PR Lú Olo Sei hasoru Amo Bispo Nain Tolu, Hodi Rona Opiniaun Ba Situasaun Politika

Prezidente da Republika, Dr. Francisco Guterres Lú Olo sei hasoru malu ho Amo Bispo nain tolu.

Liu hosi komunikadu imprensa hosi palácio Prezidente esplika katak, Bispu Dom Basilio Nascimento, Dom Virgilio do Carmo da Silva no Noberto do Amaral sei halao sorumutu, iha loron 10 Novembru, iha palácio Prezidente Nicolau Lobato.

Iha komunikadu imprensa refere, ne’ebe hasai iha loron 8/11 informa katak Prezidente da Republika halo enkontru ho Bispu husi Dioseze Baucau, Dili no Maliana hodi rona sira nia opiniaun relasiona ho situasaun polítika ne’ebe nasaun enfrenta, hafoin opozisaun iha Parlamentu Nasionál rejeita Programa VII Governu Konstitusionál.

“Igreja Katólika nu’udar entidade ida ne’ebé iha papél importante iha prosesu luta ba ukun rasik an no kontinua signifikante iha prosesu konstrusaun nasaun Timor-Leste”, esplika iha komunikadu imprensa.

Iha komunikadu imprensa informa liutan katak Prezidente da Republika rona tiha ona opiniaun sira husi organizasaun sosiedade sivil, konfesoens relijioza no sei kontinua halibur ideia sira husi entidade oi-oin hodi buka solusaun polítika ne’ebé di’ak-liu ba Timor-Leste.*[Zevonia Vieira | TAFARA.TL | 09.11.2017]

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.