Thursday , November 23 2017
Home / Siensia & Teknolojia / ICT Camp, Eleva Kapasidade Teknolojia Foinsa’e
Enseramentu ICT Camp 2016 iha Aileu. [Foto: Ameu Cardoso | 26.08.2016]

ICT Camp, Eleva Kapasidade Teknolojia Foinsa’e

ICT Camp kria amizade entre foinsa’e munisipiu ida no sira seluk, ne’ebe foinsa’e sira bele hakbesik ba malu, liu husi sira nia talentu no kreatividade iha mundu teknolojia modernu.

Atu hasa’e koñesimentu foinsa’e ninian iha area Informasaun Komunikasaun no Teknolojia [ICT], hanesan Google ba edukasaun, ICT ba bisnis, open source, internet Saudavel, utilizasaun baze ba dadus.

Sekretaria Estadu Juventude no Desportu [SEJD] liu husi Diresaun Nasional Komunikasasun no Teknolojia [DNCT], parseria ho Centru Juventude Municipio Aileu realiza atividade ICT Camp iha Municipio Aileu.

Loron 26 fulan Agostu 2016, sesaun enseramentu atividdade ICT Camp, Sekretariu Estadu Juventude no Desportu, Leovegildo da Costa Hornai  hateten, ema barak aprende ona informatika, maibe lakohi transforma, la aprofunda ne’e la vale. Nune’e presija materialize koñesimentu no matenek hirak ne’e.

“Ha’u haree husi kontekstu ida bot, Ohin ita aprende maibe, la transforma, la aprofunda nia valor sira ne’e la vale. Ita investe ba programa sira ne’e laiha sentidu tanba ne’e, presiza materializa pensamentu sira ne’ebé mak ohin ita aprende ho realidade”, dehan Leovegildo da Costa Hornai iha nia diskursu.

Governante ne’e sublina ba partisipante sira, atu labele kontinua fahe saida mak sira aprende iha atividade refere ba foinsa’e sira seluk hodi kontribui ba buat ne’ebe mak diak.

“Estadu tau oituan, liu hosi programa ida ne’e, imi aprende ICT siensia teknolojia, ida ne’e atu ajuda imi nia joven sira seluk, labele karak, uza imi nia matenek ne’ebé iha atu  imi transforma, dezamina ho karakter  natureza, informativu, edukativu, kritíka no konstrutivu. Laos uza fali atu diskridita no estraga ema nia personalidade, integridade pesoál”, sublina Sekretariu Estadu Juventude Deportu iha fatin serimonia.

Iha fatin hanesan Reprezentante Administrador Posto Administrativu Aileu, Marcos da Costa hato’o agradese ba SEJD ne’ebe hili Municipio Aileu sai hanesan fatin ba programa refere no mos ajudus ne’ebe mak oferese.

“Agradese barak ba programa ICT Camp, ne’ebe eleva kapasidade foinsa’e no pesoal suku ho gratuita, iha serbisu no levantamentu ba dadus. Agradese ba apoiu, komputadores ba Suku haat”, hateten Marcos da Costa ba Jornalista TAFARA.ORG.

Iha sorin seluk, Prezidente Komité Orientadora esplika, programa ICT Camp foin hahu iha tinan hirak liu ba, nune’e nafatin hasoru dezafius no obstaklu. Presidente Komite Orientadora mos rekoñese katak konseitu ba ICT Camp mos seidauk tuir padraun lolos, maibe tinan ida ne’e iha mundansa uitoan.

“Tinan kotuk ita halo iha Liquiça. Dezafiu ita hasoru iha parte implementasaun nian, maibe, mudansa balun ne’ebe iha ba tinan ida ne’e mak; fatin akampamentu, vizita suku sira hodi fahe hela saida mak sira aprende ba iha suku. Ida ne’e iha Liquiçá laiha, ida ne’e mak mudansa ba ICT Camp iha tinan ida ne’e”, esplika Prezidente KO ba TAFARA.ORG.

Iha sesaun enseramentu SEJD mos entrega meia banda muzika kompostu husi; Viola ida, Ampli ida, Mixer Power, Speaker rua no Keyboard ida, ba Centru Joventude Aileu hodi bele dezenvolve talentu no labele halo fali ba negosiu.

Diretor Geral-SEJD, Metodio Caetano Moniz husu ba Gesstor Centru Juventude no hirak ne’ebe utiliza ka uza sasan refere, uza ho responsabilidade no kuidadu hodi bele garantia nia sustentabilidade.

Molok entrega meia banda ne’e, Diretor Geral mos hateten; “Bele husu netik osan ruma, bainhira autoridade lokál ka ema ruma uza, maibe ida ne’e hanesan kustu manutensaun nian.” Hateten Diretur Geral SEJD, Metódio Caetano Moniz.

Orsamentu ba atividade refere ho montante USD$ 26,981.35, total partisipantes 38 hosi munisipiu 12 no Regiaun Espesial Ambeno Oe-cusse, kompustu hosi feto 10 mane 28. Atividade ida ne’e realiza tanba hetan kolaborasaun hamutuk Info Timor, NEETL, FDSL, entidades, instituisaun no kompaña sira iha Munisipiu Aileu. Tuir planu ICT Camp ba tinan 2017 sei realiza iha Munisipiu Ainaru.* [Maria do Ceu | TAFARA.ORG | 26.08.2016]

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Ministru Somotxo Apela Ba Povu Tomak Hodi Hakmatek Nafatin

Xefe Estadu Maior Jeneral F-FDTL, Lere Anan Timur,  Ministro de Defesa e Seguransa, Agustinho Sequeira …

Leave a Reply

Your email address will not be published. Required fields are marked *