Sunday , June 24 2018
Home / Sosial & Politika / Povu Babain Preokupa ho Situasaun Polítika Ohin Loron
Povu nia esperansa ba governu foun hanesan mos inan ida Kuidadu nia oan.[Foto: Zinho MD | TAFARA.ORG].

Povu Babain Preokupa ho Situasaun Polítika Ohin Loron

Hafoin programa VII Governo nian hetan rejeisaun iha loron hirak liu-bá (20/10), povu babain preokupa ho situasaun ida ne’e, maske situasaun iha Dili laran la’o normal tanba hetan seguransa husi PNTL.

Atino Lopez nu’udar taxista hato’o nia pontu de vista ba situasaun ohin loron ne’ebé mak nakonu ho tensaun polítika halo povu babain hakfodak no trauma.

“Foin dadaun sira debate iha parlamentu (apresiasaun programa VII Governu.red) ne’e mak halo tensaun povu paniku oituan, tanba balun mai dehan fo’os laiha ona. Iha distritu (munisipiu.red) sira, fo’os aumenta sa’e tan, halo povu hanesan hafuhu malu fali,” tenik Atino iha Taxi laran, dalan hala’I ba Lecidere.

Taxista ne’e mós akresenta katak ho situasaun ida ne’e halo labele hala’I taxi to’o kalan boot. Tuku 17:00 to’o tuku 18:00 tenki tama ona uma tanba ta’uk.

Vendedores nu’u laloir senti triste oituan ho situasaun polítika ohin loron tanba fó inpaktu mós ba nia nu’u ne’ebé ladun folin iha loron hirak ne’e tanba ema ladun halo movimentu iha kalan no sira tenki fila ba uma sedu.

Vendedor Nu’u laloir, Sabino de Jesus Pereira, afirma, “ami vendedores nu’u laloir nian, agora ami ta’uk. Atu hala’o ami nia moris hakarak fa’an to’o iha kalan boot, bele mós to’o iha dadersan. Ami husu ba governo oins’a tur hamutuk ko’alia ho ulun malirin, lalika greve tan situasaun hanesan ne’e.”

Nia hatutan, normalmente sira  hetan rendimentu ba loron ida nian bele to’o $50.00 to’o $60.00 maibé ikus ne’e hetan de’it $20.00 mai kraik. Situasaun hanesan ne’e halo sira tenki fila uma sedu tanba ta’uk.

Iha sorin seluk wainhira Jornalista TAFARA.TL konfirma ho Segundo Comandante Policia Nacional Timor-Leste (PNTL), Superintendente Euclides Belo iha nia kna’ar fatin, nia hateten katak situasaun seguransa la’o normal tanba parte PNTL sempre halo akompañamentu ba situasaun hotu-hotu.

“Ami halo akompañamentu, garante seguransa, prosesu hotu ami akompaña la’o di’ak teb-tebes perante enkontru Parlamentar ne’ebé mak halo liga ba debate orsamentu (Apresiasaun Programa VII Governo.Red) ne’ebé quinta kotuk liu bá ramata ona, buat hotu la’o di’ak,” tenik Euclides iha nia kna’ar fatin, Caicoli Dili, 23/10.

Nia salienta liu tan katak situasaun gerál iha Munisipiu Dili normal. Tanba ne’e mak lalika fiar rumoris ne’eb’e mak fó sai liu husi media sosiál kona-ba estadu de sítiu tanba informasaun ida ne’e la los. Parte PNTL nafatin halo serbisu movimentu tranzitu rodadiaria hodi miniza númeru acsidente, númeru insidente tanba aumenta volume serbisu.

Hafoin rona tiha informasaun husi povu babain sira, Jornalista TAFARA.TL observa katak, maske husi parte seguransa garante ona kondisaun seguransa ne’ebé mak seguru maibé povu babain sei ta’uk hela atu halo movimentu iha kalan boot, tuku 21:00 ba leten.* [Maria do Ceu | Editor: Ato ‘Lekinawa’ Costa | TAFARA.TL | 23.10.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Sistema Online Iha Klinika Becora, Fasilita Inan Isin Rua Sira

Saude nudar seitor importante iha ema ida nian moris, ho saúde ne’ebe diak sei salva …

Leave a Reply

Your email address will not be published. Required fields are marked *