Tuesday , March 26 2019
Home / Opini / Rezolve Violensia Arte Marsial, Tanba Sa Sempre Falla?
Ato ‘Lekinawa’ Costa, nudar Ativista RENETIL. [Foto: Dokumentu privadu | 06.08.2018]

Rezolve Violensia Arte Marsial, Tanba Sa Sempre Falla?

Violensia nunka bele responde ho violensia, iha forma fiziku ka psikolojiku. Ema halo violensia tanba nia aprende violensia, iha uma laran, iha eskola, ka iha fatin publik. Resposta hahalok violensia ho aktu violensia seluk ida sei prepetua violensia liutan iha futuru. Maibe labele halo violensia ne’ebe pratika iha arte marsial hanesan ho violensia sira seluk mak akontes iha uma laran ka iha dalan, maski qualker tipu de violensia bele produs impaktu mak hanesan.

Violensia mak pratika hosi arte marsial ne’e relasiona ho oinsa estudante marsial ida aprende tuir estrutura no atu uza violensia ne’e ho efetivu, hodi defende nia an-rasik, defende ema seluk, no mos halo ataka. Nune’e pratika marsial ne’e pratika ida ne’ebe kona ba oinsa uza violensia ho efetivu. Pratika ida ne’e depois iha tan naran arte ka seni iha laran tanba bainhira marsialista ida uza ka pratika ninia marsial ho efetivu bele hamosu sintidu estetika iha pratika nia laran. Nune’e mak ema bolu arte marsial. Iha jogu modernu klubu marsialista sira dala ruma halo demonstrasaun hodi hatudu arte hosi sira nia pratika. Tanba ne’e mak atu pratika arte marsial ida ema presija mestre/guru/pelatih ne’ebe mak bele hanorin. Transformsaun koinsementu hosi ema ida ba ema seluk ne’e nudar nudar ‘arte’ ida ho objetivu atu reprodus koinesementu ka efeitu.

Oinsa ita koinese ita nia arte marsial iha ita nia rai? Arte Marsial pratika kleur ona iha ita nia sosiedade ho motivasaun oin-oin. Maibe ikus-ikus ne’e, media halo publikasaun barak hodi halo redusaun bot ba sintidu arte marsial nian. Arte marsial egual violensia publik, arte marsial egual organizasaun artes marsiais, arte marsial produs deit efeitu negativu. Publiku konsumu informasaun hirak ne’e no uza hodi julga ema hotu mak pratika arte marsial. At liutan, lideres sira, liliu sira ne’ebe kaer poder, kaer rekursu estadu nian, halo mos julgamentu ba ema no organizasaun arte marsial. Nune’e, imajen arte marsial sai buat dodok no dois, sai monster, sai buat ladiak mak presija halo lakon tiha hosi sosiedade nia let.

Sala bot ida ne’ebe governo halo tinan ba tinan mak maneira governo nian haree problema ne’ebe akontese. Governo sempre haree problema ne’ebe akontese, liliu bainhira iha aktu hakanek , hamate, sunu uma, ka rama ambon, nudar problema arte marsial. Nune’e intervensaun sempre buka atu hapara pratika arte marsial ka buka tuir organizasaun arte marsial sira mak tuir governo nia frame of thinking dehan sira ne’e problematiku.

Problema loloos governo tenke haree ho didiak mak violensia, laos arte marsial. Framing problema nudar arte marsial hahu kedas hosi inisiu 2005 nian mai. Fundasaun Asia (The Asia Foundation) fo apoio ba inisiativa iha Palasiu Presidente da Republika, tempu ne’eba mak Presidente Xanana Gusmao, hodi lori hamutuk organizasaun arte marsial sira hodi halo dialogu. Intensaun hosi inisiativa ida ne’e mak atu hamenus problema entre organizasaun arte marsial no mos problema arte marsial ho polisia. Rezultadu hosi dialogu sira mak halo, reprezentante organizasaun AM asina tiha kodigu konduta ida ne’ebe dehan katak atu resolve problema ho dalan dame nian. Dialogu ida ne’e mos rezulta iha establesementu FOKAMTIL (Forum Komunikasaun Artes Marsiais Timor-Leste). Relatoriu Fundasaun Asia nian hatete katak FOKAMTIL konsege resolve problema arte marsial iha Liquisa, Dili no Bobonaro.

Hosi FOKAMTIL depois tama ba krizi 2006 ne’ebe mak halo violensia involve arte marsial sai instrumentalizadu liu tanba poder no rekursu. Iha tempu violensia arte marsial lao makaas hela, governo mos dezenvolve tiha lei ida no hetan aprovasaun iha Parlementu Nasional nudar Lei no.10/2008. Hosi Lei ne’e mak establese mos KRAM (Komisaun Reguladora Arte Marsial) hodi regula pratika organizasaun arte marsial sira. Maibe Konsellu Ministru iha 2011, tanba akontesementu violensia la para nafatin, maski iha ona lei, Governo desidi hodi bandu pratika arte marsial hosi organizasaun 3 (KORK, PSHT, IKS) ho Resolusaun No. 35/2011 ba tinan ida to’o tinan tolu. Ne’e deit la to’o, liu deit tinan 2, governo halo tan Resolusaun No.16/2013 ho halakon organizasaun Arte Marsial mak tuir governo problematiku liu. Iha tempu hanesan governo deklara zero toleransia ba membru PNTL no F-FDTL mak involve iha organizasaun arte marsial liu hosi juramentu ida. Ne’e akontese tanba violensia publik ne’ebe akontese iha Abril 2011 iha Zumalai, sunu uma 33, Dezembru 2011 iha Beto ne’ebe estraga uma 8 (Notisia STL, 13/01/2012), depois iha 2012 akontese tan iha Luro no Letefoho (Notisia Timor Post 14/01/2012). Tanba fenomena Rama Ambon sai makas iha tinan 3 liuba, Parlementu Nasional aprova tan lei ida kona ba arma branka, ne’ebe inklui Rama Ambon (Lei No.5/2017 kona ba Regime Jurídico Relativo à Prática de Artes marciais, Rituais, Armas Brancas, Rama Ambon e Quinta Alteração ao Código Penal). Iha akontesementu hirak ne’e Governo nia resposta sempre hanesan hatun forsa, hapara insidentes, depois halo rezolusaun hodi taka organizasaun.

Iha kampanne eleisaun antisipada tinan ida liuba, partidu hotu-hotu koalia kona ba reativa pratika arte marsial mak governo, liu hosi rezolusaun hakarak atu halakon. Lideres organizasaun arte marsial balun mos hola parte iha partidu sira ho hanoin katak ikus mai sira nia organizasaun bele reativa. Maibe saida mak akontese, besik tinan 2 ona, kestaun reativa organizasaun arte marsial sira nunka sai debate iha governo no mos iha parlementu. Ikus-ikus ne’e, bainhira iha insidente violensia publik, rama ambon, no ataka malu iha Baucau, Likisa, no Dili, asuntu arte marsial, derepenti deit hetan atensaun lalais fali hosi lider sira. General Lere, hanesan babain koalia makas hodi kriminaliza aktu ne’e tuir ninia hatene, ka hetan informasaun, katak arte marsial mak halo. Ministru Defesa bolu enkontru hodi fo atensaun espesifiku ba asuntu ne’e. Premeiru Ministru Taur mos koalia kona ba sei aplika regra ida rigorozu bainhira reativa organizasaun arte marsial.

Ba Presidente da Republika, Lu-Olo, no organizasaun sosiedade civil sira, krimi ne’ebe akontese ne’e responsabilidade individual laos organizasaun. Sira hotu konsidera arte marsial nudar pratika desportu. Organizasaun sosiedade civil balun no lian makas hatete katak governo mak la iha kapasidade atu buka solusaun tanba ne’e sempre iha tendensia atu uza forsa ka poder deit. Maibe realidade hatudu katak esforsu sira mak governo halo, halo juramentu, uza lei, uza polisia ho F-FDTL, sempre falla.

