Wednesday , June 19 2019
Home / Sosial & Politika / Sobrevivente Vulneravel Tempu Funu, Sei Moris Iha Injustisa Nia Laran To Ohin Loron
Diretora ACbit, Prezidente Komisaun F PN, Diretor CNC no Moderador iha seminariu aprezentasaun rezultadu avaliasaun baze de dadus kona ba sobrevivente vulneravel iha TL. [Foto: Nelson Miranda | 30.01.2018]

Sobrevivente Vulneravel Tempu Funu, Sei Moris Iha Injustisa Nia Laran To Ohin Loron

“Vitima hosi tortura no sei kontinua terus nafatin. Hetan sofrementu fizikamente tanba hetan impaktu hosi violensia iha funu hanesan hetan akuzasaun no sai difisiente ne’ebe terus nafatin to agora. Iha vitima hosi violensia sexual maioria feto maluk sira. Feto faluk ne’ebe hetan kaben obrigatoriu, labarik sira ne’ebe afetadu tanba funu”. Manuela Leong

Centro Nasional Chega! [CNC] servisu hamutuk ho AcBit hodi halo aprezentasaun rezultadu peskiza kona ba implementasaun politika governu nian ba sobrevivente vulneravel iha Timor-Leste.

Liu hosi seminariu ida ne’e, Diretor ezekutivu CNC, Hugo Fernandes hatoo deskursu katak, aprezentaun peskiza kona ba sobrevivente vulneravel iha Timor-Letes tenke rekonnese katak say nudar baze de dadus, ho numeru ne’ebe fixu hatudu ema ne’ebe vulneravel ka sai sobrevivente.

“Ita la hatene ema nain hira mak hetan sofre ba hahalok abuzu sexual, nainira mak tenke hetan tratamentu ba fiziku, psikologia no ekonomia. Oinsa mak atu identifika ema vulneravel iha saude mental, fiziku, ekonomia no buat sira seluk tan”. Hateten Hugo

Hugo Fernandes informa liutan katak hahu hosi I Governu to Governu ida agora, atende duni ka lae ba vitima no sobrevivente sira ne’e, tanba siklu violensia ne’e sei hatutan fali ba familia no sei bele akontes violensia domestika.

Tuir Diretor Hugo katak enkontru ida ne’e nudar enkontru ba dala uluk nian, no sei kontinua, hodi hare ba fundus solidaridade ba sobrevivente sira, hodi bele tulun maluk sira.

Diretora Asosiasaun Chega Ba Ita [ACbit], Manuela Leong Pereira iha nia aprezentasaun hatete katak liu hosi peskizasaun ne’ebe ACbit halo, sei mosu problema no obstaklu oin-oin ne;ebe vitima no sobrevivente vulneravel sira hasoru.

“Ita hasoru vitima ka sobrevivente ne’ebe vulneravel liu, hau hanoin referensia importante kedas hosi rekomendasaun CAVR nian, ne’ebe koalia kona ba atu tau atensaun no rekomendasaun spesifiku ba vitima ne’ebe vulneravel liu, iha sira nia rezekitus balun ne’e hare hosi kategoria vitima hosi tortura no sei kontinua terus nafatin. Hetan sofrementu fizikamente tanba hetan impaktu hosi violensia iha funu hanesan hetan akuzasaun no sai difisiente ne’ebe terus nafatin to agora. Iha vitima hosi violensia sexual maioria feto maluk sira. Feto faluk ne’ebe hetan kaben obrigatoriu, labarik sira ne’ebe afetadu tanba funu”, hateten Manuela leong.

Ativista ba direitus Humanus ne’e haklean liutan katak rezultadu ne’ebe haree primeiru liu mak politika governu nian haree ba ema vulneravel, hare katak sedauk iha komprensaun ne’ebe la hanesan konaba sobrevivente ne’ebe vulneravel, tanba vulneravel sei iha hanoin liu ba ema jeral, liu-liu iha Ministeriu Solidaridade Sosial [MSS] ne’ebe dehan vulneravel mak mai hosi idozus, ema sira ne’ebe moris susar, ema sira ne’ebe hetan abandona hosi laen. Ida ne’e hare katak saida mak hakerek iha relatoriu CAVR kuaze instituisaun sira neebe ACbit hasoru, hotu-hotu koalia katak sedauk hatene rekomendasaun ne’ebe prefere ba programa ne’ebe ministeriu ne’e halao.

“Mekanismu no kolaborasaun entre instituisaun sira hanesan MSS ho SAUDE servisu besik no mos parte veteranus oinsa, atu prefere kazu ba malu, maibe nafatin katak sira la tau matan ba vitima sira hosi konflitu funu nian. Iha entrevista ho dotor balun mos katak sira laiha politika atu tau matan ba ba sobrevivente vulneravel, maibe ami iha esperiensia ho maluk sira dotor balun, ami koko kria servisu hamutuk no iha ligasuan diak ho dotor balun, ne’ebe sira halo tanba laran diak, sira iha atensaun ba vitima sira maibe sira halo laos tanba politika iha sira nia ministeriu”, tenik Manuela.

Liu hosi entrevista ho Focus Group Discussion [FGD] ne’ebe ACbit halo hatudu katak sobrevivente sei barak mak sedauk hetan atensaun, hetan apoiu no hetan asesu ruma tanba sira nia status ka situsaun hanesan vitima hosi tempu pasadu, liu-liu inan feto sira ne’ebe mak sai vitima hosi violasaun sexual ka kaben obrigatoriu ho tropas Indonesia, oan sira mos sai vulvneravel tanba sira nia inan nian istoria uluk, balun sedauk hetan sira nia direitu tanba la hatane atu asesu informasaun. Hosi diskusaun ho sira, sira sei hirus tanba laiha antensaun ba sira, barak mos hirus tanba sira konta sira nia istoria, maibe to agora sedauk iha rekomendasaun, ema barak mos sei trauma, balun hetan moras mental no atu agora la asesu fatin hodi kura, vitima sira ne’e sai marjinalizadu liutan.

Ho razaun hosi peskiza ida ne’e, ACbit rekomenda ba governu katak liu hosi MSS bele servisu hamutuk ho parseiro relevante sira ,atu kria definisaun klaru liu ba ema vulneravel ne’e mak se, inkluis mos iha atensuan ba vitima sira hosi sobrevivente sira hosi konflitu pasadu. Presiza esforsu halo konsienlizasuan ba kampanna hodi habelar informasaun, liu-liu ba reprezenta sira hosi governu kona ba diferensia entre vitima no sobrevivente sira hosi konflitu pasadu ho veteranu sira no mos vitima sira hosi dezastre naturais. Presiza estabelese fundu ka trans fund. Presiza estabelese instituisaun ne’ebe tau matan ba ema ne’ebe sofre tratamentu moras mental, hanesna mos trauma ne’ebe la haten tratamentu iha tempu naruk no sira sai trauma todan liutan. Apoio treinamentu hosi ema professional sira ba vitima sira. Presiza hadia sistema mekanismu baze de dadus ne’ebe foti hosi instituisaun relevante. Fo atensaun ba vitima no sobrevivente hosi tempu pasadu, ne’e mandadu importante no presiza tau iha implementasaun no presiza halo esforus atu halo politika ida ne’ebe klaru.

Iha tempu hanesan Prezidente Komisaun F, iha Parlamentu Nasional, Jose Agustinho da Silva, iha seminariu refere, iha CNC, 31/01 hateten asumtu kona ba sobrevivente iha tempu pasadu importante tebes atu estadu tau matan.

“Maske membru parlamentu sira truka, maibe parlamentu la truka, se liu hosi eleisaun antesipada ne’e mak governu foun mosu, tenke tau atensaun ba asumtu sobrevivente tanba ida ne’e parte hosi interese estadu no komum. Presiza hare orsamentu estadu ne’ebe klean hodi fo apoio ba vitima sira”, hateten Jose

Metodologia hosi peskiza ne’e mak uza Focus Group Discussion hamutuk partisipante 86 no liu hosi entrevista hamutuk em anain 19 ne’ebe mai hosi instituisaun sira ne’ebe diferente. *[Zevonia Vieira | TAFARA.TL | 31.01.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *