Wednesday , October 24 2018
Home / Sosial & Politika / RENETIL husu PR Intensifika Komunikasaun ho Xefe Governu No Liders Polítiku sira, Hodi Ultrapasa Impase Politiku

RENETIL husu PR Intensifika Komunikasaun ho Xefe Governu No Liders Polítiku sira, Hodi Ultrapasa Impase Politiku

RENETIL hato’o nia preokupasaun kona-ba impase politiku ne’ebé Timor-Leste hasoru daudauk, no husu ba Prezidente Repúblika atu intensifika komunikasaun ho Xefe Governu no lidér sira seluk hosi partidu polítiku sira ne’ebé forma Governu hodi buka solusaun no hakat dezafiu ne’ebé Timor-Leste enfrenta hela.

Organizasaun Resistência Nacional dos Estudantes de Timor-Leste [RENETIL] hato’o afirmasaun ne’e através komunikadu imprensa loron (Quinta-feira, 26/07/2018), relasiona ho enkontru ne’ebé RENETIL hala’o ho Prezidente Repúblika, Dr. Franscisco Guterres Lu-Olo, datada 25/07/2018 kona-ba impase polítiku mak Timor-Leste enfrenta dau-dauk.

RENETIL fo hanoin hikas katak espíritu diálogu atu buka solusaun ba problema ida ho natureza hanesan ne’e la’ós buat foun ba Timor-Leste. Uluk iha tempu luta ba ukun rasik-an Resisténsia Timorense sempre eziji funu-maluk atu tama iha diálogu – la hó pré-condições – atu buka solusaun ba Timor-Leste nia problema.

Iha sorumutu refere RENETIL espresa nia apoiu ba intensaun no esforsu ne’ebe Prezidente Repúblika hala’o atu promove no harii Governu ida-ne’ebé kredível ne’ebé sai mós nu’udar plataforma ba partidus polítikus sira hotu.

Atu garante esforsu ida ne’e, RENETIL propoin iha futuru presija estabelese kuadru juridíku ida ne’ebé determina kritériu espesífiku ida, aleinde kritériu selu-seluk, katak indivídu sira atu okupa pozisaun públiku ida hanesan membru Governu ka deputadu, labele iha rejistu kriminál ho krime relevante, ka iha ficha limpa. Tanba maske iha ona lei ne’ebé ezije funsionáriu públiku no profisaun seluk atu la iha sentensa kriminál, maibé regra hanesan la iha ba sira-ne’ebé kaer ukun. Ideia ne’e hetan reasaun pozitivu tebes hosi Prezidente Repúblika, RENETIL fiar mós forsa polítika sira seluk sei apoiu inisiativa refere.

RENETIL hato’o ba Xefe Estadu, interpretasaun no implementasaun atuál ba regra konstitusionál kona-ba imunidade hosi titulár órgaun públiku sira sei permite ofisiál públiku atu subar iha imunidade nia kotuk hodi sees hosi responsabilizasaun kriminál. Nune’e RENETIL sente importante atu hakotu interpretasaun hanesan ne’e, ne’ebé viola espíritu Konstituisaun atu fó dalan ba sistema judisiáriu sira hala’o ninia knaar lolos tuir Konstituisaun no lei sira. Tanba kuadru juridiku ida ne’ebé klaru, ho interpretasaun no implementasaun norma konstitusionál uniforme no ho objetividade, hanesan fatór esensiál ida atu fó hakat ida tan ba oin iha prosesu konstrusaun Estadu nian, no evita kestaun kredibilidade individu sira ne’ebé atu ba okupa pozisaun públiku sai sujeitu ba kontradisaun polítika iha tempu atu forma Governu, hanesan akontese dau-dauk ne’e.

RENETIL apresia oportunidade ne’ebé Prezidente Repúblika fó no espera katak troka ideia hosi organizasaun rezisténsia ida-ne’e sei iha impaktu konkretu. RENETIL sei promove nafatin liu hosi meiu oinoin, konkretizasaun ba ideia sira-ne’e. RENETIL prontu nafatin atu kontribui ba dezenvolvimentu Nasaun Timor-Leste liu hosi konsiensializasaun polítika, aksaun konkreta no dialogu ho orgaun Estadu nian.

Ekipa RENETIL ne’ebé partisipa iha enkontru ne’e Vice-Sekrátariu Geral I, Francisco ‘Lires’ Belo, Vice Sekretáriu Geral II, Anata ‘Rara’ Aparício, Prezidente Konsellu Sentral, Carlos FR ‘Saky’ Lopes, no membru Konsellu Sentral, José AMX ‘Siac’ Gonçalves.* [Martinho Moniz | TAFARA.TL | 26.-7.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *