Wednesday , June 19 2019
Home / Sosial & Politika / SekJer ONU: Kongratula Governo Timor-Leste no Australia
Sekretariu Jeral ONU, Antonio Guterres. [Foto: Detikcom]

SekJer ONU: Kongratula Governo Timor-Leste no Australia

Timor-Leste asina tiha ona Akordu Fronteira Maritima ho Australia. Sekretaru Jeral (SekJer) ONU, Antonio Guterres, marka prezensa iha eventu istoriku ida ne’e no louva prosesu resolusaun konflitu mak halao ho dame.

SekJer ONU, Antonio Guterres, iha ninia mensajen twitter, ohin, 6/02 (data Nova Iorke), hatete katak, “Australia no Timor-Leste asina tiha ona akordu fronteira maritime foun, ne’e hatudu efetividade hosi rezolusaun disputa ho dame. Haksolok tebes asisti eventu istoriku ida ne’e”.

Hosi publikasaun iha ONU ninia sitiu online, Guterres, iha nia intervensaun bainhira asisti asinatura akordu ne’e nia hatete katak seremonia asinatura ida ne’e hatudu kbi’it hosi lei internasional no ninia efetividade hodi resolve disputa. Nia mos hatete katak konkluzaun ba konsiliasaun ne’e susesu tebes no nia kongratula governo Australia no Timor-Leste ba servisu importante ida ne’e.

Guterres mos dehan, “liu hosi delimitasaun ba fronteira maritime entre Australia no Timor-Leste iha Tasi Timor, no liu hosi establese rejime espesial ba area ne’ebe iha kampu gas Greater Sunrise, Akordu ne’e tau Australia no Timor-Leste iha pozisaun ida diak hodi ezerse sira dereitu no obrigasaun tuir Konvensaun ho dalan efetivu. Ne’e mos tenke garante estadu rua atu hetan benefisiu hotu hosi exploitasaun sustentavel ba rekursu naturais iha Tasi Timor.”

Akordu foun ida ne’e bele loke posibilidade ba Timor-Leste hodi hetan lukru 80% hosi gas, bainhira pipa gas ba Darwin. Timor-Leste hakarak hetan 70% bainhira pipa gas no gas dada mai prosesa iha Timor-Leste.

Ministru ba Delimitasaun Fronteria, Agio Pereira, hatete ka ajensia notisia ABC katak lukru hosi akordu foun sei krusial tebes Timor-Leste ho populasaun miliaun 1.5 no 65% mak buka hela servisu.

Ministra Negosiu Estranjeiru, Julie Bishop, hatete ba jornal online The Guradian, katak konsiliasaun ida ne’ebe lao tiha ona presija kompromi hosi parte rua ne’e hotu, no tratadu ida ne’e hatudu rezultadu mak justu. Bishop mos hatete, “Australia fiar katak lei internasional mak fundamentu ba ami (Australia no Timor-Leste. Red) nia seguransa no prosperidade koletivu.”

Timor-Leste atinji tiha ona ninia ambisaun ba fronteira maritime. Negosiador Timor-Leste nian, lidera hosi Kayrala Xanana Gusmao, ho ninia ekipa konsege re-negosia fali akordu fronteira ne’ebe mak Autralia asina ho Indonesia iha 1972, no manan ho fronteira bo’ot liu tan. * [ Ato ‘Lekinawa’ Costa | TAFARA.TL | 07.03.2018 ]

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *