Friday , September 21 2018
Home / Eleisaun Parlamentar / PR Sei Estuda Lista Membrus Governu, Lú Olo: Hakarak Garante Bem Estar Do Estado
Prezidente da Republika, Dr. Francisco Guterres Lú Olo halo entrevista ho jornalista sira iha palacio prezidensia. [Foto: Media PR | 20.06.2018]

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B ne’e sei iha Tribunal nafatin, Prezidente da Republika aseita no nomeia nian, entaun Prezidente da Republika nia matan la hare moos ona”. Lú Olo

Prezidente da Republika simu ona lista ba membrus governu sira ne’ebe mak aprezenta hosi Primeiru Ministru nomeadu, Taur Matan Ruak, iha loron 20/06.

Liu hosi konferensia imprensa ba jornalista sira Prezidente da Republika, Dr. Francisco Guterres Lú Olo informa katak Prezidente da Republika nia kompetensia katak liu hosi interpretasaun konjugada, hosi artigu 74, artigu 86 Konstituisaun, no mos numeru 2 artigu 86 alinea H, hodi halo interpretasaun ba artigu tolu ne’e, Prezidente da Republika hateten katak sei bele hare lista ida membrus governu atu nomea ka aseita lista sira ne’e ka la aseita balun, Prezidente da Republika sei hatete iha tempu badak oin mai.

“Hau sei estuda nafatin lista membru governu ne’ebe aprezenta mai, Ministru nain 10, Vice Ministru mais menus 11, Secretariu Estadu mais menus18, total hamutuk 39 membrus governu. Prezidente da Republika sei estuda para atu bele informa fali ba sira iha tempu aban, para atu hare lista sira mak ne’e ona ka keta balun Prezidente hanoin katak sedauk bele, Prezidente sei informa fali aban ba sira”, hateten Lú Olo.

Hatan ba TAFARA.TL liga ho razaun fundamentu saida mak Prezidente da Republika uza hodi hare fila fali lista membru governu sira, karik membru balun afeta hela kazu iha Tribunal?

Ba TAFARA.TL Lú Olo hatan katak Prezidente da Republika la iha motivu pesoal ruma konaba membru governu se deit, ema hotu iha direitu hodi sai membru governu, Prezidente da Republika laiha motivu pesoal.

“Prezidente da Republika atu hateten deit katak, bainhira nia nomeia membru governu neebe mak aprezenta hosi Primeiru Ministru, katak hakarak atu garante bem estar do Estado, garante regular pensionamentu instituisaun estadu nian, ida ne’e tau iha artigu 74 Konstituisaun, ne’ebe konjuga ona artigu 106 numeru 2, hodi halo nomeasaun ba membrus governu sira ne’ebe indijita hosi Primeiru Ministru, atu nune bele hare ita nia estadu hamrik ho nia oin rasik, signifika katak estadu ho nia autoridade rasik. Governu ida ho nia autoridade rasik para bele halo nia servisu, hodi nune’e ita bele hakat ba oin, maibe Prezidente da Republika to ohin loron sedauk desidi katak atu A mak hela ka B mak hela, hau sei estuda nafatin prosesu ida ne’e”, esplika Lú Olo, iha salaun konferensia prezidensia 20/06.

Hatutan hosi perguntas TAFARA.TL konaba sekarik membru governu balun iha kazu iha tribunal, Prezidente da Republika sei pendenti? Lú Olo hatan Prezidente da Republika sei estuda hela, se to loron ida kazu hosi A ka B ne’e sei iha Tribunal nafatin, “Prezidente da Republika aseita no nomeia nian, entaun Prezidente da Republika nia matan la hare moos ona”.

Prezidente Lú Olo mos informa katak tomada de posse sei halao iha loron 22 Junhu, karik sei iha primeiru faze, no sei labele fo posse ba membrus governu sira iha hotu, liha loron refere, tanba depende bal lista membrus governu nian ne’ebe aprezenta ona ba Prezidente da Republika, “bele hotu se karik lista membru governu sira nian los hotu ona, ne’e laiha problema, maibe Prezidente da Republika sei estuda lista sira ne’e hotu, tanba ne’e se lista membru governu sedauk hotu entaun balun deit mak sei hola tomada de posse, depois sei iha segunda no terseiru faze”. [ Zevonia Vieira | TAFARA.TL | 20.06.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Prezidente da Republika Nomea Taur Matan Ruak Ba Primeiru Ministru

Prezidente da Republika, Dr. Francisco Guterres Lú Olo anunsia ba publiku katak nomea ona Taur …

Leave a Reply

Your email address will not be published. Required fields are marked *