Tuesday , December 12 2017
Home / Sosial & Politika / Atinji Igualdade Jeneru Iha PN no Sosiadade Sivil, GMPTL Kontinua Luta
[Foto: Media PN].

Atinji Igualdade Jeneru Iha PN no Sosiadade Sivil, GMPTL Kontinua Luta

“Parlamentu fó espasu di’ak ba feto sira iha parlamentu, hodi harii grupu ida hamahan an iha GMPTL. Maske sira mai husi partidu oi-oin maibé sira mai ho interese ida atu ko’alia kona-ba asuntu feto, labarik no sosiedade nian”. Alita Verdial

Grupo Mulheres Parlamentar de Timor-Leste (GMPTL), fundasaun ida ne’ebé harii iha tinan 2007, hodi fó espasu ba membru parlamentu feto sira, hodi fó importansia ba asuntu jéneru iha uma fukun Parlamentu Nasionál.

Iha selebrasaun aniversariu fundasaun GMPTL ba dala 10 ne’ebé monu iha loron  20/11 , Vice Prezidente GMPTL, Nurima Ribeiro Alkatiri esplika katak maske tinan 10 ezistensia GMPTL nian maibé obstaklu sei iha.

“Grupu Parlamentar Feto la’os grupu ne’ebé mak foka individual maibé halo parte ba Parlamentu Nasionál tomak, iha Parlamentu Nasionál deputadu sira mak iha kna’ar ne’ebé boot tebes, entaun mezmu deputada sira feto ne’ebé hola parte GMPTL tenki fahe mós sira nia tempu, sira nia konsentrasaun ba servisu sira seluk ne’ebé relasiona ho servisu parlamentu lor-loron nian e nomós obstaklu balun ne’ebé kona-ba kordenasaun ne’ebé sei presija hadia di’ak liu tán e presija mós reforsa liu tán servisu atu feto bele servisu hamutuk liu tán nomós feto ho mane sira atu servisu hamutuk liu tán,” tenik Nurima Alkatiri iha uma fukun parlamentu, 21/11.

Deputada husi Bankada FRETILIN ne’e mós salienta liu tán kona-ba programa prioridade ne’ebé mak GMPTL hakarak, mak atu bele atinji  igualdade jéneru iha parlamentu laran nomós iha sosiedade, hodi  kontribui ba igualdade jéneru iha sosiedade laran, ida ne’e sei liu husi dalan oi-oin, inklui mós atu servisu hamutuk ho parseiru sira para atu halo advokasia liu tán kona-ba igualdade jéneru e atu servisu hamutuk ho komisoens sira seluk,  ho deputadu sira seluk iha Parlamentu Nasionál bele reforsa importansia atu iha prespektiva jéneru iha lei ne’ebé de’it, liu husi Parlamentu Nasionál, inklui mós Orsamnetu Jerál Estadu (OJE).

Ativista feto Timoroan, Alita Verdial, ne’ebé partisipa iha loron aniversariu GMPTL,  iha fatin expozisaun ne’e, Alita fó apresiasaun boot tanba parlamentu fó espasu di’ak ba feto sira iha parlamentu, hodi harii grupu ida hamahan an iha GMPTL. Maske sira mai husi partidu oi-oin maibé sira mai ho interese ida atu ko’alia kona-ba asuntu feto, labarik no sosiedade nian.

Alita mós hein katak programa hotu ne’ebé mak GMPTL iha nafatin foka ba problema ne’ebé mak durante ne’e feto no labarik sira hasoru,“ita espera katak planu estratejiku ne’ebé GMPTL halo ne’e tenki aliña ho Rede Feto nia planu estratejiku no kuadrus sira seluk, pro ezemplu Deklarasaun MauBisse, haree ba rekomendasaun CEDAW, oinsá atu implementa”.

Partisipante ne’ebé mak vizita iha expozisaun, estudante Externato São Jose Dili, Tunísio Cabral  ba jornalista TAFARA.TL hato’o nia esperansa katak presija muda hanoin ne’ebé mak belit ona iha sosiedade kona-ba feto nia pozisaun mak hela de’it iha dapur.

“Iha antigu mane sira iha poder boot liu feto sira, wainhira mane sira ko’alia, mane sira mak iha direitu atu halo buat ne’ebé mak di’ak no feto sira tau iha dapur de’it”, hateten Tunísio.

Nia hatutan tan katak GMPTL presija fó importansia ba feto nia partisipasaun iha area edukasaun, saúde no principal liu mak iha polítika tanba iha IV orgaun soberanu ne’e lideransa masimu mane hotu. Nune’e nia hein katak iha futuru feto balun mós sei okupa posizaun masimu iha orgaun soberanu haat ne’e. Iha selebrasaun aniversariu GMPTL nian ba dala 10 ne’e, iha mós atividade expozisaun ne’ebé hatur iha uma fukun Parlamentu Nasionál, nune’e ema hotu bele haree saida mak GMPTL halo ona.* [Maria do Ceu | TAFARA.TL |Editor: Zevonia Vieira | 21.11.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Tinan 42 Selebra Independensia, Komunidade Suai Iha Esperansa Dezenvolve Baze Ho Kualidade

“Estadu Timor ida ne’e, sei sai estadu Timor ida ne’ebé di’ak liu  ida ne’ebé mak …

Leave a Reply

Your email address will not be published. Required fields are marked *