Tuesday , December 12 2017
Home / Sosial & Politika / Demo Anti Lelaun Prado, Estudante Nain 10 Kapturadu
estudante sira nebe partisipa iha demonstrasaun kapturadu.[Foto: fonte kredibel].

Demo Anti Lelaun Prado, Estudante Nain 10 Kapturadu

Violensia mosu iha demonstrasaun kontra lelaun kareta prado. Polisia Nasional Timor-Leste (PNTL) tiru ‘gas airmata’ ka gas lakrimojeniku hodi dispersa demonstrantes maibe ikus mai hamosu aktu violensia hodi estraga kareta estadu hat nia vidru rahun.

Tuir estudante ne’ebe partisipa iha demonstrasaun hosi Movimentu Tane Timor (MTT), Crisogno Domingos da Costa, hatete katak polisia mak tiru gas airmata uluk tanba estudantes koko dudu atu lao ba edifisiu Parlementu Nasional nia oin. Hafoin ida ne’e estudante sira fila hikas mai kampus no kontinua hakilar husu atu polisia fo livre ba estudante nain 4 ne’ebe kaer premeiru, inklui Portavos demonstrasaun estudante nian, Miguel Araujo.

Iha parte sorin Ministro Interior, Longinhos Monteiro, fo orden atu uza forsa. “Laiha liafuan harahun, estadu direitu demokratiku fo oportunidade ba explora buat hotu, mais harahun labele. Hau fo ona ordem, anarkismu, tuda kareta tenki para, se lae ita mos uza forsa,” Hatete Longinhos.

Lia ne’e hato’o iha Edifisiu Parlamentu Nasional oin, bainhira observa atua atividade manifestasaun, kontra desizaun Parlamentu Nasional kona-ba lelaun kareta prado, 21/08/2017.

Ministro Interior fo atensaun ba manifestante sira tenki disiplina no respeita malu, “agora tuda ema kareta rahun, estraga ema nia sasan ne’e la los ona. Ne’e bele iha terseira pesoa iha kotuk, bele iha objetivu seluk iha kotuk.”

Ba jornalista sira, Eis Komandante Jeral PNTL mos hato’o katak, parte policia identifika kareta barak rahun ona, nune’e Ministro Interior husu ida ne’e tenki hapara, se akontese hanesan ne’e polisia mos iha ninia meius para atu hapara buat ida harahun ne’e. Terseira parte bele infiltra, bele aproveita, tenki kuidadu ho buat hirak ne’e. Laiha anarkismu, estudante ka se deit sidadaun Timor ninian.

“Estudantes sira tenki kalma, hato’o sira nia aspirasaun politika ka pensamentu iha ninia dalan. Haruka nia reprezentante mai kolia ho Parlamentu, koalia estadu hanesan ne’e. Labele ita mak sobu fali estadu, estraga fali estadu”, tenik Ministro Interior.

Bainhira hatan ba perguntas hosi jornalista sira kona ba policia tiru gas lakrimojeniku, Longuinho esplika katak,  tamba saida mak tiru, tamba buat ruma mosu la los mak tiru.

“Gas ne’e uza para tiru duni, agora mak anarkismu mosu tan hau haruka tiru nafatin. Para atu hapara buat ida harahun, buat ida narkismu ne’e. Tenki ser hanesan ne’ee duni, Polisia uza ninia atributo para atu hapara buat ida anarkismu, asegura no proteze ema nia sasan sira, liu liu estadu ninian ne’e misaun polisia ninian,” dehan Longinos Monteiro ba media sira”, hateten Longuinhos

Iha fatin hanesan, Reitor UNTL, Franscisco Guilhermino Marques afirma asaun ne’e halo husi Movimentu Universitariu Timor Leste la’os estudante UNTL deit. Nune’e husi Reitor UNTL labele hapara asaun refere. Iha loron 14 Agostu 2017 Retoria UNTL simu karta husi Movimentu Estudantes UNTL, kona-ba asaun refere, Retor resposta la autoriza uja espasu instituisaun UNTL ba halo asaun refere.

“Tuir lei no mos estatutu UNTL, UNTL ne’e instituisaun publika estadu nian. Ne’ebe nu’udar Reitor institusionalmente la autoriza. Resposta fila fali karta ida husi Reitor ninian katak tuir estatutu UNTL no mos instituisaun pblika ninian, labele halo manifestasaun iha kampus laran. Tamba UNTL ne’e instituisaun publiku.”

Reitor UNTL afirma, estudantes sira la respeita surat ida ne’e no sira kontinua halo, nune’e Reitor laiha kompetensia para atu hapara, tamba kbi’it laiha atu hapara sira, entaun sira la’o. Timor-Leste país demokrasia, sira atu halo maibe halo labele iha instituisaun. Mais ou menus tuir lei ne’e afasta 100 metrus, husi instituisaun publika. Parlamentu Nasional instituisaun publika, Organu Soberanu, UNTL instituisaun publika do estado, tuir lei ita labele halo.

Tamba ne’e Reitor UNTL entrega ba parte kompetente atu hola medidas tuir lei. Ema hotu sidadaun Timor, estudantes ka se deit ne’e sidadaun Timor, hotu-hotu obedese ba lei.

Estudantes nain 10 mak hetan ona kapturasaun husi Policia Nacional Timor-Leste, no oras ne’e daudaun detein hela iha sela PNTL.* [Luis Soares | Martinho Moniz | TAFARA.TL | Editor: Zevonia Vieira |  21.08.2017].

About Virginia Pereira

Check Also

Ahi Mean Lakan Boot, Han Uma Kain Tolu Iha Perumnas

Akontesementu Uma Ahi han, iha Perumnas Bairo-Pite oras tuku 10:00 kalan, iha loron 08/11. Iha …

Leave a Reply

Your email address will not be published. Required fields are marked *