PN Diskuti Artigu 21 Ona Hosi Projetu Lei Anti Korupsaun Nian

Vice Presidente Komisaun A Parlementu Nasional, Deputadu Fransisco Branco hato’o katak iha progresu diskusaun kona ba Projetu Lei Anti Korupsaun nian, to’o agora sira diskuti ona artigu 21 hosi projetu lei ne’e. Lia hirak ne’e hato’o iha Seminar Loron Ida kona ba Korupsaun no Governasaun Diak – Perspetiva ba Futuru, iha salaun Madre Dominikana, iha Oecusse, 19/06.

Deputadu Fransisco Branco, reprezenta Presidente Komisaun A, aprezenta ba lideransa komunitaria, organizasaun sosiedade civil, no instituisoens relevante RAEOA nian kona ba progresu dezenvolvimentu Projetu Lei Anti Korupsaun nian.

“Halo ona audiensia publik ho entidade relevante justisa, governo no sociedade civil. Komisaun A aprezenta mos textu subtitutivu hamutuk ho projetu lei ba plenaria. Iha projetu lei ne’e halo ona diskusaun klean ba artigu sira no aprova ona artigu 21, hosi total artigu 140 resin. Bainhira aselera tinan 1 bele hotu, “ Vasconselhos hatete iha seminar nia laran.

Iha fatin hanesan, Komisariu CAC, Sergio Hornay, mos koalia kona ba papel servisu CAC nian no rekoinese komplexidade kazu korupsaun mak akontese.

“Korupsaun nudar fenomeno ida komplexu no presija halo adaptasaun ba lei sira iha rai laran no situasaun global nian. CAC halo tuir nia kompetensia sira iha servisu prevensaun nian no represaun nian hodi kombate hahalok elicitu sira, “Sergio esplika.

Prekurador Jeral Estado nian, Jose da Costa Ximenes, haksolok ho esforsu mak Komisaun A halo ona ho hein katak servisu kombate korupsaun bele lao diak liutan.

“Kriasaun CAC ne’e hatudu vontade diak ida hodi kombate korupsaun tanba korupsaun bele estraga prinsipiu estadu do dereitu. Bainhira korupsaun akontese bele stimula instransparensia no injustisa. Korupsaun ninia vitima mak sidadaun ida-ida no ida ne’e fo impaktu ba sidadaun agora no sidadaun iha future mai,” Prokurador Jose hatete.Seminar ne’e hetan partisipasaun hosi instituisaun relevante iha RAEOA, organizasaun sosiedade civil iha RAEOA, lideransa komunitaria no seminar ne’e inisia hosi Parlementu Nasional, servisu hamutuk ho Oxfam Timor-Leste, no finansia hosi Governo Australia.* [Ato Costa | TAFARA.TL]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.