Tuesday , March 26 2019
Home / Sosial & Politika / PN Hakarak Reajenda Vizita PR Ba Vatikanu, Lú Olo: PR Defende Dignidade Povu nian, La aseita Reajenda Fila Fali
Prezidente da Republika, Dr. Francisco Guterres Lú Olo halo entrevista ho jornalista sira iha palacio prezidensia. [Foto: Media PR | 20.06.2018]

PN Hakarak Reajenda Vizita PR Ba Vatikanu, Lú Olo: PR Defende Dignidade Povu nian, La aseita Reajenda Fila Fali

“Votu ida ne’ebe mak deputadu maioria fo iha loron 5 Novembru nian mak nudar votu responsavel no votu ida ne’e mak tebes, votu ida ne’e mak los liu”. Lú Olo

Prezidente da Republika la aseita Parlamentu Nasional reajenda fila fali konaba vizita Prezidente da Republika ba Vatikanu.

Liu hosi konferensia da imprensa ba jornalista sira Prezidente da Republika, Dr. Francisco Guterres Lú Olo informa katak refere ba konvite konaba Prezidente da Republika atu vizita Vatikanu, iha loron 5 Novembru maioria bankada AMP vota kontra tiha Prezidente da Republika nia vizita ida ne’e.

Prezidente Lú Olo hatutan katak ohin Prezidente Parlamentu Nasional, Arão Noe mai hasoru Prezidente da Republika, liga ho pedidu hosi bankada sira nian para husu ba Prezidente da Republika hodi aseita fila fali reagendamentu vizita ida ne’e ba Vatikanu.

“Hau responde ba Prezidente Parlamentu katak votu ida ne’ebe mak deputadu maioria fo iha loron 5 Novembru nian mak nudar votu responsavel no votu ida ne’e mak tebes, votu ida ne’e mak los liu. Iha loron 6 Novembru hau haruka tiha ona karta ida ba Amu Papa Francisco hodi informa ba Amu Papa katak imposivel Prezidente da Republika halo vizita ba Vatikanu tanba Parlamentu Nasional vota kontra tiha haunia vizita, Hau hateten Prezidente da Republika defende dignidade povu nian la aseita Parlamentu Nasional atu reagenda fila fali hodi diskuti fila fali no Prezidente da Republika sei informa iha tempu seluk bainhira Amu Papa Francisco fo fila fali data seluk no tempu seluk ida para Prezidente da Republika vizita Vatikanu”, hateten Lú Olo

Hatan ba TAFARA.TL oinsa reazen hosi Prezidente Parlamentu Nasional relasiona ho pontu haat ne’ebe Prezidente da Republika mensiona? Prezidente Lú Olo hatan katak Prezidente Parlamentu dehan simu deit orientasaun hosi bankada sira para atu reagenda fila fali.

Relasiona ho konvite konaba Amu Papa konvida Prezidente da Republika tanba iha iha 2017 bainhira Prezidente da Republika, Dr. Francisco Guterres Lú Olo hetan posse iha Tasi Tolu 20 de Maiu.

“Iha dadersan hau hasoru malu ho reprezentante Amu Papa nian hau hatoo kedas katak Prezidente da Republika iha tempu besik hakarak atu vizita Vatikanu no atu hasoru malu ho suasentidade Amu Papa. Vizita ida ne’e konfirma iha 2018 ne’ebe Prezidente da Republika simu nota verbal ida hosi Vatikanu mai katak Amu Papa fo loron 23 Novembru 2018, para Prezidente da Republika to iha Vatikanu para hasoru malu ho Amu Papa”, informa Lú Olo

Lú Olo mos hateten katak atu hasoru malu ho Amu Papa, Prezidente da Republika mos hakarak atu konvida Amu Papa mai vizita Timor-Leste, atu komemora hamutuk ho povu Katoliku sira ba tinan 30 vizita Amu Papa Joao Paulo II mai vizita Timor iha Tasi Tolu , ne’ebe konsege loke Timor nia situasaun iha mundu tomak no mos atu komemora hamutuk ho povu Katoliku ba tinan 20 referendum. * [ Zevonia Vieira | TAFARA.TL | 14.11.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Prezidente da Republika Promulga OJE 2019

Prezidente da Repúblika, Dr. Francisco Guterres Lú Olo, ohin, promulga Lei N. 5/V-Orsamentu Jerál Estadu …

Leave a Reply

Your email address will not be published. Required fields are marked *