Rezultadu Protesta, Bankada CNRT Konfirmadu Kansela Lelaun

“Ami ezize ba Parlamentu Nasional atu anula lalais rezolusaun ba lelaun kareta prado, iha kontekstu ne’e ami prefere ba situasaun ekonomia no Povu nia moris.”

Ida ne’e mak deklarasaun husi Movimentu Universitariu Timor-Lorosa’e [MUTL], liu husi komunikadu imprensa loron 22/08/2017 iha Resintu Fakuldade Ekonomia, UNTL, Dili.

Movimentu Universitariu Timor-Lorosa’e [MUTL] halo asaun pasifika durante loron tolu, hodi kontra rezolusaun ne’ebe hasai husi Konsellu Administrasaun Parlamentu Nasional kona-ba alienasaun kareta Prado 65, bazeia ba Dekretu lei No. 32/2011 de 27 de Julho, kona-ba Jestaun Alienasaun ba Bens Moveis Estadu nian no Lei Nu. 12/2017, kona-ba Lei Organizasaun no funsionamentu administrasaun parlamentar, maka deputadus idak-idak ne’ebe partisipa Administrasaun Parlamentu Nasional nian, deside atu halo prosesu alienasaun tuir prosedimentu legal tomak inklui mos nia presu alienasaun nian, tamba durante mandatu tinan lima laran, deputadus idak-idak ne’ebe partisipa ba kustu manutensaun annual.

MUTL konsidera rezolusaun refere Parlamentu Nasional halo hodi benefisia sira nia-an rasik. Nune’e MUTL liu husi Komunikadu Imprensa, husu ba Parlamentu Nasional atu labele bosok publiku kona-ba suspende ba kareta lelaun prado, tamba iha realidade hatudu katak sapa matrikula truka tiha ona, tan ne’e sira ezize atu Parlamentu Nasional atu anula lalais rezolusaun ba lelaun kareta prado ne’ebe prejudika ba povu nia moris.

Tetu ba situasaun aktual ne’ebe hamosu polemika boot iha publiku kona-ba prosesu alienasaun Kareta Parlamentu Nasional no hare ba desizaun Prezidente Parlamentu nasional hodi suspende prosesu alienasaun refere.

Bankada Partidu CNRT Liu husi diskusaun bankada no desizaun husi Concelho Polika Nasional no Conselho Diretiva Nasional bankada Partidu CNRT, Tersa Feira, 22/08/2018 liu husi komunikadu imprensa iha Edifisiu Bankada Partidu CNRT iha Parlamentu nasional afirma, “intrega hikas kareta 30 husi deputadus na’in 30 bankada CNRT nian hodi la kontinua tuir prosesu alienasaun ba kareta Parlamentu nasional.”

Iha komunikadu imprensa ne’e mos, Bankada CNRT husu ba Prezidente Parlamentu nasional atu kansela prosesu alienasaun kareta PN nian ba Deputadus nain 65. Bankada CNRT husu ba publiku atu kria situasaun paz no hakmatek, matan moris neon nain hodi fo apoiu maximu ba prosesu formasaun governasaun no mos prosesu negosiasaun Tasi Timor ne’ebe mak hala’o hela.

Liu hosi konferensia imprensa, bainhira jornalista sira husu kona ba tanbasa uluk kedas la rejeita kona ba lelaun kareta? Portavos bankada CNRT, Natalino do Santos hateten katak, lei fo dalan hodi halo alienasaun tanba ida ne’e mak bankada CNRT aseita.

“Lei fo dalan hodi halo lelaun, maibe hare ba polemika ne’ebe iha, bankada CNRT desidi hodi kansela tanba lakohi hamosu instablidade no hakarak mantein unidade nasional no hare ba povu nia interese”, tenik portavos Natalino do Santos.

Kareta prado ho presu $63,000 ne’ebe hola ba deputadu hamutuk 65 pesoal, ho total presu $4,095.000. bainhira parlamentu nasional prontu halo lelaun, hamosu protesta boot hosi Movimentu Estudante Universitariu Tmor-Leste.* [Martinho Moniz, Jesuino Marcal & Luis Soares | TAFARA.TL | 22.08.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.