Wednesday , October 24 2018
Home / Sosial & Politika / PM Aseita Se Pipeline Mai TL, Juvinal: Estadu Tenke Halo Analiza Ba Kustu No Benefisiu Mai TL.
Primeiru Ministru, Dr. Marí Alkatiri halo entrevista ho jornalista sira iha palacio prezidensia. [Foto: Zevonia Vieira | 15.02.2018]

PM Aseita Se Pipeline Mai TL, Juvinal: Estadu Tenke Halo Analiza Ba Kustu No Benefisiu Mai TL.

“Hau aseita tanba uluk kedas hau hanoin katak 100% la konsege, hau nungka mehi too 100%. 70% kuandu mai Timor no 80% kuandu ba Australia. Hau lori ba iha Konselho Ministru, hau mak asina mandatu ida para fo kompetensia ba Ministru Agio para bele asina, signifika aseita no hau hakarak dada mai Timor”. Marí Alkatiri

Primeiru Ministru, Dr. Marí Alkatiri hasoru malu ho Prezidente da Republika, hodi aprezenta atividade regular governu nian ba Xefe Estadu. Hafoin remata ekontru ba jornalista sira iha palacio prezidensia, 15/02, liga ho issue Fronteira Maritima, Marí esplika ekipa negosiador inklui Ministro-Adjunto do Primeiro-Ministro para a Delimitação de Fronteiras, Hermenegildo Augusto Cabral Pereira mai koalia ona ho Prezidente da Republika.

Marí informa katak akordu ne’ebe iha agora dadauk ne’e atu ba asina mak esplika kona ba se dada mai Timor sei 70%, se dada ba Darwin Autralia hetan 80%, “portantu kadora sedauk desidi atu mai Timor ka atu ba Australia. Iha 20 de Marsu mak atu hasoru malu fali iha Malaysia antes ba Nova Yorke, mais hau la ba Malaysia, hau ba deit Nova Yorke”.

Hatan ba perguntas hosi media Reuters, Primeiru Ministru aseita ho 70% kadora dada mai Timor?

Mari responde katak, “hau aseita tanba uluk kedas hau hanoin katak 100% la konsege, hau nungka mehi too 100%. 70% kuandu mai Timor no 80% kuandu ba Australia. Hau lori ba iha Konselho Ministru, hau mak asina mandatu ida para fo kompetensia ba Ministru Agio para bele asina, signifika aseita no hau hakarak dada mai Timor”.

Hatan ba TAFARA.TL sekarik kadora dada duni mai Timor, saida mak governu halo hodi hare ba ba seitor dezenvolvimentu ekonomia iha Greater Sunrise? Marí hatan katak, klaru sei Timor konsege halo duni akordu ida ne’e, Timor mos iha riku soin iha tasi laran, tenke integra hotu iha akordu ida ne’e.

“Maske median line ne’e akordu ida, ida ne’e politiku no juridiku. Greater Sunrise ne’e ekonomiku. Husik lai ita hare lai sei ba 80% ka 70% depois mak ita halo kontas”, hateten Marí

Marí reafirma katak, “uluk hau 90% balun kritika, agora hau nungka kritika ema tanba nungka mehi atu liu ida ne’e. Linha ida uluk JPDA ne’e hanesan fronteira ba Timor ne’e importante”.

Peskizador hosi NGO La’o Hamutuk, Juvinal Dias ba TAFARA.TL liga ho se karik pipeline dada mai Timor-Leste, vantazen no desvantazen mai estadu Timor? Juvinal esplika katak tuir La’o Hamutuk, karik pipeline mai duni Timor-Leste, estadu tenke halo analiza sira ne’ebe klean liu kona-ba kustu no benefisiu sira ne’ebe Timor-Leste sei lori.

“Prozemplu, kustu ba infrastrutura sira hanesan LNG Plant no Refinaria nee iha se nia responsabiidade. Se karik Timor-Leste mak lori kustu sira ne’e, ida nee sei implika ba iha finansial estadu, maibe karik kompania sira mak sei lori kustu tomak projetu Tasi Mane ida ne’e, katak todan finansial estadu nian sei menus. Tanba ne;e, La’o Hamutuk hanoin katak karik pipeline mai duni Timor-Leste, husik kustu sira ne’e iha responsabilidade kompania operador sira nian”, hateten Juvinal

Juvinal hatutan katak estadu mos tenke halo planu diak sira, atu evita estragus ambiental sira ne’ebe mai hosi “gas leak”, Oil Spill ka foer toksiku sira ne’ebe sempre mai hosi industria petroliferu. Ikus liu, tenke mos konsidera impaktu social sira ba povu, hanesan eviksaun ba rai povu, kampu servisu no mos problema social sira seluk.

Akordu ne’ebe sei deskuti entre governu Timor no Australia karik kadora sei dada mai iha Timor ho rezultadu 70-30. Tuir La’o Hamutuk nia hanoin katak ne’e nudar vitoria ida bainhira rai rua ne’e konkorda atu uza prinsipiu sira ne’ebe mensiona iha Lei no direitu internasional. Negosiasaun sira sempre mai hosi “win win solution” ka solusaun ne’ebe hetan benefisiu hanesan, mai hosi parte hosi interese rai rua nian.

Ba TAFARA.TL konaba oinsa mak atu dezenvolve ekonomia iha Greater Sunrise, sekarik kadora dada duni mai Timor-Leste? Juvinal responde klaru katak Greater Sunrise ne’e sei fo cash billion lubuk mai Timor-Leste, maibe mos klaru katak industria mina-rai sei labele fornese kampu servisu barak ba povu Timor-Leste, no kampu servisu sira ne’e presiza skill sira ne’ebe liu natoon. Aleinde ne’e, dezafiu boot ida ne’ebe Timor-Leste sei infrenta mak Timor-Leste nia ekonomia sei depende maka’as liu ba ekonomia petrolifera. Governu tenke hanoin atu diversifika nia ekonomia atu nune bele evita malisan rekursu, akontese mai Timor-Leste, espesialmente bainhira rezerva mina-rai sira ne’e maran ona. *[Zevonia Vieira | TAFARA.TL | 15.02.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *