Tuesday , May 21 2019
Home / Sosial & Politika / Ratifikasaun Tratadu Tasi Timor, Fretilin Husu Governu Halo Diskusaun Publiku no Tenke Lalais
Bankada Fretilin halo konferensia imprensa ho jornalista sira iha parlamentu nasional. [Foto: Media bankada Fretilin | 30.11.2018]

Ratifikasaun Tratadu Tasi Timor, Fretilin Husu Governu Halo Diskusaun Publiku no Tenke Lalais

“Bankada Fretilin prontu atu kolabora iha prosesu tomak iha asuntu importante ida ne’e, maibé prosesu ne’e tenke transparente, sosiedade no povu tomak tenke hetan oportunidade husu esklaresimentu”. Bankada Fretilin

Relasiona ho governu Timor-Leste no Australua iha loron 6 Marsu 2018 asina ona tratadu konaba Fronteira Maritima iha Tasi Timor entre Timor-Leste ho Australia, hafoin Komisaun Konsiliasaun remata nia misau. Bankada Fretilin liu hosi komunikadu imprensa ne’ebe distribui ba media esplika katak tratadu fronteira marítima entre rai rua, nune’e sei substitui tratadu sira seluk ne’ebé halo entre Timor-Leste ho Austrália kokna ba fahe riku soin hotu-hotu iha tasi laran no tasi okos. Atu tama iha vigór, tratadu ne’e tenke hetan ratifikasaun iha Parlamentu Nasionál Timor-Lete, tuir Konstituisaun RDTL artigu 95, alínea 3.f, no Parlamentu Federal Australia.

Bankada Fretilin hatutan katak maske ita kompriende katak tratadu ida ne’e importante tebes ba ita nia Estadu, fulan 8 hafoin asinatura ba tratadu ne’e iha Nova Yorke, governu seidauk toma inisiativa ruma atu hahú prosesu ratifikasaun. Enkuantu hein, iha loron 28 Novembru 2018, Austrália hahú ona sira nia prosesu ratifikasaun iha Parlamentu Federal.

Bankada Parlamentár Fretilin fó-alerta ba VIII Governu hodi husu, Primeiru-Ministru, Taur Matan Ruak tenke tau-matan lalais ba asuntu importante ida ne’e.

“Ita luta ona tinan naruk atu alkansa objetivu ida ne’e, tanba ita hakarak defende ita-nia soberania. Agora atu to’o ona pasu ida importante liu, entaun ita labele la book-an nafatin. Bankada FRETILIN ezije VIII Governu, ho lideransa Exelénsia Taur Matan Ruak nian, atu hahú lalais prosedimentu ida ne’e”, tuir esplikasaun iha komunikadu imprensa

Iha komunikadu imprensa mos bankada parlamentar Fretilin esplika katak prosesu ratifikasaun ida ne’e presiza diskusaun ida kle’an kona-ba substánsia husi tratadu ida ne’e, ne’ebé governu presiza fo esplikasaun no informasaun sira hotu ne’ebé relevante ba Parlamentu Nasionál.

“Nudár órgaun Estadu ho kompeténsia atu ratifika tratadu internasionál sira inklui kona-ba ita-nia fronteira, Parlamentu Nasionál presiza iha asesu ba dokumentus relevante sira hotu atu estuda didi’ak dokumentu sira ne’e antes halo desizaun ba kestaun importante kona ba ita nia independénsia no soberania. Diskusaun tenke nakloke mós ba komponente tomak iha ita nia sosiedade. Tan ne’e Governu presiza haruka lalais mai Parlamentu atu Parlamentu bele konvoka diskusaun ida inkluzivu, no rona ema hotu-hotu.”

Bankada Parlamentar Fretilin mos deklara katak tratadu ida ne’e la hanesan ho tratadu CMATS, ne’ebé loke dalan hodi halo negosiasaun foun. Tratadu ida ne’e sei taka odamatan ba negosiasaun ka disputa sira seluk, karik iha tempu ikus mai ita kompriende hikas katak tratadu ne’e la justu. Bainhira ita asina no ratifika tratadu ne’e, ita tenke simu konsekuénsia hotu. Tan ne’e ita presiza iha diskusaun kle’an.

Esplika mos iha komunikadu imprensa deklara katak Bankada Fretilin, sei halo esforsu tomak atu asegura interese Povu ho Estadu nian iha tratadu ida ne’e. Bankada Fretilin iha mós fiar katak envolvimentu sosiedade tomak nian iha diskusaun ida ne’e mak dalan ne’ebé loos liu, atu asegura ita-nia interese. Bankada Fretilin prontu atu kolabora iha prosesu tomak iha asuntu importante ida ne’e, maibé prosesu ne’e tenke transparente, sosiedade no povu tomak tenke hetan oportunidade husu esklaresimentu. Governasaun ne’ebé di’ak, ne’ebé sustentável, tenke liu husi prosesu transparente no involve konsulta no debate públiku kle’an. * [ Zevonia Vieira | TAFARA.TL | 30.11.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *