Tuesday , May 21 2019
Home / Sosial & Politika / PR Lu-Olo Agradese CNC Nia Apoio ba Pe. Martinho Gusmao Nia Livro
Presidente da Republika, Dr. Francisco Guterres Lú Olo ho Espoza Cidália Lopes Guterres, Pe.Martinho Gusmao hasai foto hamutuk ho ekipan Centro Nasional Chega! iha palacio prezidensia. [Foto: Media Gabinnete PR | 30.11.2018]

PR Lu-Olo Agradese CNC Nia Apoio ba Pe. Martinho Gusmao Nia Livro

Presidente da Republika Fransisco Guterres Lu-Olo hato’o lia agradesementu ba Centru Nacional CHEGA! (CNC) no Fundasaun Dato Siri Loe II iha lansamentu livro “Sabemos, e Podemos, e Devemos Vencer!” ne’e autoria hosi Pe. Martinho Gusmao, ohin (30/11). Agradementu ne’e fo tanba instituisaun rua ne’e tulun ona Pe. Martinho Gusmao hodi halo nia peskija to’o ba publikasaun livro ida ne’e.

“Reverendu Senor Padre simu apoio no hatene onra kontribuisaun sira ne’ebe simu, hodi halo peskija, entrevista ema no halibur buat sira ne’ebe importante liu atu ita estuda Nicolau Lobato no buat sira ne’ebe nia husik hela ba ita hothotu,” Presidente Lu-Olo hatete.

Iha lansamentu ne’e autor livro mos agradese individu sira mak fo tulun ba nia, no mos ba CNC ho Fundasaun Dato Siri Loe II.

Bainhira husu ba Diretur CNC kona ba tulun mak fo ona Pe. Martinho Gusmao no posibilidade atu tulun inisiatva mak hanesan iha future mai. Diretur CNC, Hugo Fernandes esplika, “dala uluk CNC hakarak fo parabens ba Autor ba livro, “Sabemos, e Podemos, e Devemos Vencer!” tanba konsege kompleta ona ninia obra no bele lansa iha loron ohin. Ba obra ida ne’e CNC fo kontribuisaun ba kustu hodi ba halo peskija iha Portugal, Indonesia, no mos sosa fotografia saudoso Nicolau Lobato nian hosi Diariu Noticia hodi tau iha livru ne’e. CNC mos ajuda buka hetan arkivu audio sira hosi Australia.”

Hugo Fernandes mos dehan apoio ne’ebe fo nudar parte ida hosi implementasaun Rekomendasaun CHEGA! nian.

“Apoio ne’ebe CNC fo nudar parte iha ho implementasaun Rekomendasaun Chega! nian, liliu parte implementasaun programa memorializasaun. Tanba relatoriu Chega! hatete katak presija dezenvolve material edukativu sira kona ba istoria luta Timor-Leste nian hodi nune’e bele uza nudar materia edukasaun,” Hugo auementa.

Hatutan mos dehan, “CNC iha komitmentu atu kontinua apoio inisiativa mak hanesan iha futuru. Maibe apoio sira ne’e sei tuir orsamentu mak CNC iha no bainhira halao sei halo tuir sitema no mekanizmu mak establese ona iha CNC.”

Seremonia lansamentu livro ne’e halao iha Palasio Presidente, ohin (30/11), partisipa hosi Presidente Tribunal Rekursu, Membru Governo, Korpu Diplomatiku, Kombatente Libertasaun Nasional, Centro Nacional Chega!,ho sosiedade sivil sira. * [ Zevonia Vieira | TAFARA.TL | 30.11.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *