba rekursu petróleu mak sei hetan oportunidade, sei kria ligasaun forte, no hetan rekursu ekonomia. Ida ne’e sei sai ameasa ba demokratizasaun nasaun nian. Wainhira interese politiku no interese ekonomia kahur hamutuk iha ema oitoan nia liman, demokrasia sei limiti deit ba iha eleisaun. Instituisaun politiku sira sei lakon ninia poder atu halo Check and Balance iha sistema polítika, maibé sei transforma sai kanal lori fahe rekursu ba malu, no kria ligasaun entre patraun no kleinte.

Iha nivel internasional, esperansa katak ‘uza petróleu lori dezenvolve seitor naun petróleu’ laos buat ne’ebé foun iha istoria dezenvolvimentu internasional. Dezde 1950-etal, wainhira teoria modernizasaun dopetróleu mundu, dalan ida atu dezenvolve nasaun terseiru mundu sira mak liu hosi explorasaun sira nia rekursu. Razaun simples. Petróleu sei fornese rendimentu ne’ebé boot; no hosi rendimentu hirak ne’e sei uza ba modernizasaun pais sira ne’ebé exporta petróleu.

Iha 1970, presu petróleu sa’e iha merkadu internasional. Pais sira ne’ebé exporta petróleu hetan rendimentu boot. Sira halo planu boot no ambisiozu. Sira halo expansaun ba birokrasia estadu nian. Sira halo planu ba projetu boot – mega project; hanoin katak presu petróleu sei mantein iha merkadu internasional. Infelizmente lae. Fim de 1980- etal, presu petróleu tun. Nasaun sira hanesan Mexico, Nigeria, no Indonezia tenki fila ba Instituisaun Finanseiru Internasional hanesan FMI no Banku Mundial lori deve. Ida ne’e kria dekadu ida ne’ebé ema haran “The Lost Decade” ba iha istoria dezenvolvimentu pais terseiru mundu sira.

Dadus empiriiku hatudu katak laiha país ida iha mundu ne’ebé konesege ultrapasa ne’e. Maski dala barak país ne’ebé depende ba exportasaun petróleu iha esperansa katak sei uza osan petróleu lori dezenvolve seitor seluk, buat ne’ebé espera katak petróleu nia konsekuensia satan netik kondisaun hirak ne’e’ebe presiza ba dezenvolvimentu ekonomia naun petróleu. Pais hanesan Norwergia no Australia la esperiensia ida ne’e tanba sira dezenvolve petróleu wainhira sira nia ekonomia moderniza tia ona no diversifikadu tia ona.

Ho realidade ne’ebé ita agora enfrenta, bazeia ba ita nia espriensia durante tinan hirak nia laran, no mos esperiensia pais sira seluk, hau hanoin katak dezafiu ne’ebé ita enfrenta laos iha nivel tekniku deit. Ida ne’e laos deit kona ba oinsa alokasaun orsamentu ba kada seitor, no oinsa halo projetu ne’ebé ho kualidade diak; no seluk tan. Maski sira ne’e sei kontinua sai nuudar dezafiu, prinsipal liu ba Timor mak oinsa atu muda modelu dezenvolvimentu no aproximasaun ba dezenvolvimentu. Ita presiza re-estrutura ita nia pensamentu kona ba papel seitor publiku iha sistema polítika ekonomia tomak, no oinsa petróleu kaptura tia ona sistema polítika ekonomia rai laran. Ita mos tenki iha korajem atu muda ita nia estrutura pensamentu kona ba ekonomia sem petróleu. Wainhira ita sei koalia kona ba ekonomia naun petróleu bazeia ba petróleu, ida ne’e sei la muda ita nia aproximasaun.* [Guteriano Neves | for TAFARA.ORG | 21.05.2016].

About Guteriano Neves

Leave a Reply

Your email address will not be published. Required fields are marked *