Friday , September 21 2018
Home / Sosial & Politika / PR Husu PARPOL No Koligasaun Sira Esplika Programa Ne’ebe Kualidade Ba Povu
Prezidente da Republika momentu halo deskursu iha tomada de posse ba membru Governu [Foto: Media PR}

PR Husu PARPOL No Koligasaun Sira Esplika Programa Ne’ebe Kualidade Ba Povu

“Ho respeitu, esplika didiak no fo hatene programa liga ho medida saida mak sira sei foti, atu hadia kualidade edukasaun no saude? Dala ida ne’ebe sira sei tuir, atu hadia povu nia moris no povu nia ekonomia? Oinsa los mak sira hakarak ukun povu? Oisan los mak sira hakarak ukun povu? Oinsa sira nia hanoin konaba povu nia partisipasaun, hodi ukun nasaun Timor-Leste?”. Lú Olo

Relasiona ho eleisaun antesipada ne’ebe besik ona, no tuir Dekretu no. 07/2018, Prezidente da Republika, Dr. Francisco Guterres Lú Olo, hatoo ba povu katak Prezidente da Republika ho hraik an, agradese ba povu Timor-Leste tanba fo fiar ba tomak ba Prezidente.

“Povu fo ezemplu diak ba mundu, katak hatene hein ho maturidade, kompriende no simu didiak Prezidente da Republika nia desizaun hodi konvoka eleisaun antesipada, tuir Konstituisaun no lei haruka”, hateten PR Lú Olo.

Eleisaun antesipada ne’ebe sei monu iha loron 12 Maiu, Lú Olo fo hanoin ba partidu politiku no koligasaun sira, katak sei halao kampanna eleitoral durante fulan ida. Iha fulan ida nia laran politiku nain sira sei hakbesik an ba povu. Lú Olo fo hanoin katak ho respeitu, esplika didiak no fo hatene programa liga ho medida saida mak sira sei foti, atu hadia kualidade edukasaun no saude? Dala ida ne’ebe sira sei tuir, atu hadia povu nia moris no povu nia ekonomia? Oinsa los mak sira hakarak ukun povu? Oisan los mak sira hakarak ukun povu? Oinsa sira nia hanoin konaba povu nia partisipasaun, hodi ukun nasaun Timor-Leste?

Xefe Estadu ne’ebe dekreta ona katak, fo fila fali ba povu atu ba vota liu hosi eleisaun antesipada, liu hosi lia menon Xefe Estadu ne’e hateten katak Prezidente da Republika fiar povu nia partisipasaun iha eleisaun ida ne’e sei aas, atu fo mesajen momos ba politiku sira.

“Povu sei partisipa, no sei rona didiak Partidu Polítiku sira-nia programa hodi ukun, sira-nia planu atu hadia povu nia moris, sira-nia dalan atu lori nasaun Timor-Leste ba dezenvolvimentu. Prezidente da Republika, hanesan aman ba nasaun fo hanoin no husu, ba ita ida-idak katak, tenke respeita Povu Timor-Leste. Juventude, feto no mane sira hotu, tenke hakruk ba katuas, ferik sira, hanesan mos ba sira-nia maluk sira. Kampanna laos tempu atu fahe Povu, kampanna atu hametin unidade, iha Povu nia leet, bazeia ba programa ne’ebé diak liu ba povu nia moris. Ita labele fo fatin ba ema aproveita períodu kampanna, insulta malu, fahe malu bazeia ba saída de’it, autonomista ka nasionalista, relijiaun, rasa, frente klandestina, armada ka diplomátika. Ita uma-kain ida deit, nasaun Timor-Leste. So ema ne’ebe la hadomi Povu Timor-Leste mak bele aproveita kampanna hodi fahe Povu, kuda ódiu, ka halo vingansa ba malu”, hateten Lú Olo

 Tuir Lú Olo katak, Timor nia kultura no demokrasia la hanorin atu insulta malu, povu la gosta bainhira la respeitu inan no aman, la respeitu nain ulun sira, tempu to ona atu fo liman ba malu.

Prezidente da Republika husu ba militante no simpatizante Partidu Polítiku hotu atu prepara-an, no ajuda aprezenta didiak sira-nia programa. Esplika ba Povu tamba saída mak sira-nia programa diak liu, “ita hotu tenke tane aas interese Povu no Nasaun ida ne’e nian. Ita hotu tenke serbisu hamutuk ba Paz no dezenvolvimentu, ba estabilidade no progresu hodi kaer metin nafatin domin, lia lós no justisa iha ita-nia rai lulik Timor-Leste.

Prezidente da Republika liu hosi nia mesajen, ne’ebe hatoo iha loron 20/02, hatoo mos obrigadu wain ba igreja katolika nia hirarkia, ba konfisoens relijioza, ba sosiadade sivil, juventude, feto no veteranu laos fo deit fiar ba Prezidente da Republika, maibe ajuda esplikasaun situasaun no halo povu sente komprende no tur hakmetek.

Ba Partidu Politiku sira Prezidente da Republika hatoo obrigada wain tanba simu ho liman rua ba desizaun hodi konvoka eleisaun antesipada. *[Zevonia Vieira | TAFARA.TL | 20.02.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus

“Estadu tenke haree oinsa mak bele asegura finansiamentu ba despeza públika liu hosi reseitas hosi …

Leave a Reply

Your email address will not be published. Required fields are marked *