Wednesday , June 19 2019
Home / Eleisaun Parlamentar / Prezidente Undertim: Sei harii Ministeriu Veteranus Sekarik Ukun
Prezidente Partidu Undertim, Januario de Fatima da Costa (Malemo), halo kampanna politiku iha Municipio Liquica.[Foto: Emanuel Andrade| TAFARA.TL | 25.06.2017].

Prezidente Undertim: Sei harii Ministeriu Veteranus Sekarik Ukun

Visaun partidu Undertim, hakarak valoriza veteranus rezistensia sira hodi responde sira nia problema, liu husi kria ministeriu veteranus ida,  bainhira hetan fiar hosi povu hodi ukun.

Lia fuan ne’e hato’o hosi Prezidente Partidu Undertim, Januario de Fatima da Costa (Malemo), bainhira halo kampanna politiku.

“Undertim proposta aban bainrua hakarak ka lakohi governu forma ministeriu veteranus ida, para nune’e bele organiza no mobiliza, hodi bele resolve no responde veteranus rezistensia sira hotu. Istoria tau iha fatin, la bele sai ikus ida-idak konta ninia istoria, haluha tiha povu nia istoria no nasaun nia istoria”, dehan lideransa partidu Undertim iha deskursu bainhira hala’o kampana iha munisipiu Liquiçá, Postu Administrativu Liquiçá (25/06).

Prezidente Partidu Undertim ne’e mós reforsa tan katak, kria Ministeriu Veteranus ida, atu nune’e hadi’a Lei Veteranus no haree ba sira nia ekonomia no moris ne’ebé diak.

Entertantu Vise Prezidente Partidu Undertim Aquilis, iha nia diskursu realsa katak, ohin loron veteranus barak mak sei vitima, no hirak ne’ebé halo Lei Veteranus sem konvida veteranus sira, maibe adopta fali Lei husi rai liur.

Iha fatin hanesan, Koordenadora Partidu Undertim Munisipiu Liquiçá, Agostinha dos Santos ba Jornalista TAFARA.TL, hateten katak Undertim halo nia komprimisiu politiku katak sei tau prioridade ba feto faluk no oan kiak sira, luta ba dezenvolvimentu, agrikultura, edukasaun no saude.

“Ami hakarak liberta feto faluk ho oan kiak sira iha Timor-Leste tomak, ami luta ba objetivu dezenvolvimentu sustentavel iha agrikultura, iha edukasaun, saude iha infrastrutura iha seguransa alimentar seguransa nasional, hanesan forsa sira ida ne’e mak ami hakarak povu ne’e tenke moris diak, tenke badinas la bele baruk,” dehan Koordenadora ba TAFARA.TL.

Kampanna ba dala tolu ne’ebé mak hala’o husi Partidu Undertim iha Liquiça Villa,tuir observasaun husi jornalista TAFARA.TL, lao ho hakmatek no hetan observasaun hosi PDHJ, CNE, Observador internasional no parte seguransa PNTL.* [Emanuel Andrade| TAFARA.TL | Editor: Zevonia Vieira | 25.06.2017].

About Emanuel Andrade

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *