Thursday , November 23 2017
Home / Siensia & Teknolojia / Hatene Deit La To’o, Uza Hodi Rezolve Problemas
SE Leovigildo da Costa Hornai entrega sertifikadu ba partisipante formasaun mak realiza hosi SEJD, koopera ho GIZ. [Foto: Ambero]

Hatene Deit La To’o, Uza Hodi Rezolve Problemas

Konhesimentu ba Informasaun Teknolojia la para ho ‘hatene’ deit, maibe oinsa uza saida mak ita hatene ona hodi rezolve problemas bar-barak nebe jovens sira hasoru.

Nune’e mak lia-fuan hosi Secretario de Estado da Juventude e do Desporto [SE] Leovigildo da Costa Hornai hato’o wainhira ensera atividade Formasaun ICT ba jovens sira, Sabadu (06/02/2016), iha Resintus Secertaria de Estado da Juventude e do Desporto [SEJD], Lecidere, Dili.

Ohin loron ita tama ona iha era globalizasaun, ita nia merkadu nakloke teb-tebes, hodi fo biban ba ema hosi rai seluk tama mai. Hakarak ka lakohi, situasaun ida ne’e hamosu kompetisaun maka’as! Tanba ne’e, se ita nia jovens sira la prepara-an didiak, bele sai marjinalizadu iha ita nia rain rasik, tenik SE Leovigildo.

Governo, Leovigildo hatutan, sei toma atensaun no tau prioridade ba dezenvolvimentu kapasidade juventude iha areas oi-oin, nune’e mos konaba ICT, aspetu ida nebe kontempla hotu iha Politica Nacional da Juventude mak foin aprova hosi Conselho de Ministros loron hirak liu ba.

“Uza konhesimentu teknolojia informatika mak imi iha hodi rezolve problemas oi-oin mak juventude sira hasoru, hanesan dezempregu, kaben sedu, droga, no sel-seluk tan,” husu SE Leovigildo ba partisipantes treinamentu ICT for Youth.

Iha biban mak hanesan, Director Centro Treinamento Info Timor Martinho Gorety, entidade ida nebe organiza no fasilita formasaun ICT ba jovens sira hato’o katak ho apoiu hosi SEJD, durante loron 6 nia laran, ho antusiasmu partisipantes nain 62 mak kompostu jovens hosi Munsipius 13, estudantes universidade 5 iha Dili, no mos hosi federasoens desportivas nain 9 aprende konaba rede komputador baziku, hardware/software no VOIP [Voice Over Internet Protocol_Red.].

“Atividade formasaun ida ne’e hetan apoiu finanseiru hosi Governu, atraves Secretaria de Estado da Juventude ho total orsamentu USD 9,500.00,” relata Martinho.

Chefe Departamento IT, Direccao Nacional da Comunicacao, SEJD Ananias Pinto, ba TAFARA.ORG informa katak objetivu hosi treinamentu ida ne’e mak jovens sira, hosi Munisipius no federasoens desportivas iha konhesimentu konaba ICT, no uza badaen no matenek mak iha hodi rezolve rasik obastakulus no dezafius mak sira no jovens seluk hasoru, iha sira nia hela fatin, no mos iha fatin seluk.

Iha sira nia intervesaun, partisipante nain 3, nebe reprezenta sira seluk felisita SEJD, no mos hato’o katak durasaun treinamentu ICT loron 3 ate loron 6 deit la sufisiente ba sira hodi konhese diak liu tan. Tanba ne’e, husu ba SEJD atu kontinua programa mak hanesan iha loron oin.

Iha okaziaun ida ne’e, alem de fahe sertifikadu partisipasaun ba partisipantes, Centro Treinamento Info Timor mos entrega komputador unidade 2 ba melhor partisipante nain 2, mak Ricardo da Costa Ribeiro hosi Universidade Canossa, no Abilio de Jesus hosi Centro Juventude Lautem.* [MCMONIZ | TAFARA.ORG | 06.02.2016].

About Metodio Caetano Moniz

Metodio Caetano Moniz, nudar fundador TAFARA.TL, hamutuk ho Fernando A. da Costa & Zevonia Vieira.

Check Also

SEA Games 2017: Timor-Leste Hetan Medalha Bronze Tolu Hosi Taekwondo

Modalidade Taekwondo salva Timor-Leste nia oin wainhira atletas nain tolu kontribui medalha bronze (perunggu) 3 …

Leave a Reply

Your email address will not be published. Required fields are marked *