Wednesday , June 19 2019
Home / Sosial & Politika / PR: FONGTIL nia Funsaun Halo Advokasia, Hakbiit No Fiskalizasaun, Hodi Garante Demokrasia Tuir Dalan Loos
Prezidente da Republika, Dr. Francisco Guterres Lú Olo hatoo deskursu iha enkontru annual FONGTIL iha Salao Paraquial São José. [Foto: Media PR | 19.11.2018]

PR: FONGTIL nia Funsaun Halo Advokasia, Hakbiit No Fiskalizasaun, Hodi Garante Demokrasia Tuir Dalan Loos

Forum ONG Timor-Leste [FONGTIL] organiza enkontru jeral annual, liu hosi enkontru jeral refere Prezidente da Republika Francisco Guterres Lú Olo hatoo deskursu katak FONGTIL hala’o enkontru jerál anuál hodi asegura no garante transparénsia no responsabilidade, nu’udar entidade-mahon ida, ho interese públiku ba interese públiku.

Enkontru jerál anuál fó mós oportunidade ba organizasaun-membru sira hodi envolve-an iha prosesu fó hanoin konstrutivu no foti desizaun, iha nível koordenasaun as liu, hodi haburas no hametin liután FONGTIL nia knaar husi ámbitu kooperasaun institusionál ba interese públiku.

“Ha’u hatene katak Organizasaun Sosiedade Sivíl hala’o ona susesu lubuk ida no oioin, maski hasoru dezafiu no difikuldade oioin. Ida mak difikuldade orsamentál. Biar nune’e, imi-nia vontade, dedikasaun no korájen atu kontribui ba rai ida-ne’e boot no metin ba nafatin”, hateten Lú Olo

Prezidente Lú Olo hatutan katak organizasaun sosiedade sivíl hatuur-an ho autonomia rasik, no iha papél importante atu haforsa Estadu-de-Direitu Demokrátiku, nu’udar parseiru Governu nian. Organizasaun Sosiedade Sivil iha funsaun prinsipál tolu hanesan advokasia ka sosializasaun, empoderamentu ka hakbiit no fiskalizasaun hosi sosiedade sivíl atu garante demokrasia la’o tuir dalan loos.

Promove advokasia ka sosializasaun ba setór hotu atu haburas-an ba beibeik tuir interese sidadaun sira-nian. Promove atu bele influensia polítiku sira atu hamosu polítika públika di’ak no nune’e, bele fó benefísiu ba sidadaun hothotu. Hala’o empoderamentu ka hakbi’it sosiedade ninia koñesimentu no kapasidade hodi partisipa maka’as no ho responsabilidade no efisiénsia, iha prosesu dezenvolvimentu nasionál.

Iha salao Paraquial São Josê, loron 19/11, Prezidente Lú Olo mos hatete funsaun fiskalizasaun mak knaar ne’ebé sosiedade sivíl halo hamutuk ho média, nu’udar observador permanente ba lala’ok prosesu demokrasia. Sosiedade sivíl presiza monitoriza no fó-hanoin ka hato’o idéia konstrutiva ba Governante sira, hodi bele hala’o sira-nia knaar ho di’ak. Atu halo knaar ne’e ho di’ak, sosiedade sivíl presiza hatene kona-ba direitu no devér sidadaun sira-nian, tuir Konstituisaun RDTL haruka. Knaar importante sira ne’e lori sosiedade sivíl kontribui ba edukasaun no partisipasaun sidadaun sira-nian, iha prosesu hametin Estadu-de-Direitu Demokrátiku no Dezenvolvimentu Nasional, hatuur iha prinsípius no valores ne’ebé garante katak, “estadu Timor-Leste servi duni ita-nia ema ho dignidade”. * [ Zevonia Vieira | TAFARA.TL | 19.11.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *