Friday , November 24 2017
Home / Patriota / Bylah: Partisipa Asaun 12 Novembru Ho Inisiativa Rasik
Maria Marilia Ximenes Castro de Oliveira da Costa [Bylah] - Sobrevivente Massacre St. Cruz 1991 [Foto: Koleksi Pribadi]

Bylah: Partisipa Asaun 12 Novembru Ho Inisiativa Rasik

“Hau la halai tama ba simeteriu laran, hau iha rate nia oin deit, no halai duni maibe monu tama ba rai kuak ida. Rai kuak ne’e ema ke’e hela ba halo konstrusaun. Maluk sira seluk mos monu tun ba rai kuak ne’e, no hanehan iha hau nia leten. Hau konsege obriga an sai duni hosi rai kuak ne’e no kontinua halai.”

Ne mak Bylah, ho naran kompletu Maria Marilia Ximenes Castro de Oliveira da Costa, oan ba dala 9 hosi Madalena da Costa Ximenes no Gaspar de Oliveira da Costa (Matebian ona) hanoin hikas istoria pedasuk ida ne’ebe nia halo tiha hodi hatudu ninia kontribuisaun ba luta ukun rasik an nian hodi konta ba Jornalista TAFARA.ORG. Nia laos ema ida mak tama iha organizasaun klandestina nian ruma iha tempu akontesementu Masakre Santa Cruz ne’e. Nia desidi partisipa iha demonstrasaun ne’e ho ninia inisiativa rasik.

Bylah mak feto ida ne’ebe konsidera ‘bandel’ uituan iha ninia familia. Sempre hakarak halimar mak barak, ransu ho nia vizinnu nomos ho kolega mane sira, no lakohi halo servisu uma nian. Hosi ninia ibun rasik nia dehan katak, “hau nunka tein dezde Ensinu Baziku to’o Ramata Sekundariu. Hau badiu sae biskleta, halimar boracha no haksoit tapa.” Hahalok moris ida ne’ebe iha diferente barak ho labarik feto sira iha tempu ne’eba. Maski nune’e, Bylah hatete hosi ransu no halimar sira nia aprende kona ba moris, halo komparasaun moris hosi familia ida ba familia seluk.

Hahu hosi SMP Bylah komesa iha ona sientementu la gosta ‘bapa’ (ema Indonesia). Sientementu la gosta ne’e evolve liu hosi haree hahalok javanes (ema Indonesia), liu-liu ‘Tentara’ ne’ebe halo Timor oan barak la lao livre. Bylah dehan katak, “iha tempu ne’eba atu lao ba ne’ebe Tentara tau matan, la’ bebas’ no la seguru.” Nia refleta katak hahalok ida ne’e mak halo ninia la gosta ba ‘bapa’ sai makas liutan. Liu-liu bainhira kompara ho Indonesia nia oan sira ne’ebe sempre hetan prioridade liu.

Liafuan ne’ebe Bylah hamutuk ho ninia kolega sira uza bebeik iha tempu ne’eba mak ‘kapan pulang’. Tradus ba Tetun dehan ‘bainhira mak fila’. Liafuan simplis maibe iha sintidu bo’ot bainhira Timor oan ida dehan ba ema Indonesia ida, liu-liu ba tropaz Indonesia sira. Nia hatete katak, “ami sempre hatete liafuan ‘kapan pulang’ ne’e ba ‘bapa’ sira. Sequandu iha problema ruma ho sira (bapa) ami sempre dehan liafuan ne’e ba sira.” Tuir Bylah dehan katak bainhira ema Indonesia rona liafuan ne’e sira satiadu no hirus. Tan ne’e hanesan atu duni sira sai hosi Timor.

Durante eskola iha STM (Sekolah Teknologi Menengah), Becora, Bylah kontinua halo kolega ho ninia maluk mane sira. Eskola ne’e rasik mane mak barak liu. Iha klase ida ne’ebe Bylah eskola ba iha feto nain 2 deit, nia ho nia kolega ida. Hosi ninia kolega mane sira, nia rona kona ba istoria klandestina nian, inklui sientementu la gosta prezensa Indonesia nian.

Besik ba loron 12 Novembru, Bylah mos kontinua rona kona ba preparasaun oin-oin. Nia rona ninia primu no maun sira koalia kona ba halo spanduk maibe laos koalia ba Bylah diretamente. Bylah mos dehan katak ninia kolega eskola sira mos komesa koalia kona ba demonstrasaun ne’e, maibe sira koalia mes-mesak deit. Refleta fali ba tempu ne’eba Bylah haktuir, “iha tempu ne’eba, iha eskola ami sei izame hela, 12 de Novembru mak loron izame ikus nian. Hau sei hanoin hetan tempu ne’eba hau nia izame kona ba ‘Gambar Teknik Listrik’. Karik tanba kolega sira lakohi involve hau, entaun sira koalia mes-mesak. Maibe hau hatene ona kona ba demonstrasaun ne’e. Hau nia laran rua-rua los, hau ba tuir izame ka ba tuir demonstrasaun? Se la tuir izame hau la pasa karik. Hau nonook deit, hau lakoi hatete katak hau ba ka la ba tuir demonstrasaun.” Ikus mai Bylah desidi atu halo buat rua ne’e hotu, ba tuir izame depois ba tuir demonstrasaun. Ne’e diferente ho demonstrante sira seluk ne’ebe balun hili la ba tuir izame, no tuir deit demonstrasaun.

Nudar feto no nudar joven ida, Bylah iha duni determinasaun ne’ebe bo’ot. Dader sedu deit, molok loron matan fo naroman maka’as iha kalohan Bylah bo’ok an hodi prepara ba eskola. Bylah konsege ba duni eskola tanba tau tauk la pasa klase. Maibe to’o iha eskola la iha ema ida iha ne’eba. Entaun Bylah fila lalais ba uma truka tiha roupa depois halai ba sae bis hodi ba Motael. To’o iha Motael misa hotu ona, Bylah mos tama lao hamutuk ho ninia kolega sira seluk ba to’o Santa Cruz. Hanoin hetan tempu sai hosi Motael ninian Bylah hato’o, “tempu ne’eba nee hau ba mesak no hau sae bis mak ba, hau ba ema komesa forma ona no hau tama kedas ba laran. Hau seidauk hetan kolega sira, hau lao lao to liu tiha uituan Palacio (uluk Kantor Gubernur) mak hau foin hetan kolega sira hanesan Ato (agora dadaun nudar katuas ona), Joao (Choque), kolega STM sira, no komesa hetan malu ho kolega sira no lao dadaun ba. Ami la husu malu mai ho se, no kaer spanduk ba dadaun ona. Tempu ne’eba ne’e situasaun ativu los, no ema hotu hetan ita dehan tama deit, sambil lao reza hakilar. Hau la lori buat ida, hau ba tanan deit, tama to laran no hetan tiha kolega sira mak foin kaer spanduk hamutuk no hakilar dadaun dehan “viva Fretilin, Viva Xanana no hakilar Viva mos ba matebian Sebastiao nia naran.”

Bylah nota katak besik ba Kantor Kodim nian (agora ne’e ACAIT) mosu situasaun disorganizadu uituan. Ema balun lao lalais, balun halai maibe balun kontinua lao reza no hakilar viva nafatin. Bylah haktuir katak, “Situasaun ne’e halo hau tauk parmate, maibe haree ba kolega hotu-hotu ne’ebe partisipa nafatin, ita semangat nafatin.” Maski nune’e hamutuk ho joven sira seluk, Bylah kontinua lao iha linna laran hodi to’o ba iha simiteriu Santa Cruz. Ikus mai mak Bylah rona katak bo’ot ‘Tentara’ Indonesia nian ida hetan sona iha besik ‘Kantor Kodim’ nian ne’e.

To’o iha simiteriu Santa Cruz, Bylah hamrik hamutuk ho Joao Choque, ho kolega sira seluk, iklui Sico Binaraga (Joao Choque nia maun) no kolega Ana (uluk hela iha Santa Cruz – besik Restorante Ayam Goreng) iha ‘pertigaan’, dalan sae ba Santa Cruz no Bemori, Joven barak mak hamrik ona iha simiteriu nian hodi hakilar no hasae ‘spanduk’ ho hakerek oin-oin. Iha tempu hanesan, joven barak mak hakilar no goja tropaz Indonesia sira ne’ebe halai tun dadaun hosi ponte no estrada rate semitériu Indonesia nian tun mai. Hanoin hetan momentu ne’eba Bylah haktuir, “too iha rate ami hamriik kedas iha ‘pertigaan’ nian ne’e, no hau ho kolega Joao Choque mak goza duni bapa sira dehan ‘kapan pulang’, hamutuk ho maun Chico ‘Binaraga’ no hau nia kolega Ana. Lakleur ema komesa tiru ‘peringatan’ no kontinua rajada mai, mak ami komesa halai ona. Kilat musan mai hanesan batar musan, no ami la hetan malu ona. Hau hakilar buka se-se mos la hetan malu ona, tamba ema hotu halai namkari, tanis hakilar no halai nafatin.”

BYLAH ho ninia familia: Moreno Liberto, Ato Costa, Khalifa Lovito, Zenero Laloran, Bylah no Delano Loriley. [Foto: MC. Moniz]

Joao da Silva, koinesidu ho naran Joao Choque, konfirma katak nia lao hamutuk duni ho Bylah iha inisiu maibe depois situasaun rungu ranga iha Kodim nian ne’e nia mos hatene Bylah ses ba ne’ebe. Joao haktuir katak, “To iha penerangan ne’e karik, dalan UNDIL (Universidade Dili) agora ne’e ami lao hamutuk fali. Iha ne ami lao hamutuk ho matebian Chico Binaraga (Joao nia maun), lao to’o iha Santa Cruz. Ami rua hamutuk iha ne’eba, fofoun ami atu ba tuir reza, maibe tamba buat ne’e rame demais ne’ebe ami sai tia fali mai liur. Ami sai mai goja mai iha oin hamutuk sei goja hela ‘Bapa’ sira. Tentara ekipa ida mai ikus ne’e isin molik los deit ho kilat trankadu. Hau ho Bylah sei iha oin goja hela 744 tun mai ne’e. Ami goja dehan, “imi tiru tok, tiru tok” no ami hakat pasu 20 ka 30 foin ema tiru. Ema tiru derepenti ne’e halo ita hakfodak, no ema halai rungu-ranga. Tempu ne’e hau la hatene Bylah halai ba ne’ebe.” Tempu ne’eba Joao mos la hatene ona saida mak akontese ba Bylah. Ikus mai mak hatene katak Bylah konsege halai liu duni.

Iha tempu tiru maka’as no ema halai namkari, Bylah esplika katak, iha tempu ne’eba nia hanesan ema neon lakon. “Hau la halai tama ba simeteriu laran, hau iha rate nia oin deit no halai duni maibe monu tama ba rai kuak ida, rai kuak ne’e ema ke’e hela ba halo konstrusaun. Maluk sira seluk mos monu tun ba rai kuak ne’e, no hanehan iha hau nia leten. Hau hakilar dehan hau mate ona, ajuda hau. Hau konsege obriga an sai duni hosi rai kuak ne’e no kontinua halai.” Bylah expresa ho laran tristi, tan nia rona sira seluk mos hakilar dehan ‘hau mate ona’. Balun hakilar bolu nia kolega nia naran hodi husu ajuda, maibe la hatene se se mak hakilar ne’e. Situasaun ida ne’e halo joven barak hakilar ho hein katak iha ema ruma mai ajuda lalais sira. Situasaun ida defisil tebes duni. Maibe hakilar husu tulun sira ne’e, sai saugati deit.

Bainhira konsege hasai an hosi ema hanehan iha rai kuak laran ne’e nia halai. Nia dehan katak nia halai hanesan ema neon la iha, tanba laran nakonu ho tauk. Nia la haree ba mai tan no nia mos sente hanesan la haree ema. Maibe nia halai deit hosi mate. Ikus mai mak nia rona katak kolega Chico Binaraga mate, no mos ninia kolega sira seluk. Balun hetan kaer, inklui Bylah nia maun rasik, Dementino Oliveira. Bylha expresa katak, “Hau sei senti liu mak halai hanesan neon la iha, laran mamuk halai la hatene ba los ne’ebe, hau halai tama husi rate sorin liu tun ba kintál komunidade nian hodi ba sai fali iha dalan Audian tesik restaurante Ayam goreng nian ne’e.”

Situasaun trautizadu ne’e, halo Bylah haluha detallus istoria balun, hosi ninia partisipasaun. Tan nia hatene katak nia halai to’o iha Audian Tahu Laran, nia tama iha uma ida. Nia haree ema balun sae ba uma leten, haris fatin leten, ema nia kuartu laran, kama okos, ema sira halai ne’e mak ba hotu iha uma ne’e. Bylah hato’o katak, “hau mos la hanoin hetan uma nain los mak se? hau rasik hare katak ema hotu hamutuk iha fatin ida ne’e bele la seguru, no halo ema bele hetan lalais hodi kaer ami ka tiru mate. Uma nain ne’e bolu duni hau hodi ba truka tiha ropa, tamba hau hakarak fila ba uma ona, iha audian kintál kiik. Iha tempu ne’eba hau ba hatais saia-bluza koor funan mean no sepatu talin mutin oan ida. Depois hau troka tiha ho ema nia roupa, maibe triste liu tanba hau la hanoin ema ne’e nia oin to agora. Hau hanoin deit mak sira fo kalsa badak jeans tesi badak ida, fo sinelus simples oan ida. Sira tesi tiha sira nia hudi hun ida, fo hudi ramu ida tesi halo sasuit tau iha lafatik ida hodi hau tutur par ema hanoin hau ba faan hudi. Maski tempu ne’e difisil, hau konsege ho tauk maibé brani hodi fila ba uma. Mais situasan ida ne’e se mak atu faan, hau lao mos ain-liman nakdedar. Maibe hau tenke halo hanesan ne’e para bele fila ba uma.”

Bylah expresa mos katak, “situasaun tempu ne’eba la seguru tebes, tamba hotu hotu mak mai iha ne’e bele mos ema kaer, balu mos ema bele oho mate. Ni aumenta dehan, “hau sente mesak los, hotu-hotu halai ketak hotu. Halai ba ne’ebe mos ita lahatene. Hau konsege lao husi Audian tahu laran husi estrada boot dalan ninin ho tutur hodi halo henesan faan. Ba Bylah, lao halo finji faan sasan hosi Audian Tahu Laran ne’e esforsu ida bo’ot teb-tebes tan hatene momos katak tempu ne’eba Dili laran ne’e hanesan rai fuik tiha ona. Liu mai kampu demokrasia, lao los mai lampu merah, tesik sae ba estádiu ba merkado lama, foin tau tesik karuk los ba dalan Audian Alam Baru, iha pertigaan ne’e mak hau soe hudi ho lafatik, foti deit hau nia faru hodi lori no halai sae husi dalan Alan Baru tama iha Kepala Desa Jaco Fernandes (metabian) nia kintal, liu kedas ba hau nia uma.” 

Maibe ambiente tempu ne’e la hanesan ona babain Bylah lao fila ba uma hosi eskola ka hosi fatin halimar. Bylah nia tauk bo’ot nafatin tan iha uma sorin iha ‘Pos BTT 303’. Nia konsege hakat duni to’o uma maski ho laran taridu. Iha tempu ne’e Bylah mos lori ho ninia roupa ne’ebe nia uza ba partisipa iha demonstrasaun ne’e. Tan ne’e Bylah nia inan ho bin sira tauk los. Bylah mos rona katak nia maun mos rona ‘bapa’ sira kaer, entaun liu tia semana ida, Bylah nia inan lori kedas roupa sira ne’e ba Liquisa, hodi fo ba Bylah nia avo rai tia ne’eba.

Hanoin hetan istoria hirak ne’e halo Bylah urgulho no iha tempu hanesan tristi. Urgulho tanba nudar feto, laos tama iha organizasaun rezistensia ruma iha tempu ne’eba, konsege foti inisitiva rasik hodi tuir demonstrasaun 12 Novembru ne’e. Motivasaun bo’ot liu ba Bylah iha tempu ne’eba hodi halo desidi partisipa mak ninia mehi, katak loron ida Timor sei ukun an duni no hamrik mesak. Tanba ne’e Bylah desidi lakon izame hodi ba partisipa.

Bylah ninia partisipasaun la hotu deit ho demonstrasaun 12 Novembru nian. Bainhira ba kontinua ninia estudu iha Indonesia, Bylah desidi hola parte iha RENETIL ho pozisaun ikus liu nudar Sekretária hodi buka fundus ba halo demonstrasaun. Iha Indonesia nia ativu iha demonstrasaun hasoru okupasaun Indonesia iha Kantor DPR Malang, no Surabaya no halo partisipa iha demonstrasaun iha embaxada Inglatera nia oin, ‘pernah’ haksoit tama iha Embaixada Russia hodi halo protesta hasoru Indonesia nia invazaun.

Bylah hakarak uza opurtunidade ne’ebe TAFARA.ORG fo hodi agradese familia ida ne’ebe nia haluha ona, maibe salva nia moris, no salva mos kolega seluk. Ho ninia liafuan rasik dehan, “Hau rasik mos hatoo ba família ne’ebe mak salva hau no kolega sira seluk, oferese fatin no roupa no hodi hodi hau bele fila ba uma. Hau hato’o obrigada barak ba apoiu tomak, ho neon tomak hakarak atu hatene familia ne’ebe ajuda hau no kolega seluk iha tempu ne’eba. Maromak nia tulun mak tinan hira ona ona, sei lembra buat balun, no balun haluha tamba tempu ne’eba defisil ho tauk. Sorte diak hau la hetan moras ka trauma ruma ne’ebe boot ba hau nia saúde ka moris tomak. Maski nune’e sentimentu tauk uituan sei nafatin moris ho hau, bainhira rona buat tarutu ruma sempre hakfodak no trauma.”

Atu taka dadalia ne’e TAFARA.ORG, Bylah hakarak hato’o mensajen ba joven feto sira. Nia husu ba joven feto sira, “Keta tauk atu halo desizaun ba ita nian aan, bainhira ita senti katak desizaun ne’e sei diak ba futuru ita nian no nasaun nian. Ne’e duni la bele atu tauk hodi envolve iha atividades sira, nomos hatudu barani, labele lakon ho joven mane sira, ita feto mos bele no prountu.” Ne mak liafuan korajen ne’ebe Bylah hato’o hodi taka dadalia badak ho TAFARA.ORG. Mensajen ne’e reprezenta duni Bylah ninia istoria involvementu demonstrasaun 12 Novembru nian. Nia bele sai ezemplar ba maluk feto seluk, kontribui ba nasaun la persija tenki hola parte iha organizasaun ruma. Importante inisiativa ne’e diak no fo benefisiu ba ema barak, ne’e kontribui ona ba nasaun nia vida.

Agora dadaun Bylah servisu iha ONG Belun, nudar Program Manager ba Programa Atensaun no Responde Sedu (AtReS). Nia moris hamutuk ho ninia kaben Ato ‘Lekinawa’ Costa ho oan mane nain 4: Moreno LibertoDelano LorileyZenero Laloran, no Khalifa Lovito[Sandra Moniz, Benvinda Gusmao, Vitoria da Costa | TAFARA.ORG | 12.06.2016].

About Equipa Tafara

Artigu ida ne'e kobertura no hakerek konjunta/hamutuk entre Jornalistas no/ka kontribuidor TAFARA.TL.

Check Also

Xanana: Espera PR Lú Olo Kumpri Konstituisaun no Ami Sei Fo Apoio Tomak

Situasaun politika depois de elisaun Jeral 2017, hamosu preokupasaun ne’ebe mai hosi povu, hodi hein …

Leave a Reply

Your email address will not be published. Required fields are marked *