Saturday , November 17 2018
Home / Sosial & Politika / Partidu Tolu Asina Plataforma Aliansa Maioria Parlamentar
Partidu PLP, CNRT no KHUNTO asinal plaraforma politika maioria parlamentar. [Foto: Zevonia Vieira | TAFARA.TL | 12.10.2017].

Partidu Tolu Asina Plataforma Aliansa Maioria Parlamentar

Partidu opozisaun tolu PLP, CNRT no KHUNTO asina Plataforma Politika Aliansa Maioria Parlamentar (AMP). Presidente CNRT no Presidente PLP la asina dereitamente dokumentu plataforma ne’e.

Liu hosi asina plataforma hamutuk iha Hotel JL Vila, loron 12/10, tuir kontiudu hosi asina akordu ne’e katak ho visaun atu reafirma intensaun politika partidus politikus ne’ebe forma AMP, hodi serbi povu no nasaun ne’e ho diak.

“Haree ba situasaun atual, governo ida ne’e la ho apoio maioria parlamentar sei hetan difikuldades hodi hamosu no implementa ninia programa ho diak tanba karese forsa politika, nune’e tau em causa dezenvolvimentu pais ne’e nian.”

Tanba ne’e mak Partidu Politika sira ne’ebe latama iha Koligasaun Governamental desidi hamosu politika ida hodi promove moris diak ba ita nia povu hodi hametin estabilidade nasional.

Intensaun hari AMP tuir Prinsipius Fundamentais Konstituisaun RDTL nian ne’ebe konsagra ona iha Artigo 1 to’o 15. Tau mos konsiderasaun ba Planu Estratejiku Dezenvolvimentu (PED) 2030.

Tuir dokumentu ne’e dehan katak Objetivo Principal hosi Plataforma ne’e maka, “Lori Povo Timor-Leste ba Moris Diak Liu Hosi Promove Dezenvolvimentu Ida Ne’ebe Fahe Rekursu no Opurtunidade Hanesan”, ho ninia  stratejia 20. Plataforma ida ne’e mak sei sai Mata Dalan Ba Dezenvolvimentu iha 2017 – 2022.

Plataforma ne’e asina hosi Presidente Bankada tolu (CNRT, PLP, no KHUNTO) no visto hosi Presidente Partidu 2 (CNRT no PLP) no mos hosi Konseleiru Superior KHUNTO. Maibe Presidente CNRT no PLP rasik la asina dereitamente dokumentu ne’e.

Bainhira TAFARA.TL halo konfirmasaun kona ba iha konyesementu hosi Prezidente CNRT, Xanana Gusmão ba asina plataforma ohin loron?

Prezidente Bankada CNRT, Deputadu Arão Noe de J. da C. Amaral esplika katak bankada partidu CNRT iha Parlamentu Nasional, halao kna’ar laos halo nia kna’ar rasik, katak bankada halo tuir politika partidu nian, bazea ba orientasaun partidu.

“Agora asina dadauk ne’e ho konnesementu strutura nasional partidu CNRT nian, hanesan Comisaun Politika Nasional (CPN) CNRT, ne’e Prezidente CNRT iha laran”, esplika Arão.

Hatan ba TAFARA.TL nia perguntas liga ho prinsipiu PLP ne’ebe luta hasoru pensaun vitalisia no sai prinsipiu fundamental, PLP sei kontinua luta maske halo koligasaun ho CNRT?

Fidelis responde katak presiza konsentrasaun politika no PLP fiar CNRT mos prontu sei apoiu ida ne’e.

“Ne’e politika no ami sei eforsu an no ami fiar katak CNRT sei apoiu”, hateten Fidelis.

Liga ho Negosiasaun Fronteira Maritima, Xanana Gusmão sai nudar Xefe ba Negosiasaun no reprezenta hosi Governu Timor-Leste, karik ho politika ida ne’e bele impede negosiasaun refere?

Fidelis esplika katak Maun Boot Xanana Gusmão reprezenta Estado do Timor-Leste no nia alta do autoridade.

Hatan ba perguntas hosi TVTL konaba pasu saida mak AMP sei halo, ligadu ho programa VII Governu ne’ebe sei apresenta iha plenaria? Prezidente Bankada hatan katak, partidu tolu iha ne’e tanba hahu ho faze naruk ida. Faze ida nia fundamentu alijerse ba prosesu ne’e mak respeita malu, hakarak diak ba Timor-Leste.

“Ami rona malu, ami koalia ba malu ho laran nakloke ho respeita hamutuk tanba ne’e mak ami to iha ne’e. Ba oin mos ami sei deskuti ho komponentes hotu, entre ami no ho partidu sira seluk, hodi bele lori solusoens ne’ebe diak ba Timor-Leste”, hateten Fidelis.* [Zevonia Vieira | TAFARA.TL | 12.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *