Saturday , November 17 2018
Home / Divertimentu / Prosesu Selesaun Atleta Silat Ba Asian Games Tenki Para, Tamba Mosu Konfrontasaun
Federasaun Silat Timor-Leste (FESTIL) halo hela diskusaun konaba selesaun atleta ba Asian Games. [Foto: Maria do Ceo | 08.04.2018]

Prosesu Selesaun Atleta Silat Ba Asian Games Tenki Para, Tamba Mosu Konfrontasaun

“Prosesu selesaun ba ohin loron ne’e, tenki para iha ne’e, atu nune’e bele hamate konfrontu ne’ebé mak akontese no husik treinador ida-idak, husi organizasaun tolu ne’e mak indika ninia atleta ne’ebé merese hakat ba etapa TC nian”. Juaquim dos Reis

Asian Games 2018 ne’ebe sei halao iha Jakarta-Indonesia iha fulan Agustu, sai hanesan dezafiu boot ida mai Timor –Leste, oinsa atu hametin liutan preparasaun ba ekipa sira hodi prontu ba tuir kompetisaun refere.

Liu hosi Federasaun Silat Timor-Leste (FESTIL) halo selesaun ba atleta husi organizasaun tolu, Padjajaran Nasional, Seruling Dewata no Perisai Diri (PD), husi organizasaun tolu ne’e kompostu husi feto 14 no mane 48, hodi reprezenta Timor-Leste.

Chefe Planeamento Administração e Finanças, António Lobo Pinto esplika ba jornalista TAFARA.TL nu’udar meius ida hodi indika atleta ida ne’ebé mak bele partisipa iha Asian Games.

“Prosesu selesaun ne’e atu prepara atleta atu ba tuir eventu internasional iha Asian games ne’ebé que sei halo iha fulan Agusto. Tuir planu federasaun ninian, preparasaun atleta tuir klase ne’ebé que iha tamba jogu individu maibé depende ba governu ninia husu ba jata ba federasaun ne’e hira? Atu ba nain lima ka nain haat ka ne’e depende Secretario Estado no CDTL nian mak foti desizaun,” konfesa António Pinto iha salaun Coni, Gedung Matahari Terbit (GMT), 08/04.

Jogu dahuluk ne’ebé hala’o iha salaun Coni, Caicoli Dili, hahuu ho Seruling Dewata (sudut merah) kontra Padjajaran (sudut biru. Red). Kompetisaun dahuluk manan husi atleta Padjajaran (sudut biru. Red) hodi hakat ba etapa training center (TC) prepara mentalidade, disiplina no fízico hodi hakat ba Asian Games.

Wainhira tama ba fase jogu datoluk nian, ne’ebé mak joga husi atleta Padjajaran kontra Seruling Dewata, durante jogu nia laran, hetan konfrontu husi ema indivuál sira, hodi empata tiha jogu ne’e tamba iha fase datoluk ne’e, atleta Seruling Dewata hetan tuku iha ibun, husi atleta Padjajaran no monu ba rai, nune’e haree nain (penonton. Red ) sira hahuu istória malu, to’o halo prosesu selesaun ne’e labele kontinua ba oin.

Iha konfrontu ne’e parte FESTIL nian konsidera ida ne’e la’os atleta no organizasaun silat sira mak halo, maibé ema sira ne’ebé mak asiste direita prosesu selesaun ne’e mak halo, maibé iha tempu hanesan laiha parte Policia Nacional Timor-Leste (PNTL) mak atua.

“Buat ida ohin akontese ne’e, oknum pessoal ida ne’ebé hakarak halo empata atividade, ema sira ne’ebé que atleta iha maturidade, diciplina, hakarak tuir duni buat ne’ebé federasaun prepara. Ligadu ba ida ne’e tamba preparasaun ba selesaun ida ne’e mak tempu ne’e limitadu tebes I buat ne’e mós obrigatoriu no urjentemente, entaun federasaun labele kordena ho seguransa sira tamba tuir planu federasaun nian selesaun hala’o iha loron domingu maibé simu tiha orsamentu ba realizasaun ne’e iha Sexta Feira entaun kuandu ita ba Policia ita tenki hato’o karta resmi ba iha Policia para nia bele halo seguransa iha ne’e maibé tamba ligadu ho Sabadu no Domingu entaun ita labele hato’o karta ofisiál,” esclarese António ba jornalista TAFARA.TL

Alende ne’e Prezidente Seruling Dewata Timor-Leste, Joaquim Gonçalves dos Reis hateten prosesu selesaun ba ohin loron ne’e, tenki para iha ne’e, atu nune’e bele hamate konfrontu ne’ebé mak akontese no husik treinador ida-idak, husi organizasaun tolu ne’e mak indika ninia atleta ne’ebé merese hakat ba etapa TC nian.

“Ohin ami atu asegura de’it laiha problema boot liu ida ne’e, ohin ami reuniaun tiha ona, prezidente perguruan nain tolu, perguruan Padjajaran, Perisai Diri ho Seruling Dewata ami tur hamutuk tiha ona, ami desisde katak, ami ida-idak fila ba ami nia perguruan, ami nia atlet sira ne’ebé mak iha, sei utuskan mai, klase ida nain tolu. Para bele mai treina fali, tuir TC para hodi haree, sé mak di’ak, ita tenki haruka ba tuir asia games,” dehan Joaquim.

Iha sorin seluk, atleta selesionadu, Maria dos Santos Andrade (16) senti kontenti tama bele hakat ona TC hodi prepara liu tan no nia sei esforsu nia an hodi hakat ba Asian Games maibé nia mós senti triste oituan tamba prosesu selesaun ne’e labele to’o ninia rohan tamba hetan konfrontu husi ema individual sira.

Makse organizasaun tolu seidauk hatene, ema nain hira mak sei reprezenta FESTIL ba iha Asian Games, maibé sira hahu halo selesaun ona. Tuir informasaun ne’ebé hato’o husi Presidente Arbitrajen Nasional Timor-Leste, Mateus Manuel da Silva orsamentu aloka ba selesaun atleta ne’e hamutuk $2,000.00.* [Maria do Ceu | Editor: Zevonia Vieira | TAFARA.TL |8.04.2018].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Bintang Festival Sei Realiza Konsertu ba Daruak iha Timor-Leste.

Banda Musika rai laran no Jamrud hosi Indonesia sei anima komunidade Timor sira iha municipio …

Leave a Reply

Your email address will not be published. Required fields are marked *