Saida mak sala hosi aproximasaun poder (pendekatan kekuasaan) nian, bainhira buka solusaun ba violensia publik ne’ebe involve membru organizasaun arte marsial? Ida, maneira enkuadramentu problema mak seidauk los. Substansia hosi problema ne’ebe akontese ne’e violensia publik, laos organizasaun arte marsial. Maski fallansu organizasaun nian kontribui mos. Nune’e rekomendasaun hodi fo solusaun mos sempre sala.

Rua, taka organizasaun signifika fomenta pratika klandestina. Indonesia nia ukun ita hotu aprende oinsa halao servisu klandestina iha presaun nia okos. Saida mak organizasaun arte marsial sira halo mos hanesan. Sira konsidera aktu politik taka arte marsial nudar opresaun ida ne’ebe husu sira nia resistensia. Provas hatudu katak bainhira governo hasai tiha resolusaun hodi taka organizasaun arte marsial, sira nia atividade buras liutan. Ne’e signifika aproximasaun uza poder hodi hanehan deit la lori rezultadu diak.

Tolu, durante ne’e, governo mos haree membru arte marsial sira nudar problema mak presija resolve laos nudar rekursu ka aset estadu nian ne’ebe presija dezenvolve liutan. Fokus governo nian buka solusaun ba problema, maibe hanesan sosiedade civil dehan, governo nia kapasidade atu resolve mos la iha. Nune’e tinan 10 resin ona, problema arte marsial tabele hela deit nunka iha finalidade. Muda aproximasaun ida ne’e, no fokus ba dezenvolve organizasaun arte marsial ho nia membru sira hanesan asset estadu nian.

Saida mak governo seidauk haree hetan ka baruk atu buka tuir relasiona ho violensia publik ne’ebe diskonfia halo hosi membru organizasaun arte marsial sira? Governo seidauk tau iha konsiderasaun violensia prolongadu hosi kolonializmu Portugal, okupasaun Indonesia, violensia entre ‘maun-alin’ iha rai laran ninia efeitu ba mudansa kultura no social iha sosiedade nia moris. Relatoriu Chega! entrega ba estadu iha 2005, Relatoriu Komisaun Verdade no Amizade entrega ba estadu iha 2008. Relatoriu rua ne’e koalia kona ba efeitu negativu sira hosi violensia oin-oin mak akontese iha pasadu ba ema Timor-oan hotu nia moris. Tanba ne’e mak relatoriu rua ne’e koalia kona ba mudansa aproximasaun ukun ka governa nian, inklui edukasaun non-violensia, dezenvolve politika no dezenvolve seitor hotu-hotu ho konsiderasaun ba dereitus umanus, no atu PNTL no F-FDTL la repete tan hahalok ne’ebe Indonesia husik hela.

Governo mos seidauk halo esforsu maximu hodi buka tuir, investiga, no hakaas an atu komprende didiak kontextu konflitu mak akontese iha fatin ketak-ketak, no halo esforsu uituan hodi buka komprende ligasaun entre fatores oin-oin mak kontribui ba akontesementu violensia publik ida. Porfundamente, governo, loloos ne’e kee klean liutan hodi analiza ligasaun entre rezultadu edukasaun nian ba dezenvolvimentu juventude no dezenvolvimentu umanu en jeral. Governo mos seidauk haree hetan, ka lakoi haree violensia GAM mosu hosi ‘labadain’ relasaun social mak involve individual, familia, identidade, solidaridade negativu, no strutura social sira. La halo esforsu hodi investiga tuir disiplina psikolojia, sosial, antropolojia hodi komprende ho didiak dezenvolvimentu joven sira nian no mos sira nia relasaun ho ambiente. Atu halo buat sira ne’e presija servisu integradu no multidisipina.

***Hakerek nain ativista RENETIL, no artikel ne’e opiniaun pesoal, la reprezenta instituisaun mak hakerek nain hakna’ar an ba. [ Ato ‘Lekinawa’ Costa | TAFARA.TL | 16.02.2019]

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

G7+, Emilia Pires & Korupsaun

Diskusaun ne’ebe halao iha TVE (16/11/2018) hau foti kestaun korupsaun ne’ebe la explisitamente temi iha …

Leave a Reply

Your email address will not be published. Required fields are marked *