Tuesday , December 12 2017
Home / Eleisaun Parlamentar / Deputadu Sira Iha Esperansa ba Mudansa Servisu Parlementu Nian
Estrutura Meza Parlmentar Periodo 2017-2022.[Foto: Zinho MD | TAFARA.TL | 06.09.2017].

Deputadu Sira Iha Esperansa ba Mudansa Servisu Parlementu Nian

Labele uza interese privadu, rona povo nia halerik, hametin komprimisiu mak sai nudar esperansa deputadu no deputada nian iha loron dahuluk funsionamentu Parlementu Nasional nian. Sira hotu iha esperansa katak Parlementu Nasional iha halo servisu diak liutan iha tinan lima mai.

Deputadu Fretilin, Ozorio Florindo, husu atu iha servisu hamutuk hodi hadiak komunidade nia moris, laos haree ba interese privadu.

“Parlamentu tinan lima mai, espasu ne’e sei difisil, la’os hanesan bai-bain tanba povu fó desizaun haruka lider sira tur hamutuk haree povu nia moris, se ita uza ita nia interese partidu, interese privadu, entaun saida mak povu nia halerik, povu nia mehi, parlamentu labele atinji,” tenik Ozoriu Florindo.

Deputadu Fretili ne’e mos deha katak, hanesan ema karik Parlementu ne’e tinan 20 ona, tan ne’e persija hadiak servisu ne’ebe povo barak kestiona.

“Ha’u hanoin parlamentu tinan lima mai, parlamentu mós tinan 20 ona, ne’ebé kompara ho ema karik boot ona. Ha’u hanoin tenki hadia servisu ne’ebé mak povu barak kestiona, tenki muda nia estratejia oinsá mak halol lejislasaun, halo fiskalizasaun, kontrola orsamentu ne’ebé mak aprova ezekuta husi governu para tenki refleta duni ba nesesidade povu ne’ebé mak halerik,” konfesa Ozoriu ba jornalista TAFARA.TL iha Uma Fukun Parlamentu, 05/09.

Depois sesaun plenaria dahuluk remata, iha ma fukun Parlamentu situasaun la’o normal, nune’e jornalista TAFARA.TL hakbesik ba deputadu balu hodi husu sira nia esperansa ba parlamentu tinan lima mai.

Iha dadalia ho deputada husi bankada Partidu KHUNTO, Olinda Guterres. Ho esperta no fiar an nia hatete, partidu tolu ne’e sei fiar an, iha tinan lima nia laran sei servisu di’ak hodi tane governu no sei la monu.

“Esperansa ba tinan lima nian ne’e, ami partidu tolu hamutuk ne’e to’o tinan lima kompletu . Komprimisiu ne’ebé ami partidu tolu hamutuk ne’e, komprimisiu ida ne’ebé que metin . esforsu ne’ebé mak sei halo dialogu lor-loron,” dehan Olinda Guterres.

Nune’e mós Deputada husi bankada FRETILIN, Ilda Maria da Conceiçao hatete ba jornalista TAFARA.TL katak,  tinan lima mai  iha buat barak mak presija hadia duni hodi responde ba nesesidade povu nian.

“Ita foin mak hahuu Parlamentu Legislatura foun, deputados foun mós barak. Depois sei forma komisaun . Ita boot sira mós hatene, ohin Prezidente Parlamento eleito husi deputado husi FRETILIN ninian. Ha’u hanoin katak, hanesan iha nia diskursu, nia sei buka meios hotu-hotu atu oinsá mak funsionamentu parlamentu ne’ebé bele la’o ho di’ak no sei buka atu hadia buat barak, ezemplu hanesan lei. Buat barak mak presiza hadia duni para oinsá mak bele responde nesesidades ba ita nia povu sira nia halerik,” tenik Ilda Maria.* [Maria do Ceo & Jesuino Marcal | TAFARA.TL |Editor: Ato “Lekinawa” Costa | 05.09.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Tinan 42 Selebra Independensia, Komunidade Suai Iha Esperansa Dezenvolve Baze Ho Kualidade

“Estadu Timor ida ne’e, sei sai estadu Timor ida ne’ebé di’ak liu  ida ne’ebé mak …

Leave a Reply

Your email address will not be published. Required fields are marked *