Monday , June 17 2019
Home / Sosial & Politika / PM Marí: Agrikultura Sei Sai Baze Ba Ekonomia Iha Tinan Naruk, Laos Mina Rai
Primeiru Ministru, Dr. Marí Alkatiri hatoo deskursu iha Workshop ne'ebe organiza hosi Rede Feto. [Foto: Zevonia Vieira | 16.12.2017]

PM Marí: Agrikultura Sei Sai Baze Ba Ekonomia Iha Tinan Naruk, Laos Mina Rai

“Feto iha ona kapasidade hodi halo jestaun iha nivel nasional, bainhira koalia konaba agrikultura, liga deit ba feto ne’e la los duni, tanba mane ho feto tenke hamutuk maka agrikultura bele lao ba oin”. Marí Alkatiri

Timor-Leste iha potensia boot iha are agrikultura, maioria populasaun ne’ebe hela iha area rural moris nudar agrikultor, 50% hosi total populasaun, halao sira nia servisu iha toos no natar.

Rede Feto Timor-Leste halo parseria ho organizasaun internasional To’os Ba Moris Diak (TOMAK) hodi promove programa Aselera Feto Nia kolaborasaun no Desizaun iha Agrikultura, Nutrisaun no Dezenvolvimentu Merkadu.

Primeiru Ministru, Dr. Marí Alkatiri ne’ebe halo abertura ba workshop nasional ho tema “Hasae Vizibilidade no Konsensia Publika Konaba Kontribuisaun Feto iha Produsaun Agrikultura, Nutrisaun no Asesu ba Merkado” hateten Timor nia rai bokur no buras maibe sedauk utiliza ho didiak iha tempu naruk nia laran. Tanba Timor sei depende ba osan mina rai no la uza dalan alternative ho didiak hodi bele hetan rasik.

“Ita nia rai ne’e bokur tebes maibe ita husik hela ninia bokur toba iha tinan hirak nia laran, tanba saida? tanba salah ida ne’ebe halo lori osan mina rai tama mai, ne’e hau nia salah. Se ita mak laiha osan mina rai, karik oras ne’e agrikultura buras. Oras ne’e ita nia feto no mane maluk sira iha kampu moris diak liu duke ita iha sidade. Sidade sai fali sira nia basar, sira nia moris ne’e mai ho sira nia servisu rasik, maibe osan mina rai tama mai barak mai ita nia rai, halo ita sai hosi dependensia politika military ida, ita tama fali ba dependensia seluk. Osan ne’ebe laos mai hosi ita nia kosar ben, osan ne’ebe laos mai hosi ita nia servisu rasik. Ne’e mak halo ita hotu asvezes dala barak mehi katak ita riku ona maibe ita kiak nafatin”, tenik Marí

Primeiru Ministru informa katak Timor bele riku bainhira iha ona seguransa katak ho ema hotu nia servisu, hamoris kondisaun diak liu ba idak-idak nia an rasik, ba familia no ba sosiadade tomak.

Primeiru Ministru kontente ho inisiativa sira hanesan ne’e, atu bok fila fali ba enerjia boot ida ne’ebe povu Timor-Leste sempre iha. Espiritiu boot ne’e mai hosi femeninu feto iha rai ida ne’e. ema hotu hatene katak, iha sosiadade ne’e feto mak iha responsabilidade ne’ebe boot liu, atu halo jestaun ba loron-loron nian iha uma laran.

Agora feto iha ona kapasidade hodi halo jestaun iha nivel nasional, bainhira koalia konaba agrikultura, liga deit ba feto ne’e la los duni, tanba mane ho feto tenke hamutuk maka agrikultura bele lao ba oin.

“Hau bele komprende pensamentu ida ne’e, tanba dala barak dezenvolvimentu lao iha sidade e tendensia joven mane sira mak tun mai sidade, hodi mai buka moris iha sidade, husik feto sira mak mesak iha kampu, maibe hau mos hakarak dehan deit katak agrikultura iha Timor-Leste tinan naruk tan sei sai baze ba ekonomia Timor-Leste nian. Laos minarai mak atu sai baze ekonomia ba tempu naruk, liu-liu bainhira ita gasta nafatin hanesan ita gasta agora ne’e”, esplika Primeiru Ministru VII Governu Konstituisaun.

Marí Alkatiri mos sublinha katak, diak liu fila fali ba ita nia orijin, hodi aproveita didiak i rai ne’ebe bokur, fila fali hodi muda mentalidade, subsistensia sei la lori rikeza mai, se halo deit agrikultura, hodi ba han hemu deit iha uma laran, sei la lori rikeza. Se riku soin para halo produsaun, bainhira halo produsaun ba merkadu. Se iha duni koordenasaun ho Ministeriu Edukasaun, refesaun loron ida, dala ida ba labarik sira ne’e total $400 mill refesaun kada loron.

Iha tempu hanesan liu konferensia imprensa, Prezidente Board Rede Feto, Judite Dias Ximenes hateten atividade ne’ebe Rede Feto ho nia membru sira halo iha municipio Aileu, Ainaro, Bobonaro, Ermera, Liquisa no Covalima. Grupu sira ne’e halo mapeamentu hodi identifika feto rural ne’ebe identifikadu hosi mapeamentu hodi identifika feto rural sira nua organizasaun no nia produsaun, organiza estudu komparativu ba feto rural ne’ebe identifikadu hosi mapeamentu no buat seluktan.

Rede Feto mos konsidera katak Estadu Timor-Leste iha planu Estratejiku Dezenvolvimentu Nasional (PEDN), fo mos importansia ba setor agrikultur, nutrisaun no dezenvolvimentu merkadu iha rai laran.

Governu Timor-Leste iha komitmentu hodi asina Deklarasaun Maubisse 2015, hodi asegura feto rrurak sira nia ezistensia, liu-liu Ministeriu relevante hamutuk sia no BNCTL ne’ebe fo importansia tebes ba setor agrikultura, nutrisaun no ekonomia feto rural sira nian.*[Zevonia Vieira | TAFARA.TL | 16.12.2017]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *