Saturday , May 26 2018
Home / Sosial & Politika / PM Loke Kongresu RENETIL, Marí: Uluk Lakon Titlu Maibe Manan Patria, Agora Manan Patria, Tenke Iha Titlu.
Primeiru Ministru , Dr. Marí Alkatiri loke kongresu RENETIL ba dahituk iha CCD. [Foto: Zevonia Vieira | 15.03.2018]

PM Loke Kongresu RENETIL, Marí: Uluk Lakon Titlu Maibe Manan Patria, Agora Manan Patria, Tenke Iha Titlu.

Ami fiar katak diak liu ita lakon titlu, do que ita lakon ita nia rain, tanba titlu ohin ita la hetan, aban ita sei bele hetan, maibe ita lakon rai, ita sei la hetan tan. Los duni estudante barak la hetan titlu, barak sakrifika nia titlu no luta determinasaun ba libertasaun Timor nian. Nee hanesan sakrifisiu boot ida ne’ebe membru RENETIL sira halo”. Jose “Siak”

Resistência Nacional dos Estudantes de Timor-Leste [RENETIL] realiza kongresu ba dahituk ho tema “Revitalizasaun Papel RENETIL Hodi Garante Soberanu Estadu ho Povu”.

Iha abertura ba kongrese RENETIL ne’ebe loke hosi Primeiru Ministru, Dr. Marí Alkatiri, liu hosi deskursu hateten kontente tebes hetan konvite hosi RENETIL ba kongresu ne’ebe importante. Kongresu ho nia tema atual tebes.

“Bainhira ita dehan hametin soberania, ne’e bele dehan topiku ne’e atual tebes. Soberania antes ita hametin, ita tenke konsista, ita tenke manan uluk soberania, depois mak ita hametin soberania. Uluk kedas RENETIL moris iha 1988 para hatutan tan luta, tanba iha frente foun ida, frente ne’ebe iha Indonesia nia leet. Ita hare bainhira rezistensia, liu-liu rezistensia military, komesa sente katak avansu iha luta militar susar tebes, entaun loke tan frente ida [externa no interna], ne’e mak moris RENETIL iha 20 Junhu 1988. Bainhira ita nia estudante sira hahu hetan oportunidade ba estuda iha Indonesia, objetivu laos atu transfere luta ba Indonesia maibe objetivu atu manan ita nia joven sira, para atu defende interese integrasaun ne’e, maibe kapasidade sentidu patriotiku rezistensia tomak nian transfere ba ita nia joven sira no foti inisiativa ida ne’ebe idak, harii RENETIL iha Indonesia”, hateten Marí.

Marí esplika liutan iha tempu ne’eba unidade asaun, unidade signifika hotu-hotu tenke hamutuk, asaun signifika kontra inimigu. Iha tempu funu iha inimigu, tanba ne’e tenke defini didiak katak ita presiza unidade atu halo asaun kontra inimigu. Bainhira iha 1999 to ohin loron, hare membru RENETIL balun iha partidu ida, balun partidu seluk, balun laiha partidu signifika katak ho demokrasia unidade iha RENETIL mantein, unidade hodi hametin soberania, atu hametin soberania hosi dalan hametin demokrasia. Idak-idak ho nia opsaun maibe uma RENETIL fatin ida ne’ebe bele halibur sira nafatin, tanba tempu demokrasia mak ida ne’e duni. Idak-idak tuir nia dalan, para hanoin ba liberdade, atu hanoin liberdade, atu atua ho liberdade ho objetivu atu kontribui ba patria ida ne’ebe demokratiku no estadu direitu, ne’e mak demokrasia hatudu mai ita.

“RENETIL kontinua hanesan RENETIL, biar iha nivel asaun partidaria idak-idak buka nia partidu, mais figura sempre sai hanesan RENETIL. Ita hare Prezidente Parlamentu, agora vice Prezidente Fretilin mais ema mai hosi RENETIL, ita hare Ministru do Estadu e Ministru de Rekursu Minarais no Prezidente PD ema RENETIL, ne’e hanesan ezemplu ida katak bainhira nasaun ne’e presiza, ita hatene iha ne’ebe mak ita bele tur hamutuk, ita lao hamutuk to iha ne’ebe sempre buka atu inkluzaun. Naturalmente tanba iha tempu demokrasia, buat ida sempre hanoin katak inimigu laiha . Ohin loron ne’e asaun laos kontra inimigu, asaun ne’e ita hotu hamutuk atu halao dezenvolvimentu. Ita hamutuk para lori dezenvolvimentu mai rai ida ne’e”, afirma Marí iha CCD, 15/03.

Marí mos hateten katak organizasaun juventude rezistensia, ho jovens rezistensia mak sei sai baze ba realidade ida ne’e. Uluk dehan lakon titlu maibe manan patria, agora ita manan patria ona, ita mos tenke iha titlu, “ida ne’e importante tebes, para atu lori dezenvolvimentu rai ida ne’e mak ita boot sira, ita boot nia oan sira, hau nia beoan tenke matenek liu hau, se la matenek liu susar tebes atu ita dezenvolve rai ida ne’e. Dezenvolvimentu mai ho matenek, laos mai ho deit rekursu finanseiru. Rekurus ida laiha matenek, dezenvolvimentu sei la mai, no rekursu sira aban bainrua mohu, ita han malu fali. Hau kontente tanba VII Kongresu ne’e akontese iha tempu VII Governu Konstituisional”.

Iha fatin hanesan Prezidente CCR RENETIL, Jose AMX Gonsalve, ho naran kodigu “Siak” esplika ba kongresista sira konaba tanba sa estudante sira hakarak harii RENETIL, ne’ebe funda iha loron 22 Junhu 1988 no la konsentra ba estudu nudar estudante, katak nudar povu maubere nia oan sira ne’ebe mak asiste violasaun direitus humanus no justisa, pratika oin-oin hosi military Indonesia hasoru Timor oan sira, estudante sira hanoin katak tenke hapara krimi ida ne’ebe mai hosi pratika military Indonesia. Estudante sira tenke mobiliza an iha rezistensia hodi hasoru hahalok ida ne’e no asaun illegal. Ho emblema RENETIL katak antes sem titlu do que sem patria. Emblema ida ne’e hatudu ba estudante, atu tau interese povu nian iha oin, do que intereses pesoal.

“Ami fiar katak diak liu ita lakon titlu, do que ita lakon ita nia rain, tanba titlu ohin ita la hetan, aban ita sei bele hetan, maibe ita lakon rai, ita sei la hetan tan. Los duni estudante barak la hetan titlu, barak sakrifika nia titlu no luta determinasaun ba libertasaun Timor nian. Nee hanesan sakrifisiu boot ida ne’ebe membru RENETIL sira halo”, hateten Jose “Siak”

Siak hatutan liutan katak emblema seluk ida mak unidade e asaun, tanba ne’e RENETIL fiar katak ukun an so bele hetan hosi unidade Timor oan sira nian, unidade iha hanoin no unidade iha asaun. Prova duni katak Timor oan sira, ukun an duni nudar obra kolektivu, ita hotu nian, povu tomak nian no laos grupu ida nian deit.

Iha funu laran RENETIL harii nia stratejia boot rua mak internasionalizasaun konflitu de Timor-Leste no Indonesiazasaun konflitu de Timor-Leste. RENETIL hakarak lori funi Timor nian iha nivel internasional, liu hosi asaun sira hanesan manifestasaun iha Indonesia no rai liur sira seluk. RENETIL hakarak involve komunidade internasional iha funu Timor-Leste nian tanba problema Timor nian laos asumtu internu Indonesia nian maibe kazu internasional.

Indonesiasaun de konflitu de Timor-Leste, RENETIL hakarak involve povu Indonesia, iha prosesu libertasaun povu Timor-Leste nian, tanba povu nasaun rua ne’e komprimidu hosi rezemi Suharto. Bele dehan RENETIL hetan susesu boot iha estratejia ida ne’e, konsege transfere funu hosi Timor ba Indonesia no involve povu emosionalmente iha luta libertasaun Timor nian. RENETIL fiar bainhira Soharto monu, ba povu Indonesia hetan hikas nian liberdade no Timor-Leste mos hetan hikas nia ukun rasik an.

Primeiru Ministru Dr. Marí Alkatiri ofisialmente loke mos kongresu ba loron dahuluk RENETIL nian. Iha kongresu refere hetan partisipasau masimu hos membru RENETIL sira ne’ebe uluk halo sira nia luta iha Indonesia, membru governu, Komandante PNTL, Major Jeneral F-FDTL, Dewan Solidaritas, OJETIL, CNJTL no estudante universitariu sira. * [ Zevonia Vieira | TAFARA.TL | 15.03.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Ran Ema Ida nian, Sei Salva Ema Ida nia Vida

Importante ida ba hau, e hau bele salva hau nia an mos no mos bele …

Leave a Reply

Your email address will not be published. Required fields are marked *