Saturday , April 20 2019
Home / Sosial & Politika / Presidente Lú-OLo Promulga Lei ba Rai
Diskursu Presidente da Republika iha inagurasaun estatua proclamator Francisco Xavier do Amaral.[foto: Zinho MD | TAFARA.TL].

Presidente Lú-OLo Promulga Lei ba Rai

Lei ba Rai ne’ebe hetan aprovasaun hosi Parlementu Nasional fulan hirak liuba hetan ona promulgasaun hosi Presidente da Republika, antes Presidente viajen ba rai liur.

Iha komunikadu imprensa ne’ebe hasai hosi Gabinete Presidente da Republika nian hatete katak, “Sosiedade sivil, liliu ONG sira ne’ebe servisu kona ba rai nian fo hotu sira nia kontribuisaun ho ideas para konsolida diploma ida ne’e hodi bele sai hanesan Lei no haruka ba Presidente da Republika ida uluk, Sr. Taur Matan Ruak atu promulga. Hau haree katak lei ne’e bele garante ona seguransa ba ita nia populasaun sira, seguransa ba ita nia estadu, seguransa ba ema hotu-hotu ne’ebe iha dereitu ba rai.”

Bainhira TAFARA.TL hato’o notisia ne’e ba komunidade balun iha Ermera, Daniel do Carmo, nudar membru komunidade hatete katak, ‘ne’e ‘kemenangan’ bo’ot ba povo Ermera tanba bele resolve ona kazu rai barak ne’e akontese iha Ermera.’

Diretor HAK, Manuel Monteiro, haksolok ho promulgasaun Lei ba Rai ne’e no espera katak lei bele ajuda resolve problema rai ne’e durante ne’e akontese.

“HAK nia expetativa katak lei ne tenki promulga duni hodi garante sidadaun ida-idak nia asesu ba rai. Importante liu tan tanba kazu krimi ne’ebe liga ho rai okupa numeru a’as liu, inklui mos kazu violensia domestika. Tanba ne’e mak hau hanoin katak promulgasaun lei ba rai ne’e bele ajuda resolve kazu rai ne’ebe komunidade sira hasoru,” Manuel Monteiro hatete.

Koordernador Lao Hamutuk, Juvinal Dias, ladun kontente ho kontiudu lei ne’ebe promulga, liliu artigu 8. Maski nune’e nia hatete katak promulgasaun ne’e kompetensia Presidente nian.

“Ne’e kompetensia Presidente da Republika nian, maibe ami nia hanoin katak importante liu mak lei ida ne’e labele hamate ka halakon dereitu povo Timor-Leste nian ba sira nia moris diak. Lao Hamutuk nia hanoin iha artigu 8, kona ba Dominiu Publiku, fo spasu boot ba governo atu foti rai, tanba lei ne’e hatete katak bainhira rai ida iha riku soin rekursu mina rai iha okos, rai nain la iha direitu no labele klaim, ka hetan deit kompensasaun. Ami hanoin katak meius ida ne’e sei halo povo barak mak sei lakon ninia rai. Purezemplo projetu Tasi Mane no projetu sira ne’ebe Timor Gap sira sei halo perfurasaun mina rai iha rai maran, ne’e sei halo estadu foti rai hosi komunidade,” Juvinal Dias hatete.

Antes Lei ba Rai ne’e hetan aprovasaun hosi Parlementu Nasional no hetan promulgasaun hosi Presidente da Republika, ONG sira, inklui hirak ne’ebe hamutuk iha Rede Ba Rai (RBR) halo ona advokasia hodi husu halo mudansa ba lei refere. Rede Ba Rai mos hatama sira nia rekomendasaun ba Presidente da Republika hodi promulga lei ne’e tanba konsidera katak Lei ne’e hakerek ona buat diak barak ne’ebe komunidade hakarak.*[Ato ‘Lekinawa’ Costa | TAFARA.TL | 02.06.2017].

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *