Friday , September 21 2018
Home / Sosial & Politika / Partidu Tolu Asina Plataforma AMP
Sekretariu Jeral CNRT, Francisco Kalbuady, Prezidente PLP Taur Matan Ruak no Konselho KHUNTO Naimori asina plataforma AMP. [Foto: Zevonia Vieira | 22.02.2018]

Partidu Tolu Asina Plataforma AMP

Aliansa Mudansa ba Progresu [AMP], ne’ebe kompostu hosi partidu tolu CNRT, PLP no KHUNTO, asina plataforma liu hosi konferensia nasional, ne’ebe ho motto hamutuk hametin nasaun. Liu hosi deklarasaun konjuta, ne’ebe halao iha CCD, 22/02 ho objetivu principal mak halo harmonizasaun ba rezultadu konferensia nasional kada partidu nian. CNRT, PLP no KHUNTO halao ona konferensia nasional ne’ebe mak involve strutura partidu iha nivel nasional, municipiu no posto administrative hodi deskuti no desidi formatura aliansa lao hamutuk iha prosesu tomak eleisaun antesipada.

“Harmonizsaun politika partidus ho nia atributu uniku, hakotu ho rezolusaun ne’ebe aprova ona hosi konferensia sira, hosi partidu tolu ne’ebe involve iha AMP mak hanesan afirmasaun rezultadu hosi rezolusaun kada partidu nian ba konferensista konferensia nasional AMP, depois konferensia nasional partidu idak-idak, hodi lao hamutuk iha linna orientasaun politika ida deit ho naran Aliansa Mudansa ba Progresu [AMP]. Halo aprovasaun ba logo ka emblema no bandeira AMP nian, nudar rekizitus propriu tuir Lei eleisaun parlamentar. Halo komprimisiu politika liu hosi plataforma AMP ho objetivu atu hametin sistema demokrasia, formasaun politika atu asegura governasaun foun ne’ebe forte no estavel ba periodu 2018-2023”, esplika Portavos AMP, Taur Matan Ruak, liu hosi konferensia imprensa.

Iha tempu hanesan sekretaria ba iha konferensia nasional refere, Maria Terezinha Viegas lee akta ba konfrensista sira katak, objetivu hosi koligasaun hosi partidu politiku ida ne’e, sei halao tuir prinsipiu estadu ba direitu demokratiku, prinsipiu hodi kumpri Konstituisaun, tratadu konvensaun internasional, prinsipiu ba interese nasional, prinsipiu ba promasaun paz no estabilidade social, prinsipiu respeitu instituisaun hosi orgaun soberania sira hotu, prinsipiu ba dialogu instituisional, prinsipiu ba identidade rasik hosi partidu politiku idak-idak ne’ebe forma koligasaun.

Tuir esplikasaun hosi akta ne’ebe aprezenta hosi Maria Terezinha Viegas katak CNRT, PLP no KHUNTO konsidera, liu hosi formasaun AMP, hanesan partidu politiku ne’ebe halo ona akordu ida ne’e, katak atu promove siklu politiku foun ida ne’ebe kapas, hodi asegura paz, estabilidade no dezenvolvimentu ba Timor-Leste. Atu konkritiza objetivu ne’ebe AMP propoin depende ba formasaun governu ne’ebe forte no hetan apoio hosi maioria parlamentar, ne’ebe ho motivasaun no determinasaun hodi promove dezenvolvimentu iha rai laran, no hadia kondisaun moris ba povu Timor no konsilida instituisaun demokratika, hodi garante respeitu ba Konstituisaun Republika Demokratika Timor-Leste.

Maria Terezeinha esklarese liutan katak liu hosi Dekretu Prezidente da Republika numeru 5/2018, 26 de Janeiru, Xefe Estadu dissolve ona parlamentu nasional, hodi loke dalan ba eleisaun antesipada.

“Partidu politiku ne’ebe forma AMP no asina memorandum ida ne’e, kontinua ho firmi, kontinua servisu hamutuk hodi kria kondisaun ba estabilidade no ba governu ne’ebe nesesariu, hodi promove progresu iha nasaun no ba povu. Formasaun ba partidu tolu ne’e nakloke ba partisipasaun obras propriodade seluk, ne’ebe kapas hodi dezenvolve no aprezenta programa politiku diak, hodi fasilita mudansa no progresu, bazea ba valores liberdade nian, ba justisa, ba solidaridade, no fo responde positive ba apelu maun Xanana nian”, esplika Maria Terezinha

Iha akta ne’ebe aprenzenta, esplika mos kona ba lista kandidatura ba eleisaun, liu hosi akordu ne’ebe partidu tolu halo, hodi aprezenta lista konjuta ida no unika konaba kandidatu deputadu ba parlamentu nasional. Lista kandidatu ba iha parlamentu nasional, CNRT nomeia numeru kandidatu 19, PLP nomeia 18 no KHUNTO nomeia 18, hodi ajusta ba lista 35 kadeiras ne’ebe agora dadauk iha hela parlamentu nasional. Ordem ba kandidatu hosi AMP, eskolha hosi konsensu direjente masimu partidu politika sira ne’ebe asina iha akordu koligasaun ne’e.

Liu hosi konferensia imprensa hatan ba media TATOLI konaba AMP sei lao ho lista proposional?

Portavos AMP, Taur Matan Ruak hateten, pasu ida ne’e iha buat rua, premeiru 35 kadeiras ne’ebe desidi ho konsensus katak CNRT ho 22 kadeiras, PLP 8, KHUNTO 5, tuir mai hahu hosi 36 ba to 90 hamutuk 55, katak CNRT 19, PLP 18 no KHUNTO 18.

Iha plataforma ne’e mos deklara katak obriga atu nomeia pelumenus kandidatu ida hosi femeninu ka feto, iha kada grupu, hosi kandidatu tolu ne’ebe iha, hodi integra ba lista kandidatura ba eleisaun parlamentu nasional.

Tuir observasaun hosi TAFARA.TL, iha konferensia nasional AMP nian, hetan partisipasaun hosi observador nasional no internasional, korpu diplomatiku no partidu aliadu sira. *[Zevonia Vieira | TAFARA.TL | 22.02.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus

“Estadu tenke haree oinsa mak bele asegura finansiamentu ba despeza públika liu hosi reseitas hosi …

Leave a Reply

Your email address will not be published. Required fields are marked *