Sunday , June 24 2018
Home / Sosial & Politika / PR Lú Olo: Hau Halo Tuir Konstituisaun, Hau La Tuir Partidu ka Ema Ida nian Hakarak
Prezidente da Republika, Dr. Francisco Guterres Lú Olo hato deskursu iha abertura loron nasional veteranu iha CCD. [Foto: Media PR | 02.03.2018]

PR Lú Olo: Hau Halo Tuir Konstituisaun, Hau La Tuir Partidu ka Ema Ida nian Hakarak

“Tinan ida nia laran hau la ba iha CCF para atu ba halo servisu partidu nian. Hau la tuir nen partidu ida nian hakarak, nen ema ida ka rua nian hakarak. Hau tuir deit saida mak Konstituisaun fo hatene mai hau no mandate ne’ebe povu fo mai hau atu kumpri”. Lú Olo

Ohin loron povu Timor-Leste hamutuk hodi selebra loron aniversariu restorasaun independensia ba dala 16. Liu hosi deskursu Prezidente da Republika, Dr. Francisco Guterres Lú Olo, iha loron 20/05 iha palacio governu ba partisipante tomak hateten hafoin luta naruk ida ba libertasaun nasionál, Restaurasaun Independénsia sai loloos hanesan rekoñesimentu hosi komunidade internasionál ba identidade nasionál Timoroan, ne’ebé hatudu povu nia determinasaun no laran-metin. Fini nasionalista ne’ebé kuda hosi saudozu Nicolau no ninia maluk sira – balun sei moris hela – ikusmai fó fuan ne’ebé midar mai ita no ita-nia oan sira moris iha Timór nu’udar nasaun ne’ebé livre.

Lú Olo reflekta katak loron 20 Maiu hatudu momos nasaun nia kapasidade atu fo liman ba malu, reziste no manan.

“Restaurasaun Independénsia hatudu momoos ita-nia Nasaun nia kapasidade, atu halo ita-nia valores, tradisaun no lisan nakfila ba instrumentu hirak ne’ebé uza hodi halo sai realidade ita-nia mehi, no ita-nia bei’ala sira-nia mehi, atu harii futuru ida ne’ebé di’ak liután iha rain ida ne’ebé di’ak liután. Ohin ita selebra Aniversáriu Restaurasaun Independénsia ba dala 16, hafoin ita-nia povu hatán tiha ba dezafiu foun ida, katak eleisaun antesipada. Durante prosesu tomak ne’e, ita-nia povu hato’o nia hakarak ho hakmatek, nune’e hametin demokrasia, estabilidade no pás, hanesan ha’u temi ona”, reflekta Lú Olo.

Tinan ida iha loron restorasaun independensia RDTL, Prezidente da Republika kompleta tinan nudar Prezidente da Republika, hodi hala’o knaar ne’ebé povu fó fiar mai. Tuir Lú Olo katak tinan ne’ebe nakonu ho dezafius ba povu hotu.

“Lakleur hafoin ha’u simu xefia Estadu nian, nasaun hasoru situasaun polítika foun ida ne’ebé hanetik ka hamosu obstákulu hasoru aprovasaun ba leis no instrumentu konstitusionál seluseluk ne’ebé importante tebetebes hodi bele ukun. Ha’u enfrenta dezafiu foun ne’e, hodi foka ba preokupasaun fundamentál rua, no prioridade rua, mak hanesan halo tuir Konstituisaun RDTL no halo tuir kompromisu sira-ne’ebé ha’u halo ba n,asaun hori-bainhira ha’u simu knaar xefia Estadu nian. Ha’u hala’o konsultasaun ne’ebé kle’an ho sosiedade sivíl no tau konsiderasaun ba interese nasionál. Ha’u halo avaliasaun ba kondisaun estabilidade sosiál no estabilidade polítika iha Parlamentu ne’ebé nesesáriu hodi asegura kondisaun sira-ne’ebé presiza hodi lori ba oin ita-nia projetu nasionál atu dezenvolve nasaun no diversifika ekonomia nasionál”, afirma Lú Olo.

Tuir Lú Olo katak Konstituisaun mak sai matadalan ba Prezidente Republika nia reflesaun kona-ba kompromisu sira-ne’ebé mak foti hori-bainhira toma pose, atu Sai garante ba unidade Estadu nian no karater unitáriu RDTL nian no hala’o knaar atu halibur povu tomak, sei la haree ba ema ida-idak ninia partidu, ninia estatutu sosiál no ekonómiku, relijiaun ka etnia. Ne’e katak kompromisu atu sai hanesan Prezidente hotu-hotu nian no ba ema hotu.

Bainhira TAFARA.TL halo entrevista ho Prezidente Lú Olo loron restaurasaun independensia,liga ho deklarasaun hosi Prezidente AMP, Xanana Gusmao katak labele sai Prezidente partidu maibe tenke sai Prezidente da Republika.

Lú Olo responde katak komprimisiu uluk ne’e, kumpri hela nafatin, “tinan ida liu tiha ona, hau assume hau nia mandatu hanesan Prezidente da Republika no Prezidente ba povu tomak. Tinan ida nia laran hau la ba iha CCF para atu ba halo servisu partidu nian, buat hotu ne’ebe Prezidente da Republika halo mak halo tuir Konstituisaun no Lei sira ne’ebe hateten. Hau la tuir nen partidu ida nian hakarak, nen ema ida ka rua nian hakarak. Hau tuir deit saida mak Konstituisaun fo hatene mai hau no mandate ne’ebe povu fo mai hau atu kumpri”. * [ Zevonia Vieira | TAFARA.TL | 20.05.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Sistema Online Iha Klinika Becora, Fasilita Inan Isin Rua Sira

Saude nudar seitor importante iha ema ida nian moris, ho saúde ne’ebe diak sei salva …

Leave a Reply

Your email address will not be published. Required fields are marked *