Saturday , November 17 2018
Home / Sosial & Politika / PR Lú Olo Sei Halo Dialogu Ho Partidu Lima iha 23 Janeiru no Konsellu Estadu Iha 24 Janeiru
Prezidente da Republika, Dr. Francisco Guterres Lú Olo hatoo mesajen povu Tomak .[Foto: Media gabinete Prezidente da Republika].

PR Lú Olo Sei Halo Dialogu Ho Partidu Lima iha 23 Janeiru no Konsellu Estadu Iha 24 Janeiru

Prezidente da Republika, Dr. Francisco Guterres Lú Olo, aban loron 23/01 sei halo konsulta ho Partidu politiku ne’ebe hetan asentu iha Parlamentu Nasional no iha loron 24/01 Prezidente da Republika konvoka enkontru dahuluk ho Konsellu Estadu.

Tuir komunikada imprensa hosi media Palacio Prezidente, informa katak Xefe Estadu sei aproveita sorumutu ho partidu polítika sira hanesan mós reunian Konsellu Estadu, hodi rona opiniaun ikus husi partidu ida-idak no membru sira Konsellu Estadu nian, molok foti desizaun hodi hakotu atuál impase polítika ne’ebé país infrenta.

Tuir orariu ne’ebe sei realiza iha loron 23/01, hodi halo dialogu ho Partidu liman mak, Prezidente da Republika ho partidu Fretilin iha oras 09:00 dader, Partidu CNRT iha oras 10:00, PLP iha oras 11:00, ho Partidu Demokratiku iha oras 15:00 lokraik no ikus liu ho partidu KHUNTO iha oras 16:00 lokrarik

Iha komunikadu imprensa mos informa katak iha Kuarta feira, loron-24, óras 09:00 OTL, Prezidente da Republika sei hasoru malu ho membru Konsellu Estadu, ba periodu 2017 – 2022, kompostu hosi atuál Xefe-de-Estadu, eis Prezidente-da-Repúblika sira, atuál Prezidente Parlamentu Nasionál, atuál Primeiru Ministru, hola mós parte membru sira ne’ebé Parlamentu Nasionál mak hili hanesan: José Marcelino Cabral Belo, Aurora Ximenes, Virgílio da Costa Hornai, Virgílio Smith, José dos Santos “Naimori Bukar” no membru sira ne’ebé nomeia husi atuál Prezidente-da-Repúblika mak hanesan Oscar Lima, Faustinho Godinho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes.

Iha komunikada imprensa mos hatutan liutan katak, molok ne’e, desde fulan Outobru 2017, Prezidente da Republika, Francisco Guterres Lú Olo hala’o tiha ona dialogu ho entidade oioin hanesan konfisoen relijioza sira, reprezentante veteranu, reprezentante organizasaun juventude rezisténsia, organizasaun sosiedade sivil, organizasaun estudantil hodi rona sira-nia opiniaun atu bele foti desizaun hodi hakotu impase polítika ne’ebé mosu hafoin formasaun VII Governu Konstitusionál.*[Zevonia Vieira | TAFARA.TL | 22.01.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *