Thursday , November 23 2017
Home / Sosial & Politika / CAC: Hakribi, Kombate no Prevene Korupsaun Agora
Diretor Geral SEJD, Metodio Caetano Moniz Foto hamutuk ho Manan Nain ba kompetisaun Certame Nivel Nasional.[Foto: Martinho Moniz | TAFARA.TL | 04.07.2017].

CAC: Hakribi, Kombate no Prevene Korupsaun Agora

Korupsaun fo impaktu negativu ba ema nia moris, inklui fo impaktu saude, edukasaun no ekonomia. Xefi Unidade Promosaun, CAC, Leonilda R. S. Lobato, husu ema hotu atu hakribi aktu ne’e.

Mensajen ne’e hato’o husi Xefi Unidade Promosaun Valores no Integridade, CAC, Leonilda R. S. Lobato ba estudante Sekundaria no nivel Universitariu sira hotu. Leonilda hatete, “Korupsaun ne’e krime ida ne’ebe ke ladiak, karik akontese nia fo impaktu boot ba ema hotu hotu iha aspetu saude, edukasaun, ekonomia. Tan ne’e, ita hotu hotu tenki hakribi korupsaun hahu agora, atu nune’e ba future Timor-Leste bele livre husi Korrupsaun”. Hateten Lobato.

Tuir Leonialda, atividade ne’e importante tebes, tanba iha tempu agora, korupsaun mos buras ona iha Timor-leste, no tenki buka atu kombate, liu husi maneira oin-oin atu bele prevene aktus korrupsaun. Hanesan liu husi atividade Kompetisaun Sertame Anti Korupsaun ba estudante sira hodi hafanun estudante sira nia konsiensia hodi prevene no kombate korupsaun iha Timor-Leste. CAC mos apresia ho kooperasaun ne’ebé mak SEJD realiza hodi hala’o atividade ne’e.

Gabinete Inspetoria Geral e Auditoria, João dos Santos, espera katak estudante sira hatene ho didiak saida mak korupsaun, nune’e bele prevene korrupsaun iha Timor-Leste.

“Espera se imi hotu komprende didiak anti korrupsaun, ita bele prevene korrupsaun, kombate korrupsaun, ba oin ba future ne’ebe mak diak ba ita nia nasaun ita bele dezenvolve diak liu tan husi hamenus korupsaun ne’ebe maka ema dehan hahu dadauk ona ita bainhira harii nasaun ida ne’e, “ João dos Santos hateten.

SEJD la servisu mesak hodi realiza atividade ida ne’e, servisu hamutuk mos ho Ministeriu Edukasaun liu hosi Gabinete Dirasaun Geral Ensinu Sekundaria. Xefi Gabinete Ensinu Sekundaria apresia ho kooperasaun ne’ebe iha no nia espera atividade ne’e bele hadiak matenek estduantes nian. Xefi Gabinete Diresaun Geral Ensinu Sekundariu, Albertina Fatima Martins, hato’o ba Jornalista Tafara.org katak atividade hanesan ne’e bele promove Koñesimentu estudante sira nian kona ba lei ne’ebe mak Timor-Leste iha. No ministeriu edukasaun la taka atu instituisaun sira seluk bele hala’o atividade sira hanesan ne’e.

Jornalisata Tafara mos dadalia ho estudante husi Eskola Sekundaria Jeral Malere Aileu, Andreas da Costa, ne’ebe espresa katak nia senti kontenti tanba bele tuir atividade ne’e, “hau kontenti tebes, wainhira mai tuir kona ba programa ida ne’e para bele atu motiva mos ami hodi bele komprende mos liafuan ida kona ba anti korupsaun ne’e. Ne’e para ami bele aplika iha ami nia moris, para halo tuir saida mak anti korupsaun, para ami bele halakon buat ne’e iha future,” hatete Andreas da Costa.

Manan nain ba kompetisaun ne’e mak Eskola Sekundaria Jeral de Kairala hanesan Primeiru Lugar, Eskola Tekniku Vokasional Likisa mak segundu Lugar, Terseiru lugar mak Eskola SACROJES no Kuartu Lugar mak ESJ Malere Aileu.

Orsamentu ne’ebe aloka ba atividade ne’e ho montante USD 11.748.00 [Dolar Amerikanu Rihun Sanulu-Resin-Ida, atus-hitu, haat-nulu-rein-walu], inklui Premiu ba Manan Na’in sira. Primeiru lugar manan premiu ho montante orsamentu USD 2000.00 [Dolar Amerikanu rihun rua], Segundu lugar USD 1500.00, [Dolar Amerikanu rihun ida, atus lima], Terseiru lugar USD 1000.00 [Dolar Amerikanu Rihun ida] no Kuartu Lugar USD 500.00 [Dolar Amerikanu atus-lima]. Osan balun ho montannte USD 800 gasta ba Alojamentu no Transpote estudantes eskola 12 ne’ebe partisipa, restu seluk ba nesesidade sira seluk ne’ebe suporta atividade ne’e.

Atividade refere hanesan planu anual SEJD nian ne’ebé hala’o husi Gabinete Inspetoria Jeral no Auditoria, ho objetivu estudante hasae koinesementu estudante nivel ensinu sekundariu nian konaba Lei Regulamentu Administrativu mak la’o dadaun.

Kompetisaun ne’e hala’o ho faze rua, dahuluk haha’o iha Nivel Munisipal nudar faze audisi, hala’o iha Munisipiu haat hanesan: Likisa, Aileu, Manatutu no Dili ne’ebe partisipa husi Eskola tolu-tolu hosi kada munisipiu. Hirak ne’ebé mak manan iha kompetisaun faze audisi maka sei kontinua iha faze final. No eskola hirak ne’ebe tama iha faze final ne’e mak hanesan Eskola Téknika Vokasional Likisa, Eskola Sekundaria Jeral de Malere Aileu, Eskola Sekundaria Jeral Kairala Manatutu no Eskola Sekundaria Katolika Sagradu Korasaun de Jesus Dili. Faze final ne’e hala’o iha resintu SEJD iha 4/07/2017.

Tuir Observasaun Jornalista TAFARA.TL, estudante sira partisipa ho antuziaismu tebtebes, atividade mos la’o ho diak no hetan partisipasaun ativu husi adeptus sira, observadoeres sira ne’ebe akompaña kompetisaun refere.*[Yane Maia | TAFARA.TL | Editor: Ato “Lekinawa” Costa | 04.07.2017].

About Yane Elfrida Maia

Check Also

SEKRETARIADU APF, FAHE INFORMASAUN BA AKADEMISTA KONA BA ASEAN

Sekretariadu ASEAN People Forum (APF) Timor-Leste hala’o sosializasaun ba akademista sira hodi hatene saida mak …

Leave a Reply

Your email address will not be published. Required fields are marked *