Thursday , November 23 2017
Home / Opini / Problema mak Arte Marsial ka mak Violensia?
Fernando Antonio da Costa [Ato "Lekinawa" Costa]

Problema mak Arte Marsial ka mak Violensia?

Loron hirak liuba, jornal STL (Suara Timor Lorosae, Edisi Segunda, 11 Abril 2016), nia headline tau titlu, “Lideransa Arte Marsiais La iha Nasionalizmu.” Jornal ne’e sita reprezentante povo nian ida, Manuel Gaspar, ne’ebe hateten katak, “Grupu artemarsiais ne’ebe governo bandu, halao fali sira nia atividade, ne’e sira nia lideransa ne’e mak la iha nasionalizmu no patriotizmu, tanba la kumpri rezolusaun ne’ebe mak governo fo sai.” Fulan rua liuba, iha Liquisa, Suco Leotela, iha 13 Febreiru, grupo rua baku malu iha merkadu uza katana. Iha insidente ne’e, ema nain ida mate, ida kanek todan, uma sanulu hetan sunu. Polisia konsege halo intervensaun no kaptura tiha suspeitu nain hat.

Iha akontesementu Likisa nian, no mos akontesementu sira seluk iha Dili no mos munisipiu sira seluk, media nasional, imprimi no radio, sempre halo deskrisaun hahu ho liafuan ‘arte marsial’ baku malu. Relatoriu ONG Belun nian mos fo sai katak insidente Likisa nian ne’e involve Grupo Arte Marsial. General Lere Anan Timur, iha ninia konferensia imprensa, fulan ida liuba, koalia ho makas no husu atu autor siguransa sira kaer lider arte marsial bainhira mosu violensia ne’ebe involve Grupu Arte Marsial sira.

Dala barak ne’e publik ninia hanoin media mak forma. No bele nota katak media Timor-Leste dala barak hakerek duni katak violensia publik ne’ebe akontese durante ne’e involve Grupu Arte Marsial balun mak halo. Lider sira mos fo sira nia kakutak ba kompania media sira atu ‘invade’ no kuda hanoin ne’ebe simplistiku liu. Sira haluha tiha katak joven ida laos deit gasta nia tempu ba aprende arte marsial sira, maibe mos buat diak seluk. Oinsa mak treinamentu arte marsial oras 6 semana ida bele kuda hahalok violensia, no eskola oras 20 ka liu semana ida labele kuda hahalok diak iha joven sira ulun no fuan? Entaun persija haree fila maneira buka solusaun ba problema ne’e bolu ka hanaran ‘arte marsial’ ne’e.

Bele fiar ka lae, maibe ita nia aprosimasaun ba problema determina ita nia solusaun ka rekomendasaun ba buka solusaun. Ezemplu bo’ot liu mak establesementu KRAM (Komisaun Reguladora Arte Marsial) no Rezolusaun Governo no.16 ne’ebe hasai iha 2013 hodi bandu organizasaun arte marsial 3, Kera Sakti, KORK, no PSHT. Rezolusaun ne’e halo tanba violensia oin-oin ne’ebe diskonfia involve organizasaun arte marsial 3 ne’e nia membru sira. Liu-liu tanba esforsu oin-oin ne’ebe koko halo ho organizasaun arte marsial sira, nunka hetan susesu. Juramentu hamutuk entre membru no lider organizasaun sira mos halo ona. Juramentu ne’ebe involve membru PNTL no F-FDTL ninian sira ne’ebe involve iha arte marsial mos halo ketak. Hafoin esforsu hirak ne’e hotu, violensia kontinua mosu.

Hosi ezemplu hirak ne’ebe temi ona, no konsidera katak esforsu sira ne’e mak dalan oin-oin, ne’ebe governo halo hodi buka solusaun. Governo ho autor seguransa sira nia aprosimasaun bazeia ba hanoin ida katak problema ne’ebe durante ne’e akontese tanba involvementu joven sira nian iha organizasaun arte marsial. Entaun foku ba solusaun mak organizasaun arte marsial. Aprosimasaun hanesan mos mosu iha ONG sira nia esforsu. Purezemplu, ONG Belun ninia peskija kona ba arte marsial ninia rekomendasaun mos foku ba organizasaun arte marsial.

Experiensia hatudu katak aprosimasaun ho ninia foku iha organizasaun arte marsial to’o agora seidauk hetan susesu. Signifka katak aprosimasaun hodi buka solusaun ba problema violensia ne’ebe akontese durante ne’e tenke muda. Relatoriu Belun nian rasik hatudu katak violensia bo’ot laos akontese entre membru arte marsial, maibe barak liu involve joven no estudante (bele haree relatoriu belun nian hosi 2014 to’o 2015 iha website http://www.belun.tl).

Se hanesan ne’e, entaun problema loloos ne mak saida? Violensia mak problema ninia abut, laos arte marsial. Arte marsial ne’e pratika desportu ida ne’ebe ho intensaun atu halo auto-defeza. Bainhira ema ne’e hola parte iha pratika arte marsial aprende ho didiak, no fo hosi treinador ne’ebe iha qualidade, ho sistema kontrolu ida diak ho estadu, sei ajuda ema ne’e atu hetan saude diak, fiar an liutan, no bele produtivu liutan iha ninia moris. Los duni, iha pratika arte marsial nia laran, iha lisaun kona ba tuku, tebe, uza instrumentu ataka no salva an ho maneira oin-oin. Tekniku sira ne’e hotu hanorin ho intensaun atu ema ida-idak bele salva nia an uza tekniku ne’ebe nia aprende. Maibe konsiderasaun persija fo mos ba tendensia hodi uza tekniku sira ne’ebe aprende atu halo ataka ba ema seluk, laos deit atu defende an. Maibe tendensia ida ne’e bele akontese mos ba disiplina sira seluk. Maski guru/profesores hanorin buat diak maibe alunu bele uza sala saida mak professor hanorin.

Hosi insidente violensia lubuk ida ne’ebe publika iha media no rezultadu peskija sira, la iha ida mak indika ka fo sai katak prepetador sira uza tekniku arte marsial nian hodi ataka malu. Ezemplu hosi akontesementu iha Likisa, iha fulan Febreiru nian, prepetrador sira ataka malu ho katana no sunu uma. Ataka malu ho katana bele konsidera nudar indikasaun ida katak prepetrador, karik uza teknik ruma iha arte marsial nian. Maibe ne’e mos persija haree fali oinsa maneira sira uza katana hodi taa malu. Tanba ita nia sosiedade ne’e, membru komunidade sira sempre uza katana ba to’os, no sira hatene oinsa mak atu taa ai ka taa nan ho diak. Ida ne’e la persija aprende hosi mestre arte marsial ruma. Maibe sunu uma? Ne’e la hatene klube arte marsial ida ne’ebe mak hanorin teknik ida ne’e. Konserteza ne’e laos lisaun arte marsial nian.

Bele mos konsidera katak uza forsa fiziku nudar pratika ida ne’ebe hanorin iha arte marsial. Maibe persija mos rekoinese katak uza forsa fiziku laos deit hanorin iha klube arte marsial sira, maibe mos hanorin iha uma, eskola, klube desportu seluk, polisia no militar nia fatin. Iha eskola ka iha uma, professor/inan-aman baku alunu/oan ho razaun katak ne’e hanorin ka atu fo disiplina. Iha desportu, liu-liu modalidade arte marsial sira, hanorin mos kona ba oinsa mak uza forsa hodi manan oponente. Iha polisia no militar, violensia mak buat ida ne’ebe sira aprende hodi hasoru inimigu ka mantein lei no orden, bainhira nesesita. Nune’e, pratika uza forsa fiziku hodi proteze an ne’e lisaun ne’ebe ema barak aprende no pratika. Problema mak ema uza sala forsa fiziku ne’ebe sira iha hodi hakanek ka halo susar ema seluk nia moris.

Persija tau iha konsiderasaun katak Lei ba Arte Marsiais no.10/2008 fo importansia ba pratika arte marsial. Lei ne’e nia preamblu rekoinese katak “Pratika hosi atividade arte marsial iha Timor-Leste iha importansia social no kultura ba populasaun, liu-liu entre joven sira, no ninia hanorin sira iha intensaun atu transmiti valores no prinsipius fundamentais ba ema sira ne’e pratika.” Ne’e signifika estadu Timor-Leste rekoinese valores pozitivu hosi arte marsial nian. Peskija desportu barak ona mak komprova transmisaun valores no formasaun karakter hosi involvementu joven sira nian iha atividade arte marsial. Rekoinesementu iha lei ne’e fo vantajen ba dezenvolvimentu arte marsial nudar desportu. Maski nune’e lideres barak kontinua haree Grupu Arte Marsial sira, nudar ameasa bo’ot ba nasaun.

Solusaun diak liu ba problema violensia durante mak hapara asaun no attitude violentu, iha eskola, iha publik, iha media visual sira no iha uma. Importante liu, atu hakotu sirklu violensia ne’e mak persija iha aprosimasaun structural. Signifka persija taka dalan hotu-hotu ne’ebe loke opurtunidade ba violensia hodi akontese, tuir dalan structural ninian. Iha dalan ida ne’e, mosu fiar ida katak, violensia la mosu mesak, violensia akontese tanba kauza social, kultura, ekonomia no relasaun ho poder. Iha structural approach ema labele foku deit ba vitima maibe mos ba prepetrador sira. Ne’e atu komprende oinsa prepetrador aprende no halo violensia.

Ba violensia sira ne’ebe akontese durante ne’e, dala barak liu, akontese iha joven sira nia let. Analizador balun dun ba familia nudar edukador ne’ebe falla, balun fali dun ba eskola, tan la konsege hanorin ho diak. Maibe responsabilidade bo’ot liu ba hakotu sirklu violensia ne’e mak estadu. Iha estadu Timor-Leste, opurtunidade ba violensia publik bo’ot teb-tebes. Bele nota katak populasaun aumenta ba bebeik, liu-liu numeru populasaun juventude nian. Eskola sira ladun fo opurtunidade atu joven sira atu aprende ho diak no aprende la uza/imita violensia. Opurtunidade ekonomia sei menus los, maibe joven sira tama ba forsa traballu 15 mil to 20 mil kada tinan. Presaun ekonomia hatodan moris familia nian, no halo todan liutan relasaun ema ho ninia rekursu naturais. Numeru ema aumenta maibe numeru ai-han la aumenta no numeru rai la aumenta.

Situasaun sira ne’e hotu sei kontinua la diak, bainhira estadu seidauk iha kapasidade naton hodi hatan ba nesesidades baziku ema hotu ninian. Aat liutan, ho kondisaun social ne’ebe frajil hanesan ne’e, estadu ninia foku dezenvolvimentu ba fali area infraestrutura duke area social (edukasaun, saude, no nesesidades baziku sira seluk). Dalan uniku hodi hakotu violensia arte marasial no violensia publik sira seluk ne’e durante ne’e akontese mak hadiak hikas maneira/approach hodi responde ba violensia arte marsial. Simplis liu, tuir dalan structural ida mak hadiak sistema edukasaun. Halo luan definisaun edukasaun, labele limiti deit ba eskola, maibe mos ba klube desportu sira. Estadu persija obriga atu edukasaun desportu hotu-hotu persija iha kurikulum hanorin nian, inklui klube arte marsial sira. Kurikulum hotu-hotu persija hetan aprovasaun hosi Ministeriu Edukasaun antes hanorin. Dezenvolve sistema kontrolu ida hodi garante katak sistema aprendizajen iha klube ka organizasaun desportu sira tuir duni standar edukasaun ne’ebe estadu termina.

Timor-Leste persija iha edukasaun ida diak, ho qualidade, asesivel, inkluzivu no halo ema kore-an hosi ukun ladiak nian mak dalan ida ba hakotu violensia. Persija kria ambiente moris komunidade inan ne’ebe edukaitivu mos hodi halo edukasaun sai buras liutan. Tan maioria joven sira, laos moris too bo’ot no dezenvolve an iha eskola deit, maibe mos iha komunidade no ambiente ne’ebe joven sira hola parte ba. Hadiak ka kria ambiente ne’ebe edukativu ba joven sira, liu-liu bainhira sira la tama ba edukasaun formal nian (eskola, asosiasaun siviku, no klube desportu) mak dalan holistiku hodi hases joven sira hosi hahalok la siviku, inklui hases sira hosi violensia.*


** Ativista RENETIL iha Dili

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Timor-Leste no Australia Aseita Malu Ona ho Textu Tratadu

Statementu imprensa ne’ebe hasai hosi Permanent Court of Arbitration iha Hague, 15 Outubru 2017 hatete …

Leave a Reply

Your email address will not be published. Required fields are marked *