Tuesday , March 26 2019
Home / Sosial & Politika / PR Lú Olo Hamenu Orgaun Komunikasaun Sosial no Jornalista Atu Iha Kapasidade Investigativu
Prezidente Konselho Imprensa ho ekipa halo entrevista ho jornalista sira iha palacio Prezidensia [Foto: Zevonia Vieira | 11.12.2017]

PR Lú Olo Hamenu Orgaun Komunikasaun Sosial no Jornalista Atu Iha Kapasidade Investigativu

“Jornalista sira labele kazuistiku katak foti kazu ida sai nutisia, la hatene kazu ne’e akontese oinsa, keta halo ema planu kleur ona mak akontese, ita la investiga tuir entaun ema rona informasaun tiha, aban haluha tiha”. Virgillio Guterres

Presidente Konselho Imprensa ho ekipa hasoru malu ho Prezidente da Republika, hodi apresenta servisu Konselho Imprensa nian ne’ebe durante ne’e halao ona.

Hafoin remata enkontru ho Prezidente da Republika, Prezidente Konselho Imprensa, Virgillio Guterres ba jornalista hateten objetivu hosi enkontru ne’e hodi informa kona ba servisu ne’ebe Konselho Imprensa halao ona no sei halao iha tempu badak, konaba preokupasaun saida mak KI iha area liberdade komunikasaun no informasaun nian no konvida Prezidente da Republika atu partisipa iha seremonia atribuisaun karteira professional ba jornalista sira iha 20 Dezembru.

“Iha area informasaun saida mak KI halo ona durante ne’e kona ba kodigu etika, regulamentu atribuisaun professional nian, regulamentu direitu de resposta mediasaun, informasaun saida mak KI halo ona, hanesan Dili Dialog Forum ne’ebe halo liu hosi aniversario ba dala uluk KI nian no tinan oin sei kontinua halao, informa mos oinsa KI sai ona membru ba plata forma identidade regulador komunikasaun social CPLP nian. Kona ba preokupasun ne’ebe ami kompartila ho Prezidente da Republika, liu-liu kona ba kuadrus legais sira ne’ebe ita Timor-Leste sedauk iha premeiru ita seidauk iha Lei kona ba radio no televisaun (sedauk iha Lei ne’ebe defiini konaba radio no tv komersial) no radio komunidade, entaun defisil mos KI atu halao nia knaar ne’ebe Lei haruka, koalia konaba kontiudu ne’ebe dala ruma viola direitu publiku nian, KI labele lao tanba Lei seidauk iha”, esplika Virgillio Guterres.

Iha enkontru refere Konselho Imprensa hatoo preokupasaun ba Prezidente da Republika, Francisco Guterres Lú Olo, ba intervensaun sira hodi fo hanoin ba politiku sira atu iha sira nia komunikasaun politika, hatoo sira nia lia fuan ka linguazen ne’ebe bele tulun jornalista sira bele hatoo informasaun ba publiku klaru liutan.

“Ami koalia dehan bainhira politiku sira uza linguazen ne’ebe jornalista sira mos la intende, entaun jornalista sira mos ba hatoo informasaun ne’ebe la klaru no oinseluk tiha”, hateten Virgillio.

Hatan ba TAFARA.TL liga preokupasaun hosi KI no Prezidente da Republika nian kona ba servisu komunikasaun social ba iha situasaun politika. Virgillio responde katak ba politiku sira Prezidente hateten, promete sei uza nia kompetensia hatoo intervensaun no Prezidente hamenu ba meius komunikasaun social, liu-liu ba jornalista sira atu iha kapasidade investigative.

“Prezidente dehan jornalista sira labele kazuistiku katak foti kazu ida sai nutisia, la hatene kazu ne’e akontese oinsa, keta halo ema planu kleur ona mak akontese, ita la investiga tuir entaun ema rona informasaun tiha, aban haluha tiha. Atu nune’e informasaun ne’ebe hato publiku ema bele intende no rona didiak kazu ne’e ninian akontesementu”, esplika Virgillio

Liu hosi enkontru ne’ebe halao iha loron 11/12, iha Palacio Prezidensia Bairo Pitte, Prezidente KI informa katak Prezidente sei koalia ho governu hodi hare ba iha nesesidade investe iha area informasaun ho jurnalistiku nian. Timor ranking premeiru lugar ba iha liberdade imprensa nian avansadu oituan liu iha sudeste aziatiku maibe hare ba kontiudu nutisia sei preokupante. Ho formasaun bele ajuda hasae kualidade, hanesan estabelese Institute Sentru Formasaun ba jornalista sira, investe ba universidade ne’ebe mak iha ona, atu bele produs ema lisensiadu sira ne’ebe hakarak sai jornalista.

Liu hosi komunikadu imprensa media Prezidente da Republika nian hatoo katak Prezidente da Republika apresia servisu Konselho Imprensa nian no enkoraza atu kontinua hakat ba oin, maske agora hasoru dezefou oin-oin, liu-liu iha relasaun ho hasa’e kapasidade investigative ba jornalista sira atu hametin liutan demokrasia.*[Zevonia Vieira | TAFARA.TL | 11.12.2017]

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Prezidente da Republika Promulga OJE 2019

Prezidente da Repúblika, Dr. Francisco Guterres Lú Olo, ohin, promulga Lei N. 5/V-Orsamentu Jerál Estadu …

Leave a Reply

Your email address will not be published. Required fields are marked *