Thursday , May 23 2019
Home / Sosial & Politika / SEKOMS Vizita Konsellu Imprensa Hodi Haree Ambiente Serbisu
SEKOMS, Mericio Akara foto hamutuk ho Prezidente Konsellu Imprensa, Virgilio Guterres da Silva. [Foto: Jeronimo Barreto | 27.06.2018].

SEKOMS Vizita Konsellu Imprensa Hodi Haree Ambiente Serbisu

“Vizita ohin ne’e hanesan vizita kortejia ida atu koñese ambiente serbisu iha ne’e, hodi hahu kria serbisu hamutuk, kria komunikasaun ba malu, hare’e saida mak ita kolabora, saida mak ita nia difilkuldade hodi ita bele buka.”

Deklarasaun ne’e hato’o husi Sekretariu Estadu Komunikasaun Sosial, Mericio Akara ba Jornalista sira hafoin sorumutu ho diretiva Konsellu Imprensa Timor-Leste, ohin (Quarta-feira,  27/06/2018), Edifisiu KI, Quintal-Boot, Dili.

Governante ne’e haktuir, iha vizita ne’e mós koalia kona-bá fasilidade infrastrutura, rekursu humanu, gestaun ne’ebé mak sai preokupasaun husi parte Konsellu Imprensa. Entretantu Sekretariu Estadu Komunikasaun Sosial salienta, “ita koko fó atensaun para ultrapasa tiha maibé saida mak lao diak, pozitivu, tenki serbisu ho profisional, sátan Konsellu Imprensa independente, ita sei asegura ida ne’e, ita fo fiar ba sira para sira matein ho sira nia serbisu ho diak,” tenik Mericio Akara.

Iha fatin hanesan, Prezidente Konsellu Imprensa (KI), Virgilho Guterres da Silva hato’o agradese ba Sekretariu Estadu Komunikasaun Sosial ne’ebé vizita ona Konsellu Imprensa maske foin simu posse iha loron rua liu ba.

Prezidente Konsellu Imprensa esplika, konteudu husi sorumutuk ne’e mak SECOMS hakarak hametin kordenasaun entre SECOMS ho parseiru sira inklui Konsellu Imprensa, no rona mós saida mak KI halo ona durante ninia ezistensia tinan rua, no dejafius sira ne’ebé mak  Konsellu Imprensa hasoru.

Iha sorin seluk, sorumutuk ne’e kolia mos kona-bá oinsa atu serbisu hamutuk hodi desentraliza informasaun, notisias sira, atu nune’e labele fokus iha Dili de’it maibé mós ba iha interior teriróriu nian. Asuntu dezentralizasaun notisia ne’e haree liu ba papel RTTL,Ep no papel Radiu Komunidade sira, oinsa iha kordenasaun entre orgaun komunikasaun sosial sira ne’e hodi fornese informasaun aktual kona-ba prosesu desijaun politika, saida mak governu foti iha nasional, ba komunidade sira iha foho nune’e bele prienxe direitu publiku ninian ba hetan informasaun.

Konsellu Imprensa husu atensaun maka’as no urjente husi Governu ba RTTL,Ep hanesan orgaun ne’ebé hari’i tanba mandatu konstituisaun ninian, Governu tenki tau matan atu halo investimentu ida ne’ebé sufisiente ba infrastrutura no mós ba rekursus humanus liliu iha area jestaun ninian atu nune’e redignifika estatutu Radiu Televizaun Timor-Leste hanesan orgaun serbisu publiku nasional.

Iha enkontru ne’e Konsellu Imprensa husu, ba oin SECOMS ho ninia ekipa no mós Konsellu Imprensa, ajensia, instituisaun telekomunikasaun hamutuk atu hahu ona koalia kona-ba proposta lei ou elaborasaun lei kona-ba Radiu Televizaun nian.*[Santina L. da Costa |Estajiaria Dep.CS.UNITAL | TAFARA.TL | Editor: Martinho Moniz | 27.06.2018].

About Other Source

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *