Prezidente da Republika Lú Olo Nomeia Mari Alkatiri ba Premeiru Ministru

Prezidente da Republika, Dr. Francisco Guterres Lú Olo, nomeia Dr. Mari Alkatiri, atu sai Premeiru Minsitru ba VII Governu Konsitituisional, liu hosi dekretu Prezidente da Republika.

“Iha loron 13/09, partidu koligasaun PD no Fretilin, sira mai aprezenta ba kargu Premeriu Ministru ba VII Governu Konstituisional. Ba sidadaun Timor-Leste, Prezidente da Republika iha biban ida ne’e, hodi fo hatene ba publiku tomak, depois rona tiha sira nia relatorio no desizaun koligasaun nian, maibe Prezidente da Republika hato’o ba sira katak, hahu hosi momentu ne’ebe, ita boot sira mai aprezenta, kandidatu ba kargu Premeiru Ministru nian, Prezidente da Republika hola nia kompetensia tuir Konstituisaun, para atu nomeai Premeiru Ministru indizita mai iha Prezidente da Republika”, esplika Dr. Lú Olo.

Dr. Lú Olo afirma liutan katak, Prezidente da Republika hola nia kompetensia Konstituisional, artigu 106 no 85 alinea D, Prezidente da Republika nomeia Dr. Mari Alkatiri atu sai Premeiru Ministru ba VII Governu Konstituisional, liu hosi dekretu Prezidente da Republika nian.

Prezidente da Republika, fo hatene ba povu tomak, hodi bele hakmatek nafatin, tanba lakleur deit Prezidente da Republike sei fo posse ba VII Governu Konstituisional.

Hatan ba perguntas hosi TAFARA.TL, liga ho asumtu koligasaun ne’ebe KHUNTO la hamutuk ho PD no Fretilin, hodi asina dokumentus koligasaun. Aprosimasaun saida mak Prezidente da Republika uza, hodi halo aprosimasaun ba partidu koligasaun sira, hodi mantein unidade nasional no garante estabilidade nasional, hodi forma governu foun?

Dr. Lú Olo esklarese katak, iha dokumentu koligasaun ne’ebe partidu mais votadu ho PD entrega, esplika katak sira nakloke ba nafatin iha tempu oin.

“Portantu ba ohin, ba aban, bainrua no to bainhira governu ne’e fungsiona, sei nakloke nafatin hela deit. Iha posibilidade nafatin, atu partidu politiku sira hotu sei bele kontinua halo dialogu nafatin. Iha tempu oin mai ho sentidu ida, atu bele garante paz no estabilidade no liu-liu atu garante estabilidade governativa iha tinan lima mai oin”, hateten Dr. Lú Olo.

Ba jornalista sira iha salaun konferensia imprensa, Palacio Prezidente, 14/09. Prezidente Lú Olo hatoo katak, iha sorumutu ho partidu PLP no CNRT, sira afirma katak, sira mantein pozisaun nudar opozisaun, maibe laos opozisaun ida ne’ebe atu ba destroi, maibe opozisaun ida para atu konstrui, atu ba harii no atu ba hadia.

“Ba interese nasaun no povu nian, naturalmente CNRT no PLP, sei nafatin fo nia apoiu iha Parlamentu Nasional, para atu bele husik liu orsamentu do governu, hodi bele lao ba oin. Ida ne’e hau nia intendimentu ba postura politika ida ne’ebe positivu tebes”, hateten Eiz-Prezidente Parlamentu Nasional iha I legistalatura.

Prezidente da Republika informa ba jornalista sira katak, la duvida, “hau hatete ba sira katak bele avansa ho governu minoritaria maibe governu minoritaria ne’e sei hametin sira nia vontade forte, atu bele forma governu no bele ukun. Importante mak iha sosiedade politiku tenke hanoin, atu oinsa mak bele asegura estabilidade governativa ne’e ba oin”.

Tuir Prezidente Lú Olo nian hanoin katak , elisaun antisipada sei la fo benefisiu ba nasaun no povu tomak, tanba povu hakarak mak ukun nain sira tenke halo dezenvolvimentu ba oin, ida ne’e mak rezultadu hosi elisaun parlamentar nian. Lider partidu sira hotu, hodi kontinua lao hamutuk nafatin, hodi halo dezenvolvimentu ba ita nia rai, hodi responde nesesidade povu nian.* [Zevonia Vieira | TAFARA.TL | 14.09.2017].

One thought on “Prezidente da Republika Lú Olo Nomeia Mari Alkatiri ba Premeiru Ministru

  1. sempre respeito kada lideranca. importante liu mak Hadomi Povu no Hadomi RDTL no Hadook an husi Korupsaun , Kolusaun no Nepotismo.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.