Monday , March 25 2019
Home / Eleisaun Parlamentar / ParPol No Koligasaun Partidaria Fiar Ba Militante No Simpatizante Sira, Mantein Paz No Estabilidade.
Fretilin, PR, PD no PEP bainhira halo juramentu konaba Paktu Unidade Nasional iha CNE. [Foto: Maria do Ceo | 07.04.2018]

ParPol No Koligasaun Partidaria Fiar Ba Militante No Simpatizante Sira, Mantein Paz No Estabilidade.

Iha loron importante ne’ebe mak povu hotu sei partisipa, liu loron eleisaun antesipada parlamentar 2018. Iha loron 7/04 partidu politiku sira ne’ebe kompostu hosi partidu Fretilin, PD, PR, PEP no koligasaun partidaria ne’ebe kompostu hosi AMP, FDD, MDN no MSD hamutuk asina Paktu Unidade Nasional [PUN] hodi halo komprimisu eleisaun pasifika.

Ba TAFARA.TL reprezentante partidu Frente Revolucionariu Timor-Leste Independente [FRETILIN], Francisco Branco hateten bainhira FRETILIN moris mai apela ona kona-ba unidade nasionál.

“Fretilin nia kultura polítika desde uluk kedas, bainhira nia moris mai iha Timor-Leste nia apela ba unidade nasionál tamba laiha unidade nasionál mak laiha independensia. Tinan 24 hatudu duni katak iha unidade nasionál ida ne’ebé metin, ne’e mak bele hetan fila fali ita nia independensia ne’ebé proklama iha 28 Novembro 1975 i agora iha faze ida ne’ebé ita restaura ita nia independensia, unidade nasionál ne’e sei importante nafatin atu timoroan sira fó liman ba malu, ka’er metin liman hodi halo dezenvolvimentu ba oin”, tenik Francisco Bianco.

Branco mós hatutan maske iha hanoin la hanesan, maibé ida ne’e la’os Timoroan sira atu se kotuk ba malu, ida ne’e diferensas ideias, diferensa hanoin, ne’e riqueza ida kompleta malu iha prosesu dezenvolvimentu nasionál, ne’ebé hotu-hotu mak tenki sai fator determinante. Ida-idak mak sei hakiak paz no estabilidade no povu hatudu ona ninia maturidade, lider sira mak tenki aprende fali husi povu, lider sira mak kuidadu sira nia ibun, labele hamanas situasaun tamba povu hatudu tiha ona situasaun ida di’ak tebes, hodi fó edukasaun sívika ba lider sira no hatudu ba mundu katak povu ida ne’e nakonu ho maturidade polítika no nia hatene duni saida mak demokrásia.

Iha sorin seluk, reprezentante Partido Repúblicano [PR], ne’e partisipa hodi asina paktu, ba TAFARA.TL hateten husu ba lideres partidu polítiku hotu, atu fó hanoin ba ninia militante no simpatizante sira hotu, simu rezultadu eleisaun ne’ebé mak sei mai hakmatek, liu husi determinasaun votu povu nian.

“Ita bele hala’o ita nia papel nu’udar partidu polítiku, ita bele influensia ita nia militantes no apoiantes sira para bele hatene klean liu politika iha rai laran no ita bele simu rezultadu bainhira eleisaun ne’e remata ho neon no laran di’ak, saida mak povu sei fo ba partidu ida-idak. Partidu PR hakarak apela ba povu Timor Leste liu-liu ba militantes no simpatizantes PR ninian hakarak hameno katak tenke garante paz no estabilidade iha rai laran,” konfesa Prezidente (PR) ba jornalista TAFARA.TL iha CNE, Dili.

Iha fatin hanesan prezidente Partido Democrático (PD), António da Conseiçãon hateten ohin partidu politiku hotu halo komprimisu ona lori ba objetivu hamosu nafatin estabilidade iha ita nia rai no sertamente partidu politiku nia papel importante tebes oinsa mak bele asegura estabilidade, tanba ne’e mak husi PD hakarak fo mensajen ba eleitoradu, militantes no simpatizantes PD nian, atu bele fo nafatin sira nia respeitu ba komprimisiu ne’ebé ohin PD tabik hamutuk ho partidu sira seluk no koligasaun sira seluk, ne’ebé asina atu bele nafatin onra no bele mos tau iha pratika hodi nune’e bele hatene ko’alia ba malu.

Iha hanoin hanesan hosi reprezentante lider Aliança Mudança para o Progresso (AMP), Fidelis Magalhães hatoo katak dezenvolvimentu la iha sem paz no estabilidade, “Ita hotu, partidu polítiku, sidadaun hotu iha dever atu garante paz no estabilidade. Destinu nasaun iha ita nia liman no ita hotu hatene katak halo buat sira hotu ,hari partidu polítiku, “ka’er governu no servisu iha parlamentu ne’e atu halo ba bem estar povu nian. Bem estar povu nian ne’e ita bele konkista se ita garante paz no estabilidade”.

Fideles realsa katak sira nia militante sira sempre koko ho esforsu tomak, atu eduka sira para atu promove paz no estabilidade. Sira sempre koko iha kualker oportunidade, sira fó mensajen paz no mensajen importante kona-ba harmonia sosiál no estabilidade iha Timor-Leste.

Iha serimónia ne’e partisipa husi lia nain munisipiu 12 no Rejiaun Espesiál Autonómia Oecusse Ambeno (RAEOA), Policia Nacional Timor-Leste (PNTL), Falintil Força Defesas Timor-Leste (F-FDTL), membru estadu, membru Parlamento Nacional no lider ParPol husi partidu no koligasaun ne’ebé mak sei compete iha Eleisaun, sosiadade sivil, veteranu korpu diplomatiku no agensia internasional sira, ne’ebe halao iha salaun Larigutu CNE. * [ Maria do Ceo | Editor: Zevonia Vieira | TAFARA.TL | 07.04.2018 ]

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *