Reitor UNTL lamenta Informasaun ne’ebé públika husi Jornal Timor Post

“UNTL kompriende katak konstituisaun RDTL artigu 40 konaba liberdade expresaun no informasaun. Manifestasaun nu’udar modu espresaun pensamentu kritiku hasoru hasoru situasaun ka kondisaun ruma.”

Lia ne’e hato’o husi Reitor Universidade nasional Timor Lorosa’e (UNTL), Francisco Miguel Martins  liu husi komunikadu imprensa, iha Nia knar fatin, UNTL, Dili, 22/08/2017.

Reitor lamenta ba titulu notisia ne’ebe mak Jornal Diariu Timor Post ho titulu Reitor UNTL Konsidera Manifestasaun Ilegal, edisaun 08344024,Tersa, 22 Agosto 2017 pag.1.

Nia hateten razaun fudamental UNTL nian klaru, manifestasaun ne’e la’os de’it estudante UNTL maibe Movimentu Universitariu Timor-Leste [MUTL], nu’udar Reitor laiha kbit atu impede ka hatan realizasaun manifestasaun ne’e, maibé UNTL sujere atu ema hotu-hotu kumpri lei ne’ebé vigora iha nasaun RDTL.

Francisco Miguel Martins esklarese, “UNTL kompriende katak konstituisaun RDTL artigu 40 konaba liberdade expresaun no informasaun. Manifestasaun nu’udar modu espresaun pensamentu kritiku hasoru hasoru situasaun ka kondisaun ruma.”

Reitor UNTL haktuir liu tan, Nia parte hato’o ona karta resposta ba MUTL, haree fila fali ba lei ne’ebe dehan katak sidadaun hotu hotu iha direitu no liberdade ba espresaun, maibe tenke hola distansia metru 100 dook husi instituisaun publiku, UNTL nu’udar instituisaun publiku estadu nian lasoi atu manifesta asaun nebe kontraria ho funsionamentu instituisaun publiku sira seluk.

Reitor UNTL husu ba media hotu-hotu atu hakerek no hasai informasaun tuir liafuan ne’ebe hasai husi fontes ho didiak no lolos atu labele kria polemika.

Relasiona ho kestaun ne’e, TAFARA.TL konfirma ho Prezidente Kosellu Imprensa [KI], Virgilio Guterres iha Kafe Natureza, Haburas, Dili, Prezidente KI esplika tuir lei publiku iha direitu atu resposta ba informasaun ne’ebe mak publika husi media hodi halo koresaun.

“Tuir lei komunikasaun sosiál, fontes infornasaun publiku iha direitu de respostas atu husu ba media halo koresaun ba deklarasaun ne’ebé mak Nia rasik la halo.”

Nune’e Prezidente Konsellu Imprensa husu ba Reitor UNTL atu hato’o karta ba Timor Post hodi halo koresaun ba notisia ne’ebe mak publika ona.

“Notisia ne’e Jornalista husu duni Nia (Reitor Red) ka ou buat ne’ebé Nia la koalia. Presiza Reitor klarifika no Reitor iha direitu de resposta atu hato’o karta ba Timor Post, husu Timor-Post halo koresaun.”* [Luis Soares & Virgina Pereira | TAFARA.TL | Editor Martinho Moniz | 22.08.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.