Monday , June 17 2019
Home / Sosial & Politika / PM Marí: Iha Komitmentu Atu Dezenvolve Ekonomia Iha Merkadu Ne’ebe Inklusivu
Premeiru Ministru Dr. Marí Alkatiri halo entrevista ho jornalista sira iha konferensia nternasional. [Foto: Zevonia Vieira | 15.11.2017]

PM Marí: Iha Komitmentu Atu Dezenvolve Ekonomia Iha Merkadu Ne’ebe Inklusivu

“Ami iha komitmentu boot hodi dezenvolve ekonomia iha merkadu inklusivu no ba futuru ne’ebe fo naroman liu ba povu”. Marí Alkatiri

Premeiru Ministru, Dr. Marí Alkatiri liu hosi konferensia internasional kona ba investimentu. Liu hosi deskursu Marí Alkatiri hateten katak hanesan nasaun kiik no nasaun foun, ami hetan graca ho rekursu natureza ne’ebe ho numeru boot, hodi hahu dezenvolve ona. Bainhira Timor restora independensia, rekursu hirak ne’e, ajuda tebes hodi asegura fundasaun ba ekonomia sustentavel no bele dezenvolve iha future ho optimism.

“Ami fiar katak ita boot sira sei hakarak involve ho ami, tanba hakarak halo bisnis, tanba ita boot sira fiar katak iha oportunidade diak hodi investe iha Timor-Leste dan ita boot sira interese hakarak halo investimentu, hodi kria ekonomia ne’ebe diak no bele boot, iha ambiente ne’ebe diak, hodi halo bisnis ne’ebe bele fasilita ho diak”, hateten Marí.

Marí esklarese liutan katak ho rekursu husi petroliferu, Timor-Leste iha linha ne’ebe bele diversifika ekonomia dan bele hamenus denpendensia ba rekursu mina rai.

“Ami iha komitmentu boot hodi dezenvolve ekonomia iha merkadu inklusivu no ba futuru ne’ebe fo naroman liu ba povu. Ami iha kapasidade ba politika governu no komitmentu ne’ebe forte, hodi hare ba iha reformasaun ba Lei, hodi bele dezenvolve ambiente iha bisnis, ne’ebe diak liu no bele harii infrastruktura ekonnomia sustentavel”, hateten Marí iha konferensia internasional 14/11.

Marí Alkatiri ne’ebe iha esperiensia barak iha projetu ZEESM iha Oecusse ba jornalista sira hateten katak objetivu hosi konferensia ida ne’e, atu dada ema mai investe iha Timor-Leste, atu Timor bele deversifika ekonomia, signifika investe iha turismo, iha agrikultura, investe iha rekursu minarai sira seluk, hodi bele hasai todan oituan mai ita ba fundu petroliferu.

“Ita bele hetan reseitas foun, ne’e simplimente ema sira ne’ebe mai tenke iha garantia, ida mak garantia Lei, mais garantia boot liu mak politika (situasaun politika) tanba ne’e mak mai iha ne’e, para ita bele fo ba sira garantia ruma para sira mos bele mai investe”, esplika Marí.

Hatan ba perguntas hosi TAFARA.TL liga oinsa hare ba seitor ambiente, tanba ne’e seitor interesante.

“Dezenvolvimentu ne’e sempre iha problema ruma ho ambiente, maibe iha fatin hotu-hotu asumtu ambiente ne’e ita tenke hatene halo jestaun ka management ba environment, identifika katak ita hatun ai hun ida, ita tenke kuda ai hun tolu ka lima ne’e mak liga ho jestaun ambiente. Agora protesaun ida nen ai hun ida labele hasai, entaun dezenvolvimentu la akontese, entaun ita presiza duni luron ida atu halo fabrika ida, maibe ita tenke kuda lima, ne’e signifika jestaun no ambiente tenke lao hotu”, esplika Marí

Marí mos informa katak turismo nudar seitor importante maibe laos hahu ho infrastrutrua deit, “turismo ne’e importante, turismo ne’e laos hahu infrastrutura, premeiru tenke treinu ema para bele hatene halo servisu ba turismo iha fatin hotu-hotu, hosi manager to mai iha sira ne’ebe simu ema lor-loron. Se atu servisu iha restorante, oinsa atu serbi ema”.

Iha parte sorin Diretor Executivu, Arcanjo da Silva ba TAFARA.TL hateten katak, governu nia politika hakarak reforma estrutura makro ekonomiku nasaun nian, tanba babain Timor depende makas liu ba mina ho gas , sem mina ho gas Timor labele halo buat ida, maibe mos hanoin katak se mina ho gas ne’e tau ketak, nasaun ne’e labele lao ba oin, nune’e hakarak promove sektores non petroliferu hanesan agrikultra, turismo, industria manufaktoreira no seluktan, nune’e halibur investor pontesial sira mai hosi regiaun ne’e hanesan Australia , Singapura, Malaysia no balun mos mai hosi Europa hodi mai investe iha Timor.

“Sira husu mai ita, se ami mai fasilidade saida ma kami bele hetan no bele iha garantia? Ita nia respostas kompletu, premeiru reforme fomente ekonomiku VI Governu nian aprovadu iha Konselho Ministru mak ita identifika pilar lima atu dezenvolve ekonomia. Mina rai ho gas premeiru nafatin, agrikultura, Turismo, industira manufaktoreira. Ita mos muda Lei sira ne’e hanesan Lei Investimentu no.14/2011, ita tenke muda tanba artigu balun la relevante ona kona ba situasaun ohin loron pro ezemplu artigu konaba tax holidays (nia bebas taxa durante 25 anos). ASEAN eziste, se ita hakarak entrega an ba ASEAN, ita nia Lei Investimentu tenke harmoniza ho Lei iha Indonesia no rai sira seluk (nasaun 10)”. Esplika Arcanjo da Silva.

Tuir informasaun ne’ebe iha katak Timor-Leste raking bisnis iha mundu, iha tinan 2017, Timor-Leste hakiduk ba rangking 178, iha tinan kotuk hetan rangking 173, no tinan tinan uluk liha Timor-Leste iha ranking 94 ne’ebe kompara ho Indonesia, Timor-Leste diak liu.

Konferensia internasional kona ba investimentu ne’ebe mak halao ona ba dala rua iha Timor-Leste, ne’ebe organiza hosi Tradeinvest Timor-Leste, partisipa hosi investor internasional, Premeiru Ministru, membru governu, embasador Australia no investor nasional sira.*[Zevonia Vieira | TAFARA.TL | 16.11.2017]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *