Monday , December 10 2018
Home / Sosial & Politika / RENETIL Selebra Tinan Ba dala 30, Juaquim: RENETIL Sei Halo Dialogu Intensif Ho Governu
Sekretariu Jeral RENETIL Juaquim Lucio Fonseca halo entrevista ho TAFARA.TL. [Foto: Francisco de Almeida | 20.06.2018]

RENETIL Selebra Tinan Ba dala 30, Juaquim: RENETIL Sei Halo Dialogu Intensif Ho Governu

Resistência Nacional dos Estudantes de Timor-Leste (RENETIL) selebra loron moris ba dala 30. RENETIL ne’ebe harii iha loron 20 Junhu 1988 Iha Bali Indonesia, membru RENETIL sira hamutuk halo misa agredesimentu iha Igreja Motael.

Ba TAFARA.TL Sekretariu Jeral RENETIL, Joaquim “Russuo” Fonseca, hateten RENETIL hakarak tebes kria estrutura ezekutivu ida atu nune’e bele halao ona mandatu ne’ebe mak kongresu iha fulan Marsu kotuk desidi.

“Iha tinan ida ne’e, ami hakarak tau ona kondisaun iha fatin, para hahu ona sentru estudu estratejiku Timor-Leste nian, ne’ebe iha tinan ida ne’e sei harii deit hanesan departamento ida, depois tinan oin sei hamrik ona hanesan sentru estudu independente ka hamrik ketak”, hateten Juaquim

Iha igreja Motael, 20/06, Juaquim realsa katak tinan hirak ba kotuk RENETIL ativu tebes maibe tinan ida ne’e, RENETIL hakarak atu halao intensif dialogu diak liutan ho governu, “Ami hakarak halo dialogu politiku ho governu nune’e RENETIL mos bele fo nia hanoin konaba programa no prosesu dezenvolvimentu nian, atu bele iha relasaun produtivu ho governu iha nível politika”.

Iha parte hanesan, Padre Juvito Araujo iha homilia hateten katak, konfigura deit planu hirak ne’ebe mak haksumik iha Maromak nia néon.

“Hau hatete katak selebrasaun hotu laos ho insidensia [kebetulan. Red] maibe buat hotu ne’e Maromak nia planu tiha ona, tanba buat hotu lao tuir saída mak Maromak hakarak. Ita konfigura deit planu ida ne’ebe haksumik hela iha Aman Maromak nia néon, manifesta iha ita kbiit laek sira nia hahalok”, hateten Pe. Juvito

Entretanto Vice Sekretaria Jeral RENETIL, Natalina Aparicio Rara hatete ba TAFARA.TL katak iha esperança boot hosi RENETIL ba governu ida ne’e, sei lao ho diak to remata.

“Labele para iha dalan klaran, ida ne’e esperança RENETIL Nian, nia mehi ba nasaun ida ne’e, imprinsipiu RENETIL nafatin kolabora ho orgaun sira, hamrik firme iha nia fatin, tau atensaun ba iha governu ida ne’e”, esplika Natalina.

Natalina hatutan RENETIL iha dever moras ne’ebe mak boot, hodi fo hanoin ba governu bainhira lao sala dalan, maibe moos nafatin.

Programa ne’ebe RENETIL hafoin misa agredesimentu, membru RENETIL tomak hamutuk ba visita jardim dos Herois Metinaru, halo juramentu ba simpatizante sira iha tempu rezistensia ne’ebe hetan ona rekonnesementu iha kongresu RENETIL VII.

Fundador ba RENETIL mak hanesan saudoso Fernando de Araujo ‘Lasama’, Lucas da Costa, Jose Ave Maria Goncalves, Julio Abel, Marciano Garcia, Joao Araujo, Adolpho Fontes, Joao Cardoso, Carlos Lopes no Agapito Cardoso.

Sekretariu Jeral ba dahuluk nian iha tinan 1988-1999 mak Saudozo Fernando de Araujo. * [ Francisco de Almeida | Editor: Zevonia Vieira | 21.06.2018 ]

About Other Source

Check Also

Komemora Loron Invasaun, PR Lú Olo Sauda CNC nia Inisiativa Hodi Hametin Memoria Kolektiva

Prezidente da Republika, Dr. Francisco Guterres Lú Olo sauda Centro Nasional Chega! no ekipa toma …

Leave a Reply

Your email address will not be published. Required fields are marked *