Thursday , November 23 2017
Home / Siensia & Teknolojia / Sumariza Dadus Transaksaun Finanseira Uza SUMIF iha Microsoft Excel
Sample Cash Report

Sumariza Dadus Transaksaun Finanseira Uza SUMIF iha Microsoft Excel

Kada relatoriu finanseira, alem de detalhes gastus, presiza mos sumariza ba kategoria gastus, por ezemplu Konsumu, Transporte, Material Eskritoriu, no sel-seluk tan.

Sumariu relatoriu finanseira tuir kategoria ida-idak, importante ba ita, liu-liu ba dirijentis organizasaun hodi kontrola gastus no/ka toma dezisaun. Iha artigu ida ne’e, Autor koko atu fahe hanoin/esperiensia ituan konaba oinsa uza funsaun SUMIF iha Microsoft Excel, hodi tulun ita atu prepara no aprezenta relatoriu transaksaun finansial ho lalais, kredivel no informativu, hanesan figura mak hatudu iha leten. Artigu ida ne’e mos dezenvolve ho hanoin katak ita iha ona konhesimentu baziku konaba Microsoft Excel.

Hanesan hatudu iha figura, ita iha koluna DATA [data transaksaun], DESKRISAUN [esplikasaun konaba transaksaun], KATEGORIA [kategoria gastus, iha 3: Konsumu, Material Eskritoriu, Transporte], DEBET [hakerek osan tama, ka rendimentu], KREDIT [hakerek osan sai, ka gastus], no mos koluna BALANSU [montante diferensa entre koluna DEBET no KREDIT].

Hakerek DATA iha Cell C7, DESKRISAUN iha Cell D7, KATEGORIA iha Cell E7, DEBET iha Cell F7, KREDIT iha Cell G7, no BALANSU iha Cell H7.

Preenche tabela ho dadus mak hatudu ona iha figura, hahu hosi koluna DATA ate KREDIT. Iha koluna BALANSU, preenche ho formula nudar tuir mai:

1. Cell H9: =H8+F9-G9 [signifika: BALANSU INISIAL + DEBET – KREDIT];
2. Copy formula iha Cell H9 ne’e ba Cell H10 ate H15;
3. Se dadus mak ita hatama tuir duni figura, ita nia montante balansu iha 31-Jan-17 hela $128,561.00.

Tuir mai ita halo sumariu ba detalhes gastus mak iha, haktuir ba kategoria gastus: Konsumu, Material Eskritoriu, no Transporte. Atensaun: lia-fuan KONSUMU, MATERIAL ESKRITORIU, TRANSPORTE tenqui hanesan los ho hirak nebe hakerek ona iha koluna KATEGORIA. Diferensa letra ida deit, sei hamosu error ka rezultadu kalkulasaun sei la hanesan ho dadus transaksaun mak iha.

1. Muda kursor mouse ba Cell F16, hakerek fraze KONSUMU iha neba, klik butaun Align Right para ninia pozisaun/formatu hanesan hatudu iha figura;
2. Preenche MATERIAL ESKRITORIU iha Cell F17, no TRANSPORTE iha Cell F18.

Agora ita atu kalkula sumariu gastus bazeia ba kategoria ida-idak, uza formula SUMIF. Formatu SUMIF mak: =SUMIF(range, criteria, [sum_range]).

1. Iha Cell G16 preenche formula: =SUMIF($E$10:$E$15,F16,$G$10:$G$15); Note: Formula ne’e haruka ita block/sorot KATEGORIA gastus hosi Cell E10 ate E15, determina kriteria [KONSUMU] mak hakerek ona iha Cell F16, no block/sorot dadus gastus iha Cell G10 ate G15;
2. Copy formula iha Cell G16 ne’e ba iha Cell G17 no Cell G18;
3. Se prosesu la prosesu la sala, Cell G16 automatikamente sei sumariza total gastus ba kategoria KONSUMU: $195.00, Cell G17 sumariza kategoria MATERIAL ESKRITORIU: $524.00, no Cell G18 kalkula kategoria TRANSPORTE: $720.00.

Hosi esplikasaun hirak nebe hakerek ona iha leten, bele toma konkluzaun katak funsaun SUMIF fo biban ba ita atu haruka Microsoft Excel hodi kalkula/sumariza deit montante hirak nebe tuir kriteria mak ita rasik determina ona.

Fasil? Depende ba ema ida-idak! Autor so bele serteza katak so ho koko no pratika bebeik mak ita foin bele terbiasa. Konaba formatu Microsoft Excel no kalkulasaun seluk hanesan hatudu iha figura, ita ida-idak bele koko rasik. Autor sei kontinua esplika iha futuru, karik iha tempu let ruma.* [32MONIZ | TAFARA.TL | 21.03.2017].

About Metodio Caetano Moniz

Metodio Caetano Moniz, nudar fundador TAFARA.TL, hamutuk ho Fernando A. da Costa & Zevonia Vieira.

Check Also

SEA Games 2017: Timor-Leste Hetan Medalha Bronze Tolu Hosi Taekwondo

Modalidade Taekwondo salva Timor-Leste nia oin wainhira atletas nain tolu kontribui medalha bronze (perunggu) 3 …

Leave a Reply

Your email address will not be published. Required fields are marked *