Saturday , May 26 2018
Home / Sosial & Politika / Partidu 5 Konkorda Ho Prospota Data Eleisaun 12 Maiu, Alcino: PR Sei Dekreta Loron EA
Prezidente da Republika, Dr. Francisco Guterres Lú Olo, halo enkontru ho CNE, STAE no partidu politiku lima ne'ebe hetan asentu iha PN. [Foto: Media PR | 07.02.2018]

Partidu 5 Konkorda Ho Prospota Data Eleisaun 12 Maiu, Alcino: PR Sei Dekreta Loron EA

Partidu lima Fretilin, CNRT, PLP, PD no KHUNTO hasoru malu ho Prezidente da Republika, CNE no STAE hodi deskuti konaba kalendariu ba eleisaun antesipada.

Hafoin remata enkontru, Prezidente bankada PLP, Fidelis Magalhaes ba jornalista sira hateten, liu hosi ekontru ne’e konkorda ho proposta hosi CNE ho STAE liga ho kalendariu ba eleisaun antesipada, “ami hanoin data ne’e diak no naton para bele organiza eleisaun ne’ebe moos, transparente no eleisuan ne’ebe lao ho profesionalismu duni no diak liutan kompara ho eleisaun sira ne’ebe lao ona iha tinan kotuk liu ba”.

Iha tempu hanesan Prezidente Partidu Demokratiku, Mariano Sabino ‘Asanami’ mos prontu simu kalendariu ne’ebe Prezidente da Republika sei dekreta. Asanami husu ba inan aman sira atu bele ezerse funsaun nudar sidadania, “ukun ne’e imi nian, agora fo fila fali ba povu. Eleisaun antesipada ne’e tenke provoka dezafiu ba ita hotu, para hamrik ezerse ita nia funsaun nudar ukun nain”.

Hanesan mos hosi partidu CNRT, ba jornalista sira, iha palacio prezidensia 07/02, Prezidente Conselho Dirativa Nasional [CDN], Dionisio Babo hateten apresia ho Prezidente da Republika, ne’ebe bolu partidu politiku sira hodi deskuti kona ba kalendariu no iha prinsipiu konkorda ho data eleisaun ne’ebe Prezidente da Republika sei dekreta.

Partidu KHUNTO mos konkorda ho desizaun ne’ebe mak Prezidente da Republika fo, “ohin ami partidu politiku sira hotu, atu bele mai konsentra hamutuk iha ne’e, hodi koalia data fixu eleisaun antesipada nia, “partidu KHUNTO garante estabilidade no paz ba iha eleisaun antesipada ne’e sei mai”.

Iha hanoin hanesan hosi partidu Fretilin, ba jornalista sira Adjuntu Sekretariu Jeral, Jose Reis hateten partidu hotu-hotu laiha objesaun ida konaba data ba eleisaun antesipada, hare tuir prosesu prosidementu teknika ne’ebe mak prepara hosi CNE no STAE, hamutuk ho Prezidente da Republika hodi halo reuniaun ne’ebe tuir prosesu legalmente no hare ba paskua ne’ebe sei akontese iha fulan Marsu no Abril, ho argumentu sira ne’e , “ami laiha objesaun”.

Hosi enkontru refere, Prezidente Comisaun Nasional Eleisaun [CNE], Alcino Barris informa ba jornalista sira katak iha semana kotuk CNE no STAE hasoru malu ho Prezidente da Republika, hodi husu hanoin ne’ebe ideal no data ba eleisaun.

“Proposta ideal hosi CNE no STAE ne’ebe aprezenta sei realia iha loron 12 Maiu, ida ne’e ideal proposta ba loron eleisaun nian no Prezidente da Republika sei tetu fila fali, no ohin hasoru malu ho partidu politiku sira no ami ajuda Prezidente da Republika hodi klarifika fali, no partidu politiku lima ne’ebe hetan asentu iha parlamentu nasional, sira hotu aseita. Data ne’e sei proposta, Prezidente da Rpeublika mak iha komptesiaun atu foti desizaun no dekreta”, hateten Alcino Barris. *[Zevonia Vieira | TAFARA.TL | 07.02.2018]

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Ran Ema Ida nian, Sei Salva Ema Ida nia Vida

Importante ida ba hau, e hau bele salva hau nia an mos no mos bele …

Leave a Reply

Your email address will not be published. Required fields are marked *