Friday , November 24 2017
Home / Siensia & Teknolojia / SEJD organiza kompetisaun ICT hodi hasa’e abilidade professional Juventude
Kompetetor husi eskola sekundaria STM Becora responde hela pergunta husi juri.[Foto: Zinho MD | TAFARA.TL | 08.09.2017].

SEJD organiza kompetisaun ICT hodi hasa’e abilidade professional Juventude

Iha mundu ohin loron, nesesaria tebes atu koñese teknolojia, liu-liu foinsa’e sira ne’ebe nu’udar forsa ba dezenvolvimentu nasional. Nune’e Governu Timor-Leste liu husi Sekretaria Estadu Juventude no Desportu [SEJD], nu’udar orgaun ne’ebe responsabilza iha area Juventude, hola inisiativa hodi organiza kompetisaun ICT ba Estudantes sira iha nivel sekundariu no universitariu hodi hasa’e abilidade professional Foinsa’e nian iha area refere.

Diretora Nasional Komunikasaun Informasaun no Teknolojia [DNICT], Francelina Ximenes, iha intrevista ho Jornalsita sira hateten, “atividade ida ne’e kontempla ona iha planu asaun anual 2017 nian, husi Sekretaria Estadu Juventude no Desportu [SEJD] nian, atraves Diresaun Nasinal Komunikasaun Tecknologia [DNICT]. Atividade ida ne’e kuaze tinan tinan realiza para hametin liu tan talentu estudantes eskola sekundariu no universitariu sira konaba sira nia talentu iha ICT. Atividade ida ne’e mos oinsa atu hametin espiritu kompetetivu ba joven sira no mos hametin sira nia abilidade profesionalidade iha area ICT.”

Iha sorin seluk Presidente Komisaun Organizadora, Martinho Gorety iha nia intrevista explika, “preparasaun ba atividade ida ne’e hahu tena (tiha ona red) iha fulan tolu kotuk liu ba tamba atividade ida ne’e, ita fo tempu ba estudante sira estuda no ohin loron sira mai kompete,” esplika Presidente Komisaun.

Presidente komisaun hatutan, “kompetisaun ne’e fahe ba parte rua, iha nivel sekundariu no nivel universitariu, husi universitariu sira kria baze de dadus ho topiku sistema informasaun profile Juventude Timor-Leste, ba eskola sekundaria sira kompete iha mini sertamen no materia ICT geral.”

Entretantu Estudante husi Eskola Sekundaria Canosa, Valdomar Sepeda Saldanha, ba Jornalista TAFARA.TL expresa nia sentimentu kontenti tamba ho esforsu ne’ebé iha bele hetan rezultadu ne’ebe fo ksolok.

“Primeiru ami sente kontente tamba ami nia esforsu bele hetan rezultadu ne’ebe bele fo ksolok mai ami, tamba ami nain tolu bele serbisu hamutuk, bele kompleta malu hodi bele sai vencedor iha eventu ida ne’e,” dehan Valdomar.

Valdomar Sepeda Saldanha husu ba parte SEJD no Komisaun Organizadora atu mellora liu pergunta hirak ne’ebe fo ba kompetetor sira, pergunta ne’ebe sistematiku liu nune’e competitor sira bele akapta ho pergunta sira ne’ebe iha atu nune’e fasil atu fo resposta.

Estudante eskola São Minguel, Constancio Alino Fernades de Deus, ba TAFARA.TL hateten, “ba oin São Minguel sei prepara-an halo diak liu, hodi bele lori eskola nia naran ba oin, liu husi ami nia estuda makas.”

Hanesan manan na’in iha kompetisaun refere, primeiru lugar okupa husi eskola sekundaria Canosa ho volor 256, Segundu lugar eskola STM Becora ho valor 245, no terseiru lugar eskola ETI ho valor 238.

Atividade ne’e realiza iha edificiu SEJD, Lecidere, Dili, organiza husi Info Timor, apoio husi SEJD, hetan partisipasaun husi eskola sekundaria Cristal, Canossa, São Minguel, STM no ETI. Tuir informasaun mak TAFARA.TL asesu, kompetisaun ba universitariu sira sei hala’o iha loron aban. Universidade ne’ebe mak sei partisipa mak, UNTL, UNITAL, DIT, IOB no IPDC. Orsamentu ba atividade ne’e ho montante USD 13,090.00 kategoria transferensia publika.* [Jesuino Marcal de Jesus | TAFARA.TL | Editor: Martinho Moniz | 08.09.2017].

About Jesuino Marcal de Jesus

Jesuino Marcal de Jesus, Jornalista, Webmaster no mos nudar Business Manager TAFARA.TL.

Check Also

AMP Ezizi Prezidente Parlamentu Hodi Tau Mosaun Sensura Iha Agenda ho Karakter Urjensia

Aliansa Maioria Parlamentu (AMP) hatama karta ba Presidente Parlamentu hodi konvoka reuniaun lideransa partidu hodi …

Leave a Reply

Your email address will not be published. Required fields are marked *