Saturday , November 17 2018
Home / Sosial & Politika / Pe.Juvito: PR nia Desizaun Justa no Honesta, Bele Hakotu Krizi Instituisional
Pe.Juvito Rego de Jesus halo entrevista ho jornalista sira iha palacio prezidensia. [Foto: Zevonia Vieira | TAFARA.TL | 26.01.2018]

Pe.Juvito: PR nia Desizaun Justa no Honesta, Bele Hakotu Krizi Instituisional

Relasiona ho Prezidente da Republika nia desizaun ikus, hodi desidi elisaun antesipada. Pe. Juvito Rego de Jesus, fo hanoin ba TAFARA.TL liga ho desizaun Prezidente da Republika. Pe.Juvito hateten desizaun ne’ebe Prezidente foti ne’e hanoin didiak ona, ida ne’e desizaun justa no honestu, bele halo ema hotu-hotu sente katak desizaun ne’e bele hakotu krizi instituisional, krizi politika ne’ebe durante lao hela iha fulan neen nia laran, diak liu hakotu tiha tanba durante ne’e hanoin hatun malu hela deit.

“Halo parlamentu sai fali hanesan partidu nia knuuk ne’e la los, deputadu sira laos delegadu partidu, deputadu sira ba iha ne’eba ne’e tenke koalia povu nia direitu, laos lori interese partidu nian ba iha ne’eba. Deputadu sira labele hatais deit faru parlamentu nian, atributu parlamentu nian atu halo politika partidaria maibe parlamentu atu halo politika ba estadu nian ne’ebe atu defende povu nia direitu. Ne’e Prezidente haree katak se situasaun ida ne’e la diak, Prezidente dissolve tiha no fo fila fali ba povu tanba ida ne’e mak demokrasia”, hateten Pe.Juvito

Nudar membru RENETIL ne’e mos afirma katak desizaun ne’ebe Prezidente da Republika, ne’e justa no honestu, “ita lalika protestatan para hasoru desizaun ida ne’e, tanba se foti buat seluk ne’e hakiak krizi liutan.Prezidente hakarak hamate krizi, tenke hamate duni, ne’ebe ida ne’e hamate krizi ida. Hakotu iha espekulasaun no espektativa sira hotu atu tau prespektiva foun ida”.

Iha deskursu Prezidente da Republika, iha palacio prezidensia 26/01, hateten Lei Inan garante respeitu tomak ba povu nia direitu, atu hetan moris diak, atu sai hosi mukit no kiak ne’ebe hanehan bebeik sira nia moris. Konstituisaun orient aba dezenvolvimentu, ba justisa, ba Timoroan hotu. Garante mos katak hotu-hotu iha direitu hanesan, no estadu tenke proteje idak-idak nia direitu tuir Lei haruka.

“Ita nia povu iha direitu ba demokrasi atu partisipa iha dezenvolvimentu, iha ita nia rai Timor-Leste. Rai lulik Timor-Leste iha direitu atu sai estadu modern. Tuir Lei no demokrasi, povu mak bele deside. Uluk ita rona, ita fiar malu, ita fo liman ba malu, ita manan. Ita nia kultura mak ida ne’e duni. Povu lakohi ema id aka partiu mesak ida deit mak deside buat hotu, loro deit povu nia naran maibe povu la partisipa”, hateten Lú Olo.

Prezidente Lú Olo hatoo parabens ba povu doben Timor-Leste, tanba liu hosi povu nia votu, hatoo mesajen momoos, katak presiza haklean liutan demokrasi, maibe politiku sira la interpreta loloos povu nia mesajen ne’e. Envezde koalia ba malu no respeita povu nia hakarak, politiku sira fila kotuk ba malu. Tempu to ona atu fo liman ba malu, lori rai doben Timor-Leste ba oin.*[Zevonia Vieira | TAFARA.TL | 26.01.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